تۋعان جەردىڭ ءتۇتىنى

مەملەكەتتىك سىيلىقتىڭ لاۋرەاتى, جازۋشى ورازبەك سارسەنباي ءوزىنىڭ تۋعان ولكەسى – سىر بويىندا جەرلەستەرىمەن جۇزدەستى. ەل اعالارىنىڭ جانە شيەلى اۋدانى جۇرتشىلىعىنىڭ شاقى­رۋى­مەن تۋعان جەرىنە بارعان قالامگەر مۇنداعى اۋىزبىرشىلىككە ءسۇيسىنىپ, زامانا اعىمىنا قاراي ۇندەسە ەڭبەك ەتكەن شيەلىلىك­تەردىڭ ءار سالاداعى جەتىستىكتەرىنە ريزاشىلىعىن ءبىلدىردى. اۋداندىق مادەنيەت ۇيىندە «كوركەمسوزدىڭ كورنەكتى شەبەرى –ورازبەك سارسەنباي» ايدارىمەن اشىلعان القالى جيىندا اۋدان اكىمى نۇرلىبەك نالىباەۆ ءسوز سويلەپ, كەمەلىنە كەلگەن جازۋ­شىنى وقىرماندارىمەن بۇگى­نگى قاۋىشۋى­مەن شىن جۇرەكتەن قۇتتىقتادى. اۋدان باسشىسى قا­لامگەردىڭ جەتىستىكتەرىنە توقتا­لىپ, الداعى شىعار­ما­­­شىلىق ءومى­رىنە تابىس تىلەدى. قازاقستان جازۋشىلار وداعى­نىڭ حاتشىسى, «سىن» جۋرنا­لىنىڭ باس رەداكتورى باقىت سار­با­لاەۆتىڭ جازۋشى شىعار­ماشى­لىعىنا ارنالعان بايانداماسى جۇرت­شىلىقتى ونىڭ ادەبي مۇرا­سىنا تاعى ءبىر ساياحات جاسا­تىپ, جاقسى اسەرگە بولەدى. وقىرمانداردىڭ بىرقاتار ساۋال­­دارىنا جاۋاپ بەرگەن قالام­گەر دە اعىنان جارىلدى: «شىعارماشى­لىق كەزەڭىمدە وتىزشاقتى كىتاپ جازسام, سونىڭ دەنى تۋعان جەرىمدە جازىلدى. وسى ورتاداعى ادامدار ءومىرى شىعارمالارىما ارقاۋ ەتىلدى. بيلىك باسىنداعىلاردان قا­شىق­تاۋ جۇرەتىن ادەتىممەن ءوزىم وسكەن ورتامدا بۇرىن رەسمي كەزدەسۋ وتكىزۋگە ق ۇلىقتى ەمەس ەدىم. ەلگە كەلۋىمە قولقا سالىپ, جەرلەس­تەرىمنىڭ شىن ىقىلاسىنا بولەگەن جاناشىر­لارى­ما ريزا­مىن. مەنىڭ قارۋىم – قول­داعى قالامىم, شامام كەلگەنىنشە جاقسى شىعار­مالارىمدى وزدەرى­ڭىز­­گە ارناي بەرەمىن», – دەدى ول. وسى كۇنى ورازبەك سارسەنباي­دىڭ قاتىسۋىمەن شيەلى اۋ­دانىندا بىرنەشە الەۋمەتتىك نى­ساندار حا­لىقتىڭ پايدا­لانۋى­نا بەرىلدى. اۋەلى جازۋ­شى ورازبەك سارسەن­باي­دىڭ تۋعان اۋىلى باي­سىن اۋىلىندا جالپى جوبالىق قۇنى 183 ملن. تەڭگە بولاتىن باس سۋ قويماسى جانە 7,5 شا­قىرىمدىق اۋىلىشىلىك تازا اۋىز سۋ تاراتۋ تورابى ىسكە قوسىل­سا, كە­ڭەستىك كەزەڭدە الەۋ­مەتتىك قامقور­لىق اياسىنان تىس قالىپ كەلگەن جيدەلىارىق اۋى­لىن­دا №206 ورتا مەكتەپتىڭ ەكى قاباتتى جاڭا ۇلگىدە سالىنعان عيماراتى پايدا­لانۋعا بەرىلدى. شيەلى كەنتىندەگى ساناتو­ريا­لىق تيپتەگى «شۇعىلا» بالالار باق­شا­سى دا وسى كۇنى اشىل­دى. بۇل الەۋمەتتىك نىساندار­دىڭ دا لەنتا­سىن جەرلەس جازۋشى ورازبەك سارسەنباي قيدى. شيەلىنىڭ الاشتىڭ ارداقتى­سى مۇستافا شوقايدىڭ تۋعان جەرى ەكەندىگى بەلگىلى. قازاق ازامات­تارى­نىڭ اراسىندا پەتەربوردىڭ زاڭ ۋني­ۆەرسيتەتىن تۇڭعىش بىتىرگەن مۇس­تافا شوقايدى ادىلدىكتىڭ اق تۋىن جوعارى ۇستاعان قايرات­كەر رەتىندە زاڭ قىزمەتكەرلەرى ۇلگى تۇتادى. مىنە, وسى كيەلى مەكەندەگى وتكەن جىلى عانا پايدالانۋعا بەرىلگەن اۋداندىق سوتتىڭ جاڭا عي­ما­راتىن­دا ونىڭ قۇجاتتارى مەن قاستەرلى زاتتارى قويىلعان مۇرا­جاي ورنا­لاسقان. ونى ۇيىم­داس­تىرۋشى اۋ­دان­دىق سوت توراعاسى ساعاتبەك سۇلەيمەنوۆ دەگەن ەل­جان­دى ازامات. اتالمىش مۇرا­جاي­دى ارالاپ كور­گەن جازۋشى و.ءسار­سەنباي زاڭگەر­لەردىڭ الاش ارداقتىسىن ۇلگى تۇتقان پەيىلدەرىنە ريزاشىلىعىن ءبىلدىردى. ەلتاي نۇرماحان. قىزىلوردا وبلىسى, شيەلى اۋدانى.