التىن قولدى ادام

 اقتوبەلىك كونستانتين پاشاەۆ­تىڭ شاعىن شەبەرحاناسىن قولونەر بۇيىمدارىنىڭ كورمەسى دەۋگە بولادى. ول سوڭعى ون جىلدىڭ ىشىندە قالدىق اعاشتاردان 200-دەن استام ءمۇسىن جاساپ شىعارعان. شەبەر جاساعان كادەسىيلار دوستارى مەن كورشىلەرىنىڭ كوڭىلدەرىنەن شىعىپ ءجۇر. سونداي-اق, اعاش ۇستاسى ءوزى قاشاپ, جەلىمدەپ جاساعان مۇسىندەردەن كوللەكتسيا جاساۋدى دا ۇمىتپايدى. كەزىندە قۇرىلىس سالاسىندا ەڭبەك ەتكەن كونستانتين گەورگيەۆيچ اتالعان بۇيىمداردى جاساۋعا نەگىزىنەن جەمىس-جيدەك سالاتىن اعاش جاشىكتەرىن پايدالانادى. ونىڭ قولىنا تۇسكەن اعاشتار ومىرگە ەكىنشى رەت جولداما الىپ, باسقا تۇرگە ەنىپ, اسەم ءمۇسىن بولىپ شىعا كەلەدى. اعاش مۇسىندەر يدەياسى دا اياق استىنان ويىنا ساپ ەتە تۇسەدى. جاڭالىقتاردان ەلىمىزدە ەرلى-زايىپتىلار اراسىندا اجىراسۋلار كوپ ەكەنىن ەستىپ ەدى, شەكسىزدىك سيمۆولىن جاساي قويدى. كەزەكتى كىتاپتى پاراقتاپ وتىرىپ, ونىڭ باستى كەيىپكەرلەرىن جاساۋعا كوڭىلى كەتتى. ەلىمىزدىڭ كەدەندىك وداققا كىرگەنىن ەستىسىمەن, قازاق­ستاننىڭ, رەسەيدىڭ جانە بەلا­رۋستىڭ مەملەكەتتىك تۋلارىمەن ورنەكتەلگەن اعاش ءمۇسىنى پايدا بولدى. مىنە, قارت اعاش شەبەرى جاسايتىن مۇسىندەردىڭ نەگىزگى جەلىسى وسىلاي تۋىپ جاتادى. سەكسەننىڭ سەڭگىرىنەن اسقان شەبەر ارەكەتسىز وتىرا المايدى, قاشاندا قولىنان اراسى مەن قاشاۋى تۇسپەيدى. كانىگى قۇ­رىلىسشى رەتىندە بارلىق اعاشتاردىڭ ساپاسىن دا ءبىر كىسىدەي اجىراتا الادى. ال مۇسىندەر جا­ساۋعا قاجەتتى جەمىس-جيدەك سالاتىن اعاش جاشىكتەرىن اعاشتان ءتۇيىن تۇيگەن قارتقا تاياۋ ماڭداعى دۇكەندەردىڭ وزدەرى ۇسىنادى. ولار­دى كەپتىرەدى, كەسەدى, شيكىزات دايىندايدى, سودان كەيىن وزىنە قاجەتتى كومپوزيتسيانى جينايدى. – سوڭعى جىلدارى شيكىزات تابۋ قيىنداپ كەتتى. سەبەبى, شەتەلدەن جەتكىزىلەتىن جەمىس-جيدەكتەر بۇرىنعىداي اعاش ەمەس, پلاستيك جاشىكتەرمەن اكەلىنەدى. الايدا, شيكىزات قورىم ازىرگە جەتەدى. ەڭ باستىسى, اعاشتان قيۋلاستىرىپ جاساعان كادەسىيلارىم ادامدارعا ۇناسا بولعانى. مەن ءار ءمۇسىندى شىن جۇرەگىممەن بەرىلىپ جاسايمىن, – دەيدى كونستانتين پاشاەۆ. زەينەتكە شىقسا دا, ەڭبەكتەن قالماعان قارتتىڭ بۇل قادامى تەك ءوزىن عانا قاناتتاندىرىپ قوي­مايدى, اينالاسىنداعىلارعا دا قۋانىش سىيلايدى. سوندىقتان بولار, ول قولىنان شىققان ءمۇسىن­دەردىڭ كوز تارتارلىق بولۋىنا كوپ كوڭىل بولەدى. ساتىبالدى ءساۋىرباي, «ەگەمەن قازاقستان». اقتوبە وبلىسى.