ەل بىرلىگى – ەڭ اسىل قاسيەت

الماتىداعى دوستىق ۇيىندە قازاقستان حالقى اسسامبلەياسى ەتنومادەني ءبىر­لەس­تىكتەرىنىڭ جەتەكشىلەرى جانە قحا مۇشەلەرى پارلامەنت ءماجىلىسىنىڭ دەپۋتاتتىعىنا وزدەرى ۇسىنعان كانديداتتارمەن كەزدەستى. اسسامبلەيادان دەپۋتاتتىققا كان­­ديدات 9 ادامدى قازاقستان حالقى اس­سام­بلەياسىنىڭ مۇشەلەرى جىلى شىراي­مەن قارسى الدى. كەزدەسۋدىڭ الدىن­دا V شاقىرىلعان پارلامەنت ءماجى­لىسىنىڭ دەپۋتاتى, جاڭا ءما­جىلىستىڭ قۇرامىنا كانديدات احمەد مۋرادوۆتى اڭگىمەگە تارتقان ەدىك. – ەڭ الدىمەن «ەگەمەن قازاق­ستان» رەسپۋبليكالىق گازەتى» اق-تىڭ ءتىل­شىسى ارقىلى گازەتتىڭ بارشا ۇجى­مىن باسىلىم باسشىسى ساۋىتبەك ابدراحمانوۆتىڭ قازاقستان حالقى اسسامبلەياسى اتىنان ءماجىلىس دەپۋ­تاتتىعىنا كانديدات بولىپ ءتۇسىپ جاتقانىمەن قۇتتىقتايمىن, – دەگەن احمەد سەيداراحمان ۇلى ويىن بى­لاي ساباقتادى. – بۇل وقيعانى ءبىز اسسامبلەيانىڭ ءبىر جەتىستىگى دەپ سانايمىز. ءبىزدىڭ ساكەڭ سەكىلدى ءتاجى­ري­بەلى, دايىندىعى زور ازاماتتار ءماجىلىستىڭ قۇرامىن ساياسي تۇرعىدان نىعايتىپ قانا قويماي, بەدەلىن ارتتىرادى دەپ سەنەمىن. اسسامبلەيا «تو­عىزدىعىنىڭ» قاتارىندا جۇرگەن ءۇش كانديدات – بىزدەر, وتكەن سايلاۋدىڭ دەپۋتاتتارىمىز. كەزدەسۋ دەپۋتاتتىققا كاندي­دات­تاردىڭ بولاشاق باعدارلامالارىن قىسقاشا تۇجىرىممەن تالقىعا ۇسىنۋىمەن باستالدى. «قازاقستان رەس­پۋبليكاسىنداعى سايلاۋ تۋرالى» كونستيتۋتسيالىق زاڭعا جانە «قا­زاقستان حالقى اسسامبلەياسى تۋرا­لى» زاڭعا سايكەس, 2016 جىلعى 26 اقپاندا قازاقستان حالقى اسسام­بلەياسىنىڭ كەڭەسى پارلامەنت ءماجى­لىسىنە دەپۋتاتتىققا قازاقستان حال­قى اسسامبلەياسىنان سايلاناتىن كان­ديداتتار – «ەگەمەن قازاقستان» رەس­پۋبليكالىق گازەتى» اق پرەزي­دەنتى ساۋىتبەك ابدراحمانوۆ, ىشكى ىستەر ءمينيسترىنىڭ ورىنباسارى, «ورىس, سلاۆيان جانە كازاك ۇيىمدارى قاۋىم­داستىعى» قب توراعاسىنىڭ ورىن­باسارى ۆلاديمير بوجكو, قى­زىلوردا قالاسى وقۋشىلار مەن جاس­وسپىرىمدەر ءۇيىنىڭ ديرەكتورى ناتاليا جۇمادىلداەۆا, «قازاقستان كورەي­لەرى قاۋىمداستىعى» قب ءتورا­عاسى, V شاقىرىلعان پارلامەنت ءما­جىلىسىنىڭ دەپۋتاتى رومان كيم, الماتى قالاسىنداعى «لۋيس» ارميان مادەنيەتى ورتالىعى» قب ءتورايىمى نارينە ميكاەليان, «ۆايناح» چەشەن جانە ينگۋش حالىقتارىنىڭ مادەنيەتىن دامىتۋ قاۋىمداستىعى» قب-نىڭ تەڭ توراعاسى, V شاقىرىلعان پارلامەنت ءماجىلىسىنىڭ دەپۋتاتى احمەد مۋرادوۆ, «قازاقستان ۇيعىر­لارى رەسپۋبليكالىق ەتنو­مادەني