عالىمدار زيكا بەزگەگىنىڭ قۇرساقتاعى بالاعا قالاي اسەر ەتەتىنىن انىقتادى

استانا. 5 ناۋرىز. اقش عالىمدارى زيكا بەزگەگىنىڭ سالدارىنان سابيگە بەرىلەتىن ميكروتسەفاليانىڭ قالاي جۇزەگە اساتىنىن انىقتادى. بۇل تۋرلى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. عالىمدار زەرتتەۋ جۇمىستارى كەزىندە ۆيرۋس باس مي جاسۋشاسىنىڭ قابىعىن زاقىمدايتىنىن انىقتادى. وسىنىڭ سالدارىنان ماڭىزدى جاسۋشالار جويىلادى. «ءبىزدىڭ انىقتاعانىمىز شىندىققا ساي كەلەدى. العاش بولىپ بۇل ءىستى ءبىز انىقتادىق. ۆيرۋستىڭ ماڭىزدى جاسۋشالارعا زيان تيگىزەتىنى بەلگىلى بولدى», – دەدى فلوريدا مەملەكەتتىك ۋنيۆەرسيتەتىنىڭ مامانى حەنگلي تانگ. بۇگىندە زيكا بەزگەگىن جۇقتىرعان جۇكتى ايەلدەردەن ميكروتسەفاليا اۋرۋىمەن دۇنيەگە كەلگەن سابيلەر كوبەيىپ بارا جاتىر. ميكروتسەفاليانىڭ زيانىن انىقتاعانىمەن, ونىڭ قالاي جۇزەگە اساتىنى بەلگىسىز بولاتىن. فلوريدا ۋنيۆەرسيتەتىنىڭ, دجون حوپكينس اتىنداعى ۋنيۆەرسيتەتتىڭ جانە ەموري ۋنيۆەرسيتەتىنىڭ عالىمدارى ارنايى لابوراتوريادا تاجىريبە جۇمىستارىن جۇرگىزدى. زەرتتەۋدىڭ ناتيجەلەرى عىلىمي Cell Stem Cell باسىلىمىندا جاريالاندى. زيكا بەزگەگى – مايمىلداردىڭ جۇقپالى اۋرۋى بولىپ ەسەپتەلەدى. ادامدار اراسىنا ماسالار ارقىلى تارايدى. ايان ءابدۋالي. دەرەك, سۋرەت: تاسس.