جۇمىسشى – ەكونوميكانىڭ قوزعاۋشى كۇشى

قازاقستان كوممۋنيستىك حالىق پارتياسىنىڭ (قكحپ) سايلاۋالدى ۇگىت-ناسيحات شتابىنىڭ مۇشەلەرى بۇرناعى كۇنى الماتى قالاسىنداعى «الاتاۋ-جارىق كومپانياسى» ۇجىمىنىڭ وكىلدەرىمەن كەزدەستى. پارتيا بەلسەندىلەرى جۇمىسشى تابى وكىلدەرىن وزدەرىنىڭ سايلاۋالدى باعدارلاماسىمەن تانىستىردى. بۇل كوممۋنيستەردىڭ الماتى قالا­سىنداعى كەزەكتى ۇلكەن كەزدەسۋى بولدى. «الاتاۋ-جارىق كومپانياسى» – ەلى­مىزدىڭ وڭتۇستىك وڭىرىندە ەلەكتر قۋاتىن وندىرەتىن ءىرى كومپانيالاردىڭ ءبىرى. ونىڭ تاريحى 1928 جىلدان باستاۋ الادى. قكحپ بەلسەندىلەرى وسىنداعى جۇمىسشى تابى وكىلدەرىنە كوممۋنيستىك پارتيا ەڭبەك ادامىنىڭ مۇددەسىن كوزدەيتىنىن, ونىڭ الەۋمەتتىك تۇرعىدان قورعالۋى جولىندا ەڭبەك ەتەتىنىن ايتا كەلىپ, وزدەرىنە داۋىس بەرۋگە شاقىردى. سونىمەن قاتار, كومپانيا قىزمەتكەرلەرى جۇمىسىنىڭ ەلىمىزدىڭ ەكونوميكاسى ءۇشىن ماڭىزدى ەكەنى دە جەتكىزىلدى. «ادامزاتتى جارقىن بولاشاققا جەت­كىزۋ جولىندا ەنەرگەتيكانىڭ ماڭىزى شەكسىز. ناق ەنەرگەتيكا ادامنىڭ تۇرمىس-احۋالىن وسى زاماننىڭ تالاپتارىنا ساي ەتە الاتىنداي دارە­جەگە جەتكىزەدى. بۇگىنگى كۇنى قالا تۇرعىن­دارىنىڭ سانى ارتىپ, ۋربانيزاتسيا جوعارى دارەجەگە جەتىپ وتىرعاندا جاڭا جۇمىسشى تابىنا ەنەرگەتيكانىڭ قىر-سىرىن مەڭگەرۋدىڭ ماڭىزى زور. ءۇزىلىسسىز ءوندىرىلىپ تۇرعان ەنەرگەتيكا عانا ەكونوميكانىڭ تۇراقتى دامۋىنىڭ كەپىلى. ەنەرگيا ءوندىرۋ توقتاپ قالسا, بارلىق ءوندىرىس تە بىردەن تۇرادى. ال قوعامدىق ومىردە كوممۋنيستىك يدەو­لوگيا – ادام جانىنىڭ العا قارىش­تاۋىنا, ءۇمىتىنىڭ ۇزىلمەۋىنە ەلەكتر قۋا­تىنداي كۇش بەرەتىن فاكتور. سوندىق­تان دا ءبىز ءوز جاقتاستارىمىزدى جاڭا جەڭىس­تەرگە قاراي العا باسۋعا شاقىرامىز», – دەپ V شاقىرىلعان ءماجىلىس دەپۋتاتى, قازىر قكحپ پارتيالىق تىزىمىمەن دەپۋ­تاتتىقتان ۇمىتكەر گالينا بايماحانوۆا جالىندى سوزدەر ايتتى. ونىڭ سوزدەرىن جيىنعا كەلگەن جۇمىسشى تابى وكىلدەرى قىزىعۋشىلىقپەن تىڭدادى. كەزدەسۋگە قاتىسقان قكحپ الماتى قا­لالىق فيليالىنىڭ جەتەكشىسى ماگەررام ماگەرراموۆ ەلەكتر قۋاتىن ءوندى­رۋ بارىسىندا قازاقستاننىڭ ۇلكەن تابىستارعا جەتىپ وتىرعانىن جەتكىزدى. سونىڭ ىشىندە بالامالى قۋات كوزدەرىنىڭ دە رەسپۋبليكادا قاتتى يگەرىلۋدە ەكەنىن ايتتى. «بۇرىنعى قۋات كوزدەرى نەگىزىنەن تەك مۇناي, گاز, سۋ, كومىر, ۋران سياقتى رەسۋرستار بولسا, ەندى ءبىزدىڭ ەلىمىز جەل مەن كۇننىڭ قۋاتىن قولدانۋ جولىندا جاڭا تابىستارعا جەتىپ كەلەدى. بۇلاردىڭ ەكولوگيالىق تيىمدىلىگى جوعارى. ەلىمىزدىڭ ەكولوگياسى تازارىپ, حالقىمىزدىڭ دەنساۋلىعى جاقسى بولۋى ءۇشىن وسىنداي قۋات كوزدەرىن پايدالانۋ تيىمدىرەك. قازاقستان باسشىلىعىنىڭ ەكسپو-2017 كورمەسىنە وسى تاقىرىپتى تاڭداعانى تەگىن ەمەس», – دەدى ول ءوزىنىڭ سوزىندە. جاقسىباي سامرات, «ەگەمەن قازاقستان». الماتى.