جامبىل وبلىسىندا زاماناۋي قۇس فابريكاسى اشىلادى

تاراز. 29 اقپان. جامبىل وبلىسىندا جاقىن ارادا جاڭا زاماناۋي قۇس فابريكاسى اشىلادى. كاسىپورىن برويلەر بالاپاندارىن ءوسىرىپ, جىلىنا 3,5 مىڭ توننا ەت وندىرەتىن بولادى. بۇل تۋرالى egemen.kz ءتىلشىسى حابارلادى. «اۋليە-اتا فەنيكس» جشس 2010 جىلى بايزاق اۋدانى مىرزاتاي اۋىلىندا ەت باعىتىنداعى قۇس فابريكاسىن اشۋ ماقساتىندا قۇرىلدى. 2013 جىلى «قازاگروفينانس» اق ارقىلى جوبا ماقۇلداندى جانە قارجىلاندىرىلدى. جوبانىڭ جالپى قۇنى 1 516 ملن. تەڭگەنى قۇرايدى. ونىڭ ىشىندە كاسىپورىننىڭ جەكە قاراجاتىنىڭ ۇلەسى 248 ملن. تەڭگە. سونىمەن بىرگە, «بيزنەستىڭ جول كارتاسى-2020» باعدارلاماسى ارقىلى قۇس فابريكاسىنا ينفراقۇرىلىم (سۋمەن, گازبەن, ەلەكتر جۇيەسىمەن قامتۋ) تارتۋعا 547 ملن. تەڭگەگە مەملەكەتتىك قولداۋ كورسەتىلدى. كاسىپورىن قاجەتتى قۇرىلعىلارمەن تۇگەلدەي قامتىلعان, ينكۋباتوردان باستاپ, بالاپانداردى كۇتۋ, ولارعا قاجەتتى قۇراما جەم شىعاراتىن ارنايى ديىرمەن دە بار. ال دايىن ءونىمدى وڭدەۋ گوللانديالىق تاسىلمەن جۇزەگە اسىرىلادى. ءوندىرىستى ىسكە قوسۋ وسى جىلدىڭ ءبىرىنشى جارتى جىلدىعىنا جوسپارلانۋدا. كاسىپورىن مىرزاتاي اۋىلىنىڭ تۇرعىندارىن جاڭا جۇمىس ورىندارىمەن قامتاماسىز ەتەدى. سونداي-اق, اتالعان جوبانىڭ جۇزەگە اسۋى بايزاق اۋدانىنىڭ اۋىل شارۋاشىلىعىنا دا تىڭ سەرپىن بەرەدى. ال فابريكانىڭ قۇس ەتى ءوڭىر سۇرانىسىن قامتاماسىز ەتەتىن بولادى. ورالحان ءداۋىت. دەرەك: egemen.kz. سۋرەت: wikipedia.org.