ۇلىبريتانيانىڭ “EP IC Asset Management” جانە تۇركيانىڭ “Ae Arma” كومپانيالارىنىڭ دەلەگاتسياسىن وبلىس اكىمىنىڭ ءبىرىنشى ورىنباسارى بەرىك وسپانوۆ قابىلداپ, ەكى جاققا دا ءتيىمدى ۇسىنىستاردى تالقىلادى. شىمكەنتتە ەلباسىنىڭ جارلىعىمەن قۇرىلعان “وڭتۇستىك” ەركىن ەكونوميكالىق ايماعى – ينۆەستيتسيا تارتۋعا قولايلى كەشەن. ءوندىرىس ورىندارى شوعىرلاندىرىلىپ جاتقان ايماق بولاشاقتا قازاقستاننىڭ يندۋستريالىق-يننوۆاتسيالىق دامۋىنا العىشارت جاسايدى. شەتەلدىك ينۆەستورلار وزدەرىنە قولايلى سالالار بويىنشا دا قارجى سالۋعا مۇددەلى ەكەندىكتەرىن تانىتتى.
باقتيار تايجان, وڭتۇستىك قازاقستان وبلىسى.
اۋىل اكىمدەرىنىڭ ەسەبى باستالدى. اۋىل اكىمدەرىنىڭ العاشقى ەسەبى تايىنشا اۋدانىنا قاراستى زەلەنىي گاي اۋىلدىق وكرۋگىندە ءوتتى. اتالمىش وكرۋگتىڭ اكىمى گۇلبارشىن باتەنوۆانىڭ ەسەبى جۇرتشىلىق كوڭىلىنەن شىقتى. ول ءبىر جىل ىشىندە اتقارىلعان جۇمىستاردى سارالاپ, الداعى مىندەتتەر جونىندە وي ءبولىستى. وكرۋگكە قاراستى زەلەنىي گاي, نوۆوگرەچانوۆ جانە جارقايىڭ اۋداندارىندا 2000-نان استام ادام تۇرادى. نيكولاي مازۋر, ۆيتالي چەرۆينسكي, بەكماعامبەت ءامىرحانوۆ وزدەرىن تولعانتقان ماسەلەلەرگە قاناعاتتانارلىق جاۋاپ الدى. اۋىل اكىمىنىڭ ەسەپ بەرۋ جيىنىنا وبلىس اكىمى سەرىك ءبىلالوۆ قاتىسىپ, مۇنداي كەزدەسۋلەر جەرگىلىكتى بيلىك پەن تۇرعىنداردى جاقىنداستىراتىنىن, پروبلەمالاردى بىرلەسىپ شەشۋدىڭ مۇمكىندىگى ارتاتىنىن اتاپ كورسەتتى. وبلىس بويىنشا 200-دەن استام وكرۋگتەردە اكىمدەردىڭ ەسەپتەرى تىڭدالاتىن بولادى.
ءومىر ەسقالي, سولتۇستىك قازاقستان وبلىسى.
بۇگىندە مەكتەپتەردىڭ ءوز كولىگى بار. بۇدان بىلاي قاراي ۇلىتاۋ اۋدانىنىڭ قورعاسىن, تەرىساققان, قاراقۇم, العاباس, ميبۇلاق اۋىلدارىنداعى ءبىلىم ۇيالارىنىڭ وقۋشىلارى اۋداندىق, قالالىق, وبلىستىق پاندىك بايقاۋلارعا, سپورتتىق, مادەني شارالارعا ارناۋلى اۆتوبۋسپەن بارا الاتىن بولدى. «مەكتەپتەر اۆتوبۋسى» باعدارلاماسى اياسىندا بەرىلگەن 12 ورىندىق ءۇر جاڭا «ۋاز» كولىكتەرى قاجەتتى ۋاقىتتا قالاعان جەرلەرىنە جەتكىزەدى. ونىڭ بىرەۋىن اۋداندىق ءبىلىم بەرۋ جانە دەنە تاربيەسى ءبولىمى دە يەلەندى. الداعى كەزدە وڭىردەگى بارلىق 18 مەكتەپ وسىنداي اۆتوبۋستارمەن قامتاماسىز ەتىلەدى. اۋىلدار اراسى الىس, ءىرى ەلدى مەكەندەردەن شالعاي ايماق مەكتەپتەرىنە بۇل ۇلكەن كومەك-قولداۋ بولىپ وتىر.
ايقىن نەسىپباي, قاراعاندى وبلىسى.
جاس وتباسىلارعا باسپانا بەرىلدى. يساتاي اۋدانىندا تۇراتىن ابزال يحسانوۆ 2008 جىلدان بەرى اۋداندىق ىشكى ىستەر بولىمىندە قىزمەت ەتەدى. بىلتىر ونىڭ وتباسىندا ەگىز ءسابي ومىرگە كەلىپ, ۇلكەن قۋانىشقا كەنەلگەن ەدى. ەندى, مىنە, جاس پوليتسەيدىڭ وتباسى جاڭا جىلمەن بىرگە تاعى ءبىر قۋانىش –قونىس تويىن تويلادى. جىل باسىندا باسپانالى بولۋ باقىتىنا سايرانگۇل بولەكوۆا دا يە بولدى. وسى اۋداندا پسيحولوگ ماماندىعىمەن جۇمىس جاسايتىن سايرانگۇلدىڭ وتباسىنا دا باسپانا كىلتى تابىستالدى. وتكەن اپتادا اۋدان اكىمى باقبەرگەن قاراباەۆ جاس وتباسىلارعا باسپانا كىلتتەرىن تابىستاپ, “جاس ماماندارعا پاتەرلەر كەزەكسىز بەرىلدى”, دەدى.
