تمد-نىڭ بايقاۋشىلار ميسسياسى

سايلاۋ ۇدەرىسىنە قاتىسۋشىلارمەن جاقسى ىسكەرلىك قاتىناس ورناتادى كەشە قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ تاۋەلسىز مەملەكەتتەر دوستاستىعىنان بايقاۋشىلار ميسسياسى شتابىنىڭ باسشىسى ەۆگەني سلوبودامەن كەزدەستى. كەزدەسۋگە ورتالىق سايلاۋ كوميس­سياسىنىڭ مۇشەلەرى جانە تاۋەلسىز مەملەكەتتەر دوستاستىعىنان بايقاۋشىلار ميسسياسى شتابىنىڭ مۇشەسى ە.كوزياك قاتىستى.  ورتسايلاۋكوم باسشىسى مەن مۇشەلەرى تمد-دان باي­قاۋشىلار ميسسياسى شتابىنىڭ باس­شىسىن 2016 جىلعى 20 ناۋ­رىزعا تاعايىندالعان قازاق­ستان رەسپۋبليكاسى پارلامەنتى ءماجى­لىسىنىڭ جانە ءماسلي­حات­تارى­نىڭ دەپۋتاتتارىن ساي­لاۋ جونىندەگى سايلاۋ ناۋقانى­نىڭ بارىسى تۋرالى, سونداي-اق, سايلاۋ ورگاندارىنىڭ جۇمى­سى مەن ءمىن­دەتتەرى جونىندە اقپارات­تاندىردى. ال ە.سلوبودا سايلاۋ ناۋقانىنىڭ بارىسىنان تولىق حاباردار ەتكەنى ءۇشىن العىسىن ءبىلدىرىپ, ءوز تاراپىنان تمد قۇرىلىمدارىنان قىسقا مەرزىمدى, سونداي-اق, ۇزاق مەرزىمدى بايقاۋشىلار ادىلدىك جانە ارالاسپاۋشىلىق قاعيداتتارىن ۇستاناتىنىن اتاپ ءوتتى. «ميسسيا بايقاۋمەن بارلىق وڭىرلەردى, سونىمەن قاتار, استانا جانە الماتى قالالارىن قامتۋدى جوسپارلاپ وتىر. قازىرگى ۋاقىتتا شتابتى قالىپتاستىرۋ اياقتالىپ كەلەدى. جالپى العاندا, ميسسيادا 300-دەن استام بايقاۋشى بولادى», – دەدى ە.سلوبودا. كەزدەسۋ بارىسىندا ميسسيا باسشىسى سايلاۋ ناۋقانىنا قاتىستى اقپاراتتار تولىق كولەمدە ۇسىنىلاتىندىعىنا دا توقتالدى. «ءبىز قازاقستاندا ەلەكتوراتتىق ناۋقانعا ءبىرىنشى رەت مونيتورينگ جۇرگىزىپ وتىرعان جوقپىز, – دەدى ە.سلوبودا وسى جونىندە. – ادەتتەگىدەي, بىزدە سايلاۋ ورگاندارىمەن جانە سايلاۋ ۇدەرىسىنە بارلىق قاتىسۋشىلارمەن جاقسى ىسكەرلىك قارىم-قاتىناس ورنايدى. شتابتىڭ جانە جالپى ميسسيانىڭ جۇمىسى ءۇشىن بارلىق قاجەتتى اقپارات تولىق كولەمدە ۇسىنىلادى, ولار وسك-نىڭ رەسمي ينتەرنەت-رەسۋرسىندا ورنالاستىرىلادى. بۇل – سايلاۋدى دەموكراتيالى, ترانسپارەنتتى جانە ۇلتتىق سايلاۋ زاڭناماسىنا تولىعىمەن سايكەس ۇيىمداستىرىپ, وتكىزۋگە دەگەن ۇمتىلىستى كورسەتەدى». كەزدەسۋ سوڭىندا ق.تۇرعان­قۇلوۆ تاۋەلسىز مەملەكەتتەر دوس­تاستىعىنان بايقاۋشىلار ميس­سياسىنا تابىستى جۇمىس تىلەدى. *   *   * كەزدەسۋدەن سوڭ تاۋەلسىز مەملەكەتتەر دوستاستىعىنان بايقاۋشىلار ميسسياسىنىڭ باسشىسى ەۆگەني سلوبودا بۇقارالىق اقپارات قۇرالدارىنىڭ وكىلدەرىنە بريفينگ وتكىزدى. بريفينگتە ميسسيا باسشىسى تمد-دان بايقاۋشىلار ميسسياسى ەلدىڭ ىشكى ىسىنە ارالاسپايتىنىن اتاپ ءوتتى. «كەز كەلگەن سايلاۋ ءار مەملەكەتتىڭ جەكە ءىسى. سوندىقتان دا ءبىزدىڭ ميسسيا سايلاۋ ۇدەرىسى بارىسىندا مەملەكەتتىڭ ىشكى ىسىنە ەشقاشان ارالاسپايدى», – دەدى ول وسى جونىندە. ە.سلوبودا, سونداي-اق, سايلاۋ ناۋقانىنا قاتىستى قازىرگە قانداي دا ءبىر قورىتىندى شىعارا المايتىندارىن, دەگەنمەن, كەزەك­تەن تىس ءماجىلىس سايلاۋىن وتكىزۋگە ازىرلىك جۇمىستارى رەتىنە قاراي تولىق كولەمدە جۇرگى­زى­لىپ جاتقانىن ورتالىق سايلاۋ كوميس­سيا­سىنىڭ سايتىنداعى ماتەريالدار ارقىلى كوز جەتكىزىپ وتىرعاندارىنا دا توقتالدى. «ءبىز ەرەجەگە سايكەس, سايلاۋدى بايقاۋ قورىتىندىسى بويىنشا سايلاۋ وتكەن كۇننىڭ ەرتەڭىندە ءباسپاسوز ءماسليحاتىن وتكىزۋگە ءتيىسپىز. بۇل كۇنى, ياعني 21 ناۋرىزدا قازاقستان حالقى اسسام­بلەيا­سىنان سايلاناتىن دەپۋتاتتاردىڭ ساي­لاۋى وتەدى. ءبىزدىڭ ويىمىزشا, سايلاۋدى بايقاۋ ءناتي­جەسىن 22 ناۋرىزدا جاريا ەتكەن ءجون سياقتى», – دەدى ە.سلوبودا. ميسسيا جەتەكشىسى بريفينگ بارىسىندا پارلامەنت ءماجىلىسى دەپۋتاتتارىنىڭ سايلا­ۋىن بايقاۋعا تمد بايقاۋشىلارى ميسسياسىنا تمد اتقارۋشى كەڭەسىنىڭ توراعاسى سەرگەي لەبەدەۆ جەتەكشىلىك ەتەتىنىن اتادى. بۇدان بولەك ول تمد بايقاۋشىلار ميسسياسىنىڭ قۇرامىنا ازەربايجان, بەلارۋس, رەسەي, قىرعىزستان, تاجىكستان, تۇرىكمەنستان, وزبەكستان ەلدەرىنىڭ جانە تمد پارلامەنتارالىق اسسامبلەياسىنان, ۇقشۇ پارلامەنتتىك اسسامبلەياسىنان وكىلدەر كىرگەنىن اتاپ ءوتتى. ءاليسۇلتان قۇلانباي, «ەگەمەن قازاقستان». سۋرەتتى تۇسىرگەن ەرلان وماروۆ.