الەمدى جاياۋ ارالاپ ءجۇر

جۋىردا جەر ءجۇزىن جاياۋ ارالاپ جۇرگەن ساياحاتشىلار كەنتاۋ قالاسىنا كەلدى. وزدەرىن كيليان مەن تەرري دەپ تانىستىرعان فرانتسۋز ازاماتتارى بۇل سايا­حات­تارىن 2008 جىلدىڭ 7 ما­مى­رىن­دا فرانتسيا جەرىنەن باستاپ­تى. سودان بەرى ەكى جىل ىشىندە فرانتسيا, يتاليا, سلوۆەنيا, حور­­ۆاتيا, بوسنيا, البانيا, گرەتسيا, تۇركيا, ءازىر­باي­جان سەكىلدى ەلدەردى جاياۋ ءجۇرىپ وتكەن ولار قازىر قازاقستان جەرىندە ءوز ساياحاتتارىن جالعاس­تىرۋدا. ماقساتىمىز – دۇنيە ءجۇزىن جاياۋ ارالاپ شىعۋ دەگەن كيليان مەن تەرري قازاق حالقىنىڭ قو­ناق­جايلىلىعىنا ءتانتى بو­لىپ­تى. «وزگە ەلدەردەگىدەي ەمەس, مۇندا كەزدەسكەن ەلدى مەكەندەردە قوناقتى ۇيىنە شاقىرىپ, تاماق بەرۋگە قاتتى كوڭىل بولەدى ەكەن», – دەدى بۇل جونىندە كيليان. ساياحاتشىلار جول-جونەكەي كوپتەگەن قىزىقتى وقيعالارعا تاپ بولىپتى. سونىڭ ءبىرى – ەنەسى قايتىس بولعان ايۋدىڭ قونجى­عىن اسىراۋى. قونجىق قاشان ءوز ازىعىن تاۋىپ جەي الاتىن كەزگە جەتكەنشە ساياحات­شىلار قولدان قورەكتەندىرىپ كەلگەن. سونداي-اق, تۇركيادا جەر بەتىن جاياۋ ارالاۋعا ءۇمىت­كەرلەر كيليان مەن تەرريدىڭ قاستارىنا ەرگەن. دەگەنمەن دە, جولدىڭ قيىندىعى­نان جانە شەكارا­داعى ۆيزا تەكسەرۋ با­رى­سىندا قۇجاتتاردىڭ دۇ­رىس بولماعان­دىعىنان ولار­دىڭ كەرى قايتۋى­نا تۋرا كەلگەن. ساياحاتشىلار ءار مەملەكەتتەن وتكەن سايىن سول ەلدىڭ ءتىلىن ءۇي­رەنۋگە تالپىنادى ەكەن. قا­زىرگى كەزدە قازاق تىلىندەگى كۇندە­لىكتى قولدا­نا­تىن سوزدەردى جاتتاپ تا الىپتى. قازاقستانداعى اقتاۋ, بەينەۋ, قۇلسارى, جەزقازعان, قى­زىل­وردا, تۇركىستان باعىتىمەن كەلگەن ساياحاتشىلار ەندى اششى­ساي, شايان جەرىن ءجۇرىپ ءوتىپ, قاراتاۋ بويى­مەن تاراز, ال­ماتى جولدارى ارقىلى قىتاي ەلىنە وتپەك. جالپى ساياحات بارىسىندا ولار 35 مەملەكەتتى ارالاماق كورىنەدى. قايرات زاينيشەۆ. وڭتۇستىك قازاقستان وبلىسى, كەنتاۋ قالاسى.