جايىقتاعى جۇزدەسۋلەر

تاڭ سىبىرلەپ اتىپ, ونىڭ اق سامالاداي جارىعى مولايا تۇسكەن كەزدە ورال ستانساسىنا «ماڭگىلىك ەل» الەۋمەتتىك پويىزى كەلىپ توقتادى. كوكتەمنىڭ العاشقى كۇندەرىنەن باستالعان ماي توڭعىسىز جىلىلىق پويىز شتابى مۇشەلەرىنىڭ دە, ولاردى قارسى الۋشىلاردىڭ دا كوڭىلدەرىن كوككە كوتەرە تۇسكەندەي ەدى. الدىڭعى كۇندەرى ورال ءوڭىرى­نىڭ قالاسى مەن دالاسىنداعى تۇر­عىن­داردى دىردەكتەتىپ جىبە­رە جاز­داعان وكپەك جەل دە ساپ تىيى­­لىپتى. «اقجايىققا قوش كەل­دىڭىز­دەر!» – دەدى جالپىرەسپۋب­ليكالىق اكتسياعا قاتىسۋشىلاردى جىلى جۇزبەن قارسى العان ۇلكەن توپتىڭ كوشباسشىسى, باتىس قازاقستان وبلىسى اكىمىنىڭ ورىنباسارى باقتيار ماكەن. تەمىرجول ۆوكزالىنىڭ پەررونىندا سول ساتتە باستالىپ كەتكەن ميتينگتە «ماڭگىلىك ەل» الەۋمەتتىك پويىزى شتابىنىڭ باسشىسى ءامىرجان الپەيىسوۆ ءسوز الىپ, الدا تۇرعان ماقساتتار جونىندە جان-جاقتى ايتىپ بەردى. ءبىزدىڭ باستى مىندەتىمىز دە, باس­تى پارىزىمىز دا كەڭ-بايتاق ەلىمىزدىڭ تۇكپىر-تۇكپىرىندەگى الەۋمەتتىڭ جاي-كۇيىمەن تانىسۋ. قىسىلعانعا قولۇشىن بەرۋ. ءومىردىڭ سان-الۋان تولعاعى جەتكەن ماسەلەلەرىنە قاتىستى شتاب مۇشەلەرى ورتاعا تاستايتىن پايدالى كەڭەستەر دە ەشكىمدى بەي-جاي, سەلسوق قالدىرا المايتىنىنا كۇمانىمىز جوق. باسى اۋىرىپ, بالتىرى سىزداعانعا دا الەۋمەتتىك پويىز قۇرامىنداعى دەنساۋلىق ساقتاۋ جانە الەۋمەتتىك دامۋ مينيسترلىگى ماماندارىنىڭ بەرەتىن كومەگى ءازىر, دەدى ول. كوپ كەشىكپەي الەۋمەتتىك پويىز قۇرامىنداعى ءارتۇرلى سالا وكىلدەرى بىرنەشە توپقا ءبولىنىپ, ءوز قىزمەتتەرىنە كىرىسىپ تە كەتتى. وسىناۋ اۋقىمدى, الىمدى دا شالىمدى, سۇيەكتى دە سالماقتى, ءماندى دە ماڭىزدى جالپىحالىقتىق شىرايلى شارا قازاقستاننىڭ ازاماتتىق اليانسىنىڭ باستاماشى ءارى ۇيىتقى بولۋىمەن بۇكىل ەل-جۇرتقا شاپاعاتىن تيگىزۋدە. بۇگىندە رەسپۋبليكاداعى ۇكىمەتتىك ەمەس ۇيىمداردىڭ قىزمەتىندە جاڭاشا ءبىر سەرپىلىس پايدا بولعانىن ەشكىم جوققا شىعارا المايدى. ولاردىڭ ۇندەرى دە ايقىن, ىستەرى دە ىزگىلىكتى بولا باستادى. ازاماتتىق قوعام ينستيتۋتى – تۇتاستاي مەملەكەتىمىزدىڭ ۇيلەسىمدى تۇردە دامۋىنا سەپتىگىن تيگىزە الاتىن تەڭدەسى جوق قۇرىلىم. وسى مۇمكىندىكتى ءتيىمدى تۇردە پايدالانساق كوپ نارسەدەن ۇتا الامىز, دەدى «ماڭگىلىك ەل» الەۋمەتتىك پويىزى قۇرامى مۇشەلەرىمەن كەزدەسۋ ساتىندە باتىس قازاقستان