قازاقتىڭ اتاقتى پالۋانى ابىلسەيىت ايحانوۆ قايتىس بولدى

استانا. 7 ناۋرىز. قازاق سپورتى ورنى تولماس قازاعا ۇشىرادى. كەشە, 6 ناۋرىز كۇنى قازاقتىڭ اتاقتى پالۋانى ابىلسەيىت ايحانوۆ 78 جاسقا قاراعان شاعىندا قايتىس بولدى. بۇل تۋرالى egemen.kz ءتىلشىسى حابارلادى. ابىلسەيىت رۇستەم ۇلى ايحانوۆ 1938 جىلى 15 ساۋىردە الماتى وبلىسىندا (بۇرىنعى تالدىقورعان وبلىسى) تۋعان. ەركىن كۇرەستەن اۋىر جانە جارتىلاي اۋىر سالماقتا بەلدەسكەن ول 1958-1969 جىلدار ارالىعىندا قازاقستان چەمپيوناتىن 11 رەت جەڭىپ الدى. سونداي-اق, كسرو حالىقتارى سپارتاكياداسىنىڭ جانە كسرو چەمپيونى (1963 ج.), كسرو كۋبوگىنىڭ يەگەرى (1970 ج.). 1958 جىلى حالىقارالىق دارەجەدەگى سپورت شەبەرى اتانعان پالۋان 1968 جىلى كسرو-نىڭ «قۇرمەت بەلگىسى» وردەنىمەن ماراپاتتالدى. 1963 جىلى قازاق مەملەكەتتىك دەنە شىنىقتىرۋ ينستيتۋتىن بىتىرگەن ابىلسەيىت ايحانوۆ قازاقستاندا سپورت سالاسىنىڭ دامۋىنا دا ولشەۋسىز ۇلەس قوسقان مامان. دەنە تاربيەسى تەورياسىنىڭ پروفەسسورى شاكىرت تاربيەلەۋدە دە وزىندىك ءىز قالدىردى. الەمنىڭ 50-دەن استام ەلىندە ونىڭ قۇرمەتىنە كسرو گيمنى شىرقالدى. سونداي-اق, ايحانوۆتىڭ ەسىمى ءۇش دۇركىن وليمپيادا چەمپيونى الەكساندر مەدۆەدتى جەڭگەن پالۋان رەتىندە دە تاريحتا جازۋلى تۇر. ەلامان قوڭىر. دەرەك: egemen.kz. سۋرەت: facebook.com.