مايدانگەر ماراپاتتارى قىزىنىڭ قولىنا تاپسىرىلدى

وتكەن جىلى اتىراۋ پولي­تسەي­لەرى 16 وردەن مەن مەدالدى, وعان قوسا, ەكى توسبەلگىنى قالاداعى كولىك گاراجىنان تاۋىپ الىپتى. اراسىندا قىزىل جۇلدىز, دانق وردەندەرى مەن «ەرلىگى ءۇشىن», «ەڭبەك ارداگەرى» جانە باسقا دا مەدالدار بولعان. الايدا, بىلتىر قۇقىق قورعاۋ ورگاندارىندا مۇنداي ماراپاتتاردىڭ ۇرلانعانى تۋرالى دەرەك تىركەلمەگەن بولىپ شىقتى. سوعان قاراماستان, پوليتسيا قىزمەتكەرلەرى ماراپاتتارداعى نومىرلەرگە بايلانىستى كىمگە تيەسىلى ەكەنىن انىقتادى. الدىمەن بۇدان ءۇش جىلداي بۇرىن جىلىوي اۋداندىق ىشكى ىستەر بولىمىنە قۇلسارى قالاسىنىڭ 7-اۋىلىن­دا تۇراتىن تۇرعىننان شاعىم تۇسكەنى بەلگىلى بولدى. وندا شاعىم بەرۋشى مايدانگەر اكەسىنىڭ سوعىس جىلدارىندا العان ماراپاتتارى مەن 200 مىڭ تەڭگەسى ۇرلانعانى ايتىلعان. شاعىمدا كورسەتىلگەن جانە تابىلعان ماراپاتتارداعى نومىرلەر ءبىر-بىرىمەن سايكەستىگى تەكسەرىلدى. ءسويتىپ, پوليتسەيلەر ومىردەن ءوتىپ كەتكەن مايدانگەردىڭ ۇرلانعان ماراپاتتارىن قىزىنا قايتارىپ بەردى. سەبەبى, مايدانگەردىڭ قىزى ماراپاتتاردىڭ اكەسىنە تيەسىلى ەكەنىن راستايتىن قۇجاتتاردى ۇسىنىپتى. جولداسبەك شوپەعۇل, «ەگەمەن قازاقستان». اتىراۋ.