جولداسبەك شوپەعۇل, اتىراۋ وبلىسى.
باعدارلاما بالدىرعانداردى قۋانىشقا بولەدى. وبلىستا وڭتايلاندىرۋ كەزىندە جەكە ادامداردىڭ قولىنا وتكەن بالاباقشالاردى قايتارۋ جونىندە جۇمىس باستالعان ەدى. ونىڭ ناتيجەسى بۇگىن ايقىن كورىنىپ وتىر. ەڭبەكشىقازاق اۋدانىنداعى ەكى قاباتتى عيمارات جەكە كاسىپكەر نيكولاي مەلنيكوۆتىڭ قاراماعىندا بوس تۇرسا, ۇندەۋگە ءۇن قوسقان ول ونى جوندەپ, مەملەكەتتىك-جەكەمەنشىك سەرىكتەستىك نەگىزىندە «بولاشاق-2010» دەگەن اتاۋمەن مەكتەپكە دەيىنگى بۇلدىرشىندەر مەكەنىن اشتى. بالاباقشانىڭ اشىلۋ سالتاناتىنا اۋدان اكىمى ءاليحان تويباەۆ قاتىسىپ, بالالارعا بازارلىعىن الا كەلدى. ول بيىل تاعى دا مىڭنان استام ءبۇلدىرشىن بالاباقشا تابالدىرىعىن اتتايتىنىن جەتكىزىپ, ەلباسىنىڭ «بالاپان» باعدارلاماسىنىڭ مۇمكىندىگىنىڭ مول ەكەندىگىن اتاپ ءوتتى.
كۇمىسجان بايجان, الماتى وبلىسى.
ء«بىرجان-سارا» – مەرەيتويعا سىيلىق. وتكەن اپتادا وبلىس ورتالىعىنداعى جۇسىپبەك ايماۋىتوۆ اتىنداعى قازاق مۋزىكالى دراما تەاترى 20 جىلدىعىن اتاپ ءوتتى. تاۋەلسىزدىك جىلدارىمەن بىرگە ەسىك اشقان قازاق تەاترى بۇگىندە كوزايىم كورەرمەندەرى كوپ, قويىلىمدارى وي سالاتىن بەلگىلى ونەر ۇجىمىنا اينالدى. سوناۋ ەگيپەتكە دەيىن بارىپ, مىسىرلىقتارعا «ايمان-شولپاندى» كورسەتىپ قايتتى. بيىل تەاتر عيماراتى تولىق جوندەۋدەن ءوتىپ, ءىشى-سىرتى جاڭارىپ, جارقىراپ تۇر.ارتىستەر ساحنالاعان مۇقان تولەباەۆتىڭ ء«بىرجان-سارا» وپەراسى – ونەر ۇجىمىنىڭ جەتىستىگى. رەجيسسەرى – ەرسايىن تاپەنوۆ. وسى مەرەيتوي كۇنى وبلىس اكىمى باقىتجان ساعىنتاەۆ تەاتردىڭ ءبىر توپ ءارتىسىن قازاق ونەرىن دامىتۋعا قوسقان ۇلەستەرى ءۇشىن قۇرمەت گراموتالارىمەن ماراپاتتادى.
فاريدا بىقاي, پاۆلودار.
«قاۋىپسىز اۋىل» بايقاۋى وتكىزىلدى. زەلەنوۆ اۋدانىنىڭ اكىمى عايسا قاپاقوۆتىڭ باستاماسى بويىنشا «قاۋىپسىز اۋىل» بايقاۋى وتكىزىلدى. مۇنداعى باستى ماقسات – اۋىل تۇرعىندارىنىڭ تىنىشتىعى مەن قاۋىپسىزدىگىن قامتاماسىز ەتۋ. قوعامدىق ءتارتىپتىڭ مۇلتىكسىز ساقتالۋىنا قول جەتكىزۋ. بايقاۋ قورىتىندىسىنا سايكەس زەلەنوۆ اۋىلدىق وكرۋگى ەڭ قاۋىپسىز اۋىل دەپ تانىلدى. چۋۆاشينسك وكرۋگى – ەكىنشى, رازدولنىي ءۇشىنشى ورىندا. مۇندا ۋچاسكەلىك ساقشىلار – پوليتسيا اعا لەيتەنانتى رۋستام گۋسەينوۆ, كاپيتاندار قۋانىش قۇلداشەۆ, ولەگ رەزنيچەنكونىڭ اۋىل اكىمدەرىمەن بىرلەسىپ قىزمەت اتقارۋى وڭ ناتيجەگە قول جەتكىزۋگە مۇمكىندىك بەردى.
تەمىر قۇسايىن, باتىس قازاقستان وبلىسى.
