مىرجاقىپ ماركاسى

بۇل جايدى وتكەن بارىس جى­لىنىڭ مادەني سالاداعى ءبىر تابىسى رەتىندە باعالاۋعا بولار. جاڭا جىلدىڭ قارساڭىندا ەلىمىز بويىنشا الاشتىڭ ءبىر ارىسى مىرجاقىپ دۋلاتوۆتىڭ تۋعانىنا 125 جىل تولۋىنا وراي ارنايى ماركا پوشتا اينالىمىنا ەنگىزىلدى. «اتاۋلى جانە مۇشەلتوي كۇن­دەرى» سەرياسىمەن شىعارىل­عان جارقىن بەينەلى ماركانى پوش­تا اينالىمىنا قوسۋدىڭ سالتاناتتى ءراسىمى الماتىداعى ۇلتتىق كىتاپحانادا وتكىزىلدى. حح عاسىردىڭ باسىندا قازاق قاۋىمىندا «احاڭ مەن جاقاڭ» دەپ ارداقتالعان, ءبىر-بىرىنەن ءبو­لىنىپ ايتىلماس قوس الىپتىڭ ءبىرى ۇلت ۇستازى احمەت بايتۇرسىنوۆ بولسا, ەكىنشىسى الاش قوزعالى­سى­نىڭ  كور­نەكتى قايراتكەرى, اتاقتى «قازاق» گازەتىن شىعارۋ­شىلاردىڭ ءبىرى, قا­زاق مادەنيەتى مەن ادەبيەتىنىڭ ءىرى وكىلى, اقىن, جازۋشى, پۋبليتسيست, اعارتۋشى-پەداگوگ مىرجاقىپ دۋلاتوۆ ەدى. ول – ءاليحان بوكەي­حانوۆ­پەن جانە احمەت بايتۇرسىنوۆپەن قاتار سول الماعايىپ زاماندا قا­زاق­تاردىڭ ۇلتتىق ساناسىن وياتۋ ىسىنە ءول­شەۋ­سىز ۇلەس قوسقان العاشقى ۇشتىكتىڭ ىشىندە اتالاتىن جان. «ويان, قازاق!» دەپ دابىل قاققان ونىڭ شىعارما­شى­لىعى پولياكتىڭ ۇلت-ازاتتىق قوزعا­لىسى يدەياسىن جىر­­لاعان ادام ميتسكەۆيچپەن, دەكا­بريس­تەردىڭ ەرلىگىنە ءتانتى بول­عان پۋشكينمەن, قو­عامنىڭ الەۋ­مەت­­تىك كەسەلىن اشىپ كور­سەتكەن لەۆ تولستويمەن, «اقسۇيەك­­تەردىڭ» پىكىرىنە اشىق قارسى شىق­قان ميحايل لەرمونتوۆپەن ۇندەس دەلىنەدى. رە­سەي­دىڭ بەلگىلى شىعىس­تانۋ­شىسى گوردلەۆسكيدىڭ م.دۋ­لاتوۆتى زامان شىندىعىنىڭ الەۋ­مەتت­ىك قىر­­تىستارىن اشىپ كورسەتۋ دەڭ­گەيى جونىنەن ابايمەن سالىس­تىرۋى دا تەگىن ەمەس. تاۋەلسىزدىكتىڭ ارقاسىندا قازىر مۇراعاتتارمەن ەركىن جۇمىس ىستەلەدى. «قۇپيا» دەگەن بەلگىسى بار ىستەرگە جول اشىلدى. مىرجاقىپ دۋلاتوۆ مۇشە بولعان الاشور­دانىڭ قىزمەتىنە بايلانىستى اقتاڭ­داقتار قالپىنا كەلتىرىلۋدە. تاۋەلسىز قازاقستاننىڭ قازىرگى جاس ۇرپاعى الاش ارىستارىمەن, سول ءبىر ارىستان اتالارىمەن قاۋىشتى. «الاشتىڭ» توقسان جىلدىعىن ەل جۇرتشىلىعى 2008 جىلى كەڭىنەن اتاپ ءوتتى. مىرجاقىپ ماركاسى الاش ارىستارىنىڭ ەل-جۇرتىمەن ءماڭ­گى­لىككە تابىسقاندىعىنىڭ تاعى ءبىر ايعاعى بولدى. 300 مىڭ دانا تارالىممەن شىعارىلىپ, ءتورت ءتۇرلى بوياۋمەن باسىلعان ماركا­نىڭ سۋرەتشىسى – دانيار مۇحا­مەدجانوۆ. ماركانى تانىستىرۋ راسىمىنە مىرجاقىپتىڭ نەمەرەسى, «مەكتەپ» باسپاسىنىڭ باس ديرەك­تورى ەرلان ساتىبالديەۆ, م.اۋەزوۆ اتىنداعى ادەبيەت ينستي­تۋتى ديرەكتورىنىڭ ورىنباسارى سەرىكقازى قوراباي, «قازپوشتا» اق باسقارما توراعاسىنىڭ ورىن­باسارى مۇحتار ءابدىراح­مانوۆ قاتىستى. ارداقتى ارىس جاقاڭنىڭ مار­كا­سى ءبىر زاماندا ءوزى ازاتتىعىن اڭساعان, تاۋەلسىزدىگى ءۇشىن كۇرەس­كەن تۋعان ەلىنىڭ اۋىل-ايماعىن, كەنت-قالالارىن ارمانسىز ارالاي­تىن اق جولدى ساپارىن باستادى. «ەگەمەن-اقپارات».