ورتالىعى» قب توراعاسى شايماردان نۋرۋموۆ, «رادا ۋكراينتسەۆ كازاحستانا» قب توراعاسى, V شا­قىرىلعان پارلامەنت ءماجى­لىسىنىڭ دەپۋتاتى يۋري تيموششەنكو, «دۇنگەن ەتنومادەني ورتا­لىق­تارى­نىڭ قاۋىمداستىعى» قب باس­قارما­سىنىڭ مۇشەسى شاكير حاحازوۆ كەزە­گىمەن مىنبەرگە كوتەرىلدى. ولار­­دىڭ ارقايسىسى قازاقستان حالقى اسسامبلەياسىنىڭ العاش شاڭى­­راق كوتەرگەن 1 ناۋرىزدىڭ پرەزي­دەنت جارلىعىمەن بيىلدان باستاپ العىس ايتۋ كۇنىنە اينال­عانىن زور ىقىلاسپەن اتاپ ءوتۋدى ۇمىت­پادى. قازاقستان ءۇشىن ەل ءبىرلى­گىنىڭ العاشقى ورىندا تۇرعانى, «ءماڭ­گىلىك ەل», «5 ينستيتۋتتىق رەفورمانى جۇزەگە اسىرۋ بويىنشا 100 ناقتى قادام» – ۇلت جوسپارى اياسىندا ءاربىر كانديدات بولاشاقتا وزدەرى اتقارار ءمىن­دەتتەر تۋرالى ناقتى اڭگىمە قوز­عادى. كەڭەس بارىسىندا, اسىرەسە, ۇزاق مەرزىمدى «قازاقستان-2050» سترا­تەگياسى جولىنداعى بۇگىنگى قازاق­ستاننىڭ «ءبىر حالىق – ءبىر ەل – ءبىر تاعدىر!» باعدارلاماسى تۋرالى, قا­زاقستان حالقىنىڭ ىنتىماعى مەن بىرلىگى, اسىرەسە, ەلباسىنىڭ ورال­داعى فورۋمدا ايتقان «ەل بىرلىگى – ەڭ اسىل قاسيەت!» دەگەن قاناتتى ءسوزى ءجيى قايتالاندى. ءسوز العان اسسامبلەيا مۇشەلەرى ءوز كانديداتتارىنا ەرتەڭ ەلىمىزدەگى جوعارى زاڭ شىعارۋشى ورگاننىڭ مىنبەرىنەن ەلدىڭ تۇتاستىعىن, حا­لىق­تىڭ بىرلىگىن نىعايتاتىن ماسەلەلەر كوتەرەدى دەگەن امانات ارتتى. كوپتەگەن قحا مۇشەلەرى كانديداتتاردى تاڭ­داۋدا قاتەلەسپەگەنىن, ولارعا جۇك­تەلەر زور مىندەتتىڭ لايىقتى جۇزەگە اساتىنىنا سەنىم ءبىلدىردى. بەلگىلى عالىم, تاريح عىلىم­دارى­نىڭ دوكتورى گەورگي كان كان­ديدات­تاردى قۇتتىقتاۋ سوزىندە بىلاي دەدى: – قازاقستان حالقى اسسام­بلەيا­سىنىڭ ەلباسى نۇرسۇلتان ءابىش­ ۇلى نازارباەۆتىڭ ءتول باستاماسى ەكەنىن وسىندا وتىرعان ءبارىمىز وتە جاقسى بىلەمىز. تاريح كوشى العا جىلجىعان سايىن قازاقستان قوعامى دا حال-قادەرىنشە ءپىسىپ-جەتىلىپ كە­لەدى. سىزدەر كۇنى ەرتەڭ جوعارى ءمىن­بەر­گە شىققاندا قازاقستان حالقى اسسامبلەياسىنان سايلانعان دەپۋتاتتار ەكەندەرىڭىزدى, ەڭ باستىسى – ۇلتتى ۇيىستىراتىن باعىتتاعى جەتەكشى ەكەندەرىڭىزدى, سونداي-اق, ەلباسىمىز ايتقان «ماڭگىلىك ەل» يدەياسى جارقىن بولاشاعىمىزدىڭ ايناسى ەكەنىن ۇمىتپاڭىزدار. كەڭەستى قورىتىندىلاعان الماتى قالاسى قحا توراعاسىنىڭ ورىنباسارى كازبەك مامسۋروۆ قازاقستان حالقى اسسامبلەياسىنان پارلامەنت ماجىلىسىنە كانديداتتارعا تابىس تىلەدى. تالعات ءسۇيىنباي, «ەگەمەن قازاقستان». الماتى.