وبلىستىق ازاماتتىق اليانسى قاۋىمداستىعىنىڭ ءتورايىمى ءاليا ساليەۆا. بۇل پىكىر «قازاق­ستاننىڭ ازاماتتىق اليانسى» زتب ديرەكتورى يلدار كاتەنوۆ تاراپىنان دا قولداۋ تاپتى. جاستار – ەركىن ەلدىڭ ەرتەڭى. بيىلعى تاۋەلسىزدىكتىڭ شيرەك عاسىرلىق مەرەيلى مەرەكەسى جىلى سول جىلى دۇنيەگە كەلگەن سابيلەر باياعى بابالارىمىز قايران, جيىرما بەس, قايران جاستىق دەپ كۇرسىنەتىن, كۇرسىنە وتىرىپ, جىگەرلەنەتىن جاسقا جەتىپ وتىر. سوندىقتان دا بولسا كەرەك «ماڭگىلىك ەل» الەۋمەتتىك پويىزى شتابىنىڭ بەلدى دە بىلىكتى ساراپشىلارى, سونىڭ ىشىندە قر ءبىلىم جانە عىلىم مينيسترلىگىنىڭ ماقسات ءماجيتوۆ, ارداق بەگاتاروۆ, الماس جۇمابەكوۆ سىندى باس ساراپشىلارى ءوڭىر جاستارىمەن كەزدەسىپ, ەمەن-جارقىن پىكىر الماستى. بۇل ۇنقوسۋ ەكى جاققا دا پايدالى بولعانىن بايقادىق. ال باتىس قازاقستان وبلىستىق جاستار رەسۋرسى ورتالىعىنىڭ باسشىسى كەنەسارى نۇرشينوۆ پەن پويىز قۇرامىنداعى ساراپشىلار اراسىندا بولعان اڭگىمە دە جاقسى جەلىسىن تاپتى. اتاپ ايتقاندا, اتالعان ورتالىقتىڭ باستاماسىمەن تاۋەلسىزدىكتىڭ جيىرما بەس جىلدىق مەرەكەسى قۇرمەتىنە جىل اياعىنا دەيىن «100 ناقتى كومەك» كەشەندى ءىس-شاراسى ۇيىمداستىرىلىپ وتىر ەكەن. بۇل مەملەكەتتىك دەڭگەيدە ىسكە اسىرىلىپ جاتقان «100 ناقتى قادامنىڭ» كىشكەنە ءبىر بولشەگىندەي اسەر قالدىردى. ياعني, وسى اتالعان «100 ناقتى كومەك» اياسىندا جاستاردى قوعامدىق ومىرگە بەيىمدەۋ, ماماندىقتارىن دۇرىس تاڭداپ, دۇرىس مەڭگەرۋ, جۇمىسقا ورنالاستىرۋ, باسپاناعا قول جەتكىزۋگە قاجەتتى العىشارتتار جاساۋ سەكىلدى سان الۋان كومەكتەر ءتۇرى كورسەتىلمەك. قايسىبىرىن ايتارسىڭ, ايتا بەرسە, تىزە بەرسە, «ماڭگىلىك ەل» الەۋمەتتىك پويىزى قۇرامى مۇشەلەرىنىڭ وبلىستىڭ ەل-جۇرتىنا, اقجايىقتىڭ قىرى مەن ويىنا تيگىزىپ كەتكەن شاپاعاتىنا ەشقانداي باعا جەتپەيدى. ەشقانداي ءسوز جەتپەيدى. ونىڭ باستى ميسسياسى جوعارىدا پويىز شتابىنىڭ باسشىسى ءامىرجان الپەيىسوۆ اتاپ وتكەندەي, ىزگىلىك, ناقتى تۇرعىندارعا – ناقتى كومەك, قايىرىمدىلىق, قامقورلىق, ايالى الاقان جىلۋى, دەدى جايدارى جۇزبەن ءى توپتاعى مۇگەدەك, ورال قالاسىنىڭ تۇرعىنى بەيسەنباي ايدىنعاليەۆ ورتوپەد مامان ناعمەت مۇرسالوۆتىڭ قابىلداۋىنان كەيىن. ونىڭ وسى پىكىرى الەۋمەتتىك پويىز ساپارىنىڭ باستى ءمانىن اشىپ بەردى دەپ ايتۋعا تولىق نەگىز بار. تەمىر قۇسايىن, «ەگەمەن قازاقستان». ورال.