ەندى فۋتبول ويىنىندا ءتورت ويىنشىعا دەيىن الماستىرۋعا بولادى

استانا. 6 ناۋرىز. فۋتبول قاۋىمداستىقتارىنىڭ حالىقارالىق كەڭەسى (يفاب) اتالعان سپورت تۇرىنە قاتىستى بىرقاتار جاڭا ەرەجە قابىلدادى. بۇل تۋرالى euronews.com-عا سىلتەمە جاساعان egemen.kz ءتىلشىسى حابارلادى. اتاپ ايتقاندا, ۇيىمنىڭ اتقارۋشى كوميتەتى ويىن كەزىندە تالاس تۋدىرعان جاعدايدى بەينەقايتالاۋدان قاراپ, شەشىم شىعارۋدى سىناقتان وتكىزۋدى ماقۇلدادى. سونداي-اق, «ءۇش ەسە جازالاۋ» دەپ اتالىپ كەتكەن, جازا ءتۇرىن جەڭىلدەتۋ جانە قوسىمشا ۋاقىتتا ءتورتىنشى ويىنشىنى الماستىرۋعا رۇقسات بەرۋ ماسەلەلەرى دە ءوز شەشىمىن تاپتى. جاڭا ەرەجەلەر تۋرالى فيفا پرەزيدەنتى دجانني ينفانتينو: «ءبىز فۋتبول ءۇشىن تاريحي شەشىمدەردى قابىلدادىق. بۇگىندە فيفا مەن يفاب ۇزاق ۋاقىتتان بەرى شەشىمىن تاپپاي كەلە جاتقان ماسەلەلەرگە بايلانىستى پىكىرتالاستار جۇرگىزۋدە. وسى رەتتە ءبىز ءبىرىنشى كەزەكتە جانكۇيەرلەر مەن ويىنشىلاردىڭ پىكىرلەرىنە قۇلاق اساتىنىمىزدى ايتقىم كەلەدى. ءبىز وتە وزەكتى ماسەلەنى قولعا الدىق. تەحنولوگيانىڭ كۇن ساناپ دامىپ, جاڭارىپ جاتقانىنا كوز جۇمىپ قاراۋعا بولمايدى. الايدا, بۇل اتالعان شەشىمدەردىڭ ءبارى بىردەن جۇمىس ىستەپ كەتەدى دەگەن ءسوز ەمەس. اتالعان ەرەجەلەر ازىرگە سىناق رەتىندە قولدانىلادى. ويتكەنى, فۋتبولدىڭ وزىندىك بوياۋى مەن ەرەكشەلىگىن ساقتاۋ كەزىندە اسا ساقتىقپەن قيمىلداۋىمىز كەرەك», – دەدى. بەينەقايتالاۋ سىناعى ەكى جىل كولەمىندە ءارتۇرلى چەمپيوناتتاردا تاجىريبەدەن وتكىزىلەدى. ول نەگىزىنەن قاقپاعا دوپتىڭ ەنگەندىگى تۋرالى, ويىنشىنى الاڭنان قۋعاندا, پەنالتي بەلگىلەگەن ساتتە جانە تورەشىنىڭ فۋتبولشىنى انىقتاۋ بارىسىندا جىبەرگەن قاتەلىگىنە بايلانىستى تۋعان تالاس كەزىندە قولدانىلادى. ودان بولەك, ەڭ قاتاڭ ەرەجە – «ءۇش ەسە جازالاۋ» دا جەڭىلدەيتىن بولادى. ەندى بۇرىنعىداي قاتار قولدانىلاتىن پەنالتي, ويىنشىنى الاڭنان قۋ جانە بىرنەشە ويىننان شەتتەتۋ (ديسكۆاليفيكاتسيا) جازاسى, تەك قىزىل قاعاز بەن ون ءبىر مەترلىكتەن تۇرادى. ال ويىنشىنى الماستىرۋ ماسەلەسىندە وسىعان دەيىنگى نەگىزگى ۋاقىتتا ءۇش ويىنشىعا دەيىن اۋىستىرۋ مۇمكىندىگى ساقتالىپ قالدى. تەك قوسىمشا ۋاقىتتا عانا ءتورتىنشى ويىنشىنى الاڭعا شىعارۋعا رۇقسات بەرىلەدى. ەلامان قوڭىر. دەرەك: euronews.com. سۋرەت: sport-express.ru.