ەسىكتە اۋرۋحانا اشىلدى

مەملەكەتتىك  ساياساتتىڭ باستى باعىتتارىنىڭ ءبىرى – حالىقتىڭ دەنساۋلىعىن قورعاۋ مەن وعان دەگەن ىنتىماقتى جاۋاپكەرشىلىك جۇگىن نىعايتۋ. دەنساۋ­لىق ساقتاۋ نىساندارىن سالۋ, جابدىقتاۋ, كادر دايارلاۋ, سالاماتتى ءومىر سالتىن قالىپتاستىرۋ جونىندەگى شارالار كەشەنى ۇزدىكسىز جالعاسقانى – وسىنىڭ ناقتى دالەلى. «سالاماتتى قازاقستان» باعدارلاماسى اياسىندا قولعا الىنعان جۇمىستار جالعاسىپ, جۋىردا ەڭبەكشىقازاق اۋدانىنداعى ەسىك قالاسىندا 250 توسەكتىك اۋرۋحانا مەن كۇنىنە 500 ادامدى قابىلداپ, دارىگەرلىك تەكسەرۋدەن وتكىزەتىن ەمحانا اشىلدى. «100 مەكتەپ, 100 اۋرۋحانا» باعدارلاماسى اياسىن­دا قانشاما جاڭا قۇرىلىس سالىندى. سولاردىڭ قاتا­رىن­داعى اتالعان كوپ قاباتتى عيمارات ەكى جارىم جىل­دا تولىق  اياقتالىپ, جاڭا ۇلگىدەگى شەتەلدىك مە­دي­تسينالىق تەحنولوگيالارمەن جابدىقتالدى. كەشەندى دەنساۋلىق ساقتاۋ ورنىنداعى تەراپيا, جۇيكە اۋرۋلارى, جۇرەك, بۇيرەك, حيرۋرگيا, جۇقپالى اۋرۋلار, تاعى باسقا بولىمدەر 40 توسەككە دەيىن جەتكىزىلىپ, ەم­دەۋ­شىلەردىڭ ساۋىعىپ شىعۋىنا بىلىكتى  دارىگەرلەر قامقورلىق جاسايتىن بولدى. سونىمەن قاتار, بالالار اۋرۋحاناسى دا بالعىنداردىڭ دەنساۋلىعىنا دەگەن قامقورلىقتى ۇزدىكسىز جالعاستىرماق. جاڭا اۋرۋحانانىڭ اشىلۋىنا قاتىسقان وبلىس اكىمى سەرىك ۇمبەتوۆ وتكەن جىلدان بەرى ەنگىزىلگەن بىرىڭعاي ۇلتتىق دەنساۋلىق ساقتاۋ جۇيەسىنىڭ ماڭىزدىلىعىنا توقتالىپ, حالىقتىڭ دەنساۋلىعى, انا مەن بالا ءومىرىن ساقتاۋ سالا ماماندارىنىڭ  نەگىزگى مىندەتى  ەكەنىن ايتىپ, جاۋاپكەرشىلىكتى ارتتىرۋدى تاپسىردى. كوپشىلىك اتىنان دەنساۋلىق ساقتاۋ سالاسىنىڭ ۇزدىگى, دارىگەر گۇلجان ومەكوۆا ءاردايىم انتقا لايىق بەرىكتىكپەن ەڭبەك ەتەتىندىكتەرىن جەتكىزىپ, ەلباسىنا جەرلەستەرىنىڭ اتىنان العىسىن ايتتى. «سترويمپەكس-استانا» سەرىكتەستىگىنىڭ اتقارۋشى ديرەكتورى اباي شالديبەكوۆ اۋداننىڭ باس دارىگەرى بولات بالاقويشەۆكە اۋرۋحانا كىلتىن تاپسىردى. كۇمىسجان بايجان. الماتى وبلىسى.