اۋىلدىڭ قالاداعى جاڭعىرىعى

«اۋىل» حالىقتىق-دەموكراتيالىق پات­ريوت­تىق پارتياسىنىڭ الماتىداعى شتابىندا سايلاۋشىلار پارلامەنت ءماجىلىسى دەپۋتاتتىعىنا كانديداتپەن كەزدەستى. سالتاناتتى ءىس-شارا الدىندا ەلىمىزدىڭ ءانۇرانى ورىندالدى. – ءبىزدىڭ الماتىلىق پارتيا مۇشەلەرى ەلى­مىزدىڭ وزگە اۋماقتارىنداعى سەكىلدى سايلاۋ ناۋقانىنا جان-جاقتى دايىن­دىق­پەن كەلدى. پارتيا ءوزى تاراپىنان جاڭادان سايلاناتىن پارلامەنتكە 19 ۇمىتكەردىڭ ەسىمىن اتاعان بولاتىن, – دەدى سايلاۋشىلار الدىندا ءسوز سويلەگەن «اۋىل» حدپپ-نىڭ الماتىداعى فيليالىنىڭ ديرەكتورى ابدوللا ساپاروۆ. – بۇگىن ءسىز­دەر ءبىزدىڭ الماتىداعى باس شتابتا العاشقى ۇمىتكەرىمىزبەن كەزدەسىپ وتىرسىزدار. ۇمىتكەردىڭ اتى-ءجونى – داۋرەن ءادىل­مىر­زا ۇلى مارالوۆ, «التىن ءديىر­مەن» كورپوراتسياسى ديرەكتورلار كەڭەسى­نىڭ توراعاسى. حالىقارالىق دارەجەدەگى ەكونوميست مامان. سايلاۋشىلارمەن جۇزدەسۋ بارسىندا ۇمىتكەر ءوزى جانە بولا­شاق جوسپارى تۋرالى, سونداي-اق, الەۋمەتتىك ماسەلەلەرگە بايلانىستى قويىلعان ساۋالدارعا جان-جاقتى جا­ۋاپ بەردى. – ءسىز نە ءۇشىن سايلاۋعا تۇسۋگە بەكىن­دىڭىز؟ – سايلاۋ ەڭ الدىمەن كەز كەلگەن ەلى­مىز­دىڭ ازاماتىنىڭ, ياعني ۇمىتكەردىڭ ءمۇم­كىندىگىن, ساياسي الەۋەتىن سىنايتىن ەمتي­حان. ادامنىڭ قوعامعا قانشالىقتى قاجەت ەكەندىگىنىڭ انىق كورسەتكىشى. – كىمگە ارقا سۇيەيسىز؟ – ەڭ الدىمەن – اۋىل حالقىنا. رەس­پۋب­ليكا تۇرعىندارىنىڭ 45 پايىزى اۋىلدا تۇرادى. ولاردىڭ بارلىعى دا «التىن ديىرمەننىڭ» نانىنان اۋىز تي­گەندەر. سول سەكىلدى ءوزىم باسقارىپ وتىر­ع­ان 2000 ادامدىق ۇجىمدى دا سايلاۋ الدىنداعى ۇلكەن دە قۋاتتى كۇش ساناي­مىن. پارلامەنت ءماجىلىسىنىڭ دەپۋ­تات­تىعىنا كانديدات داۋرەن مارالوۆ سايلاۋشىلارعا ەلىمىزدەگى زاڭ شىعا­رۋشى جوعارعى ورگاننىڭ تىنىس-تىرشىلىگىنەن جاقسى حاباردار ەكەنى تۋرالى دا نانىمدى اڭگىمە ايتىپ بەردى. سول سەبەپتى دە العاش ۇسىنىس تۇسكەن كەزدە كوپ ويلانباستان سايلاۋ ناۋقانىنا قاتىسۋعا تاس ءتۇيىن دايىن بولعان. ۇلكەن ءوندىرىستىڭ جاس باسشىسى ساياسي ۇلكەن ناۋقاندا پارلامەنت مىنبەرىنە قول جەتكىزسە, قازاقستاننىڭ بولاشاعى – قوعامدىق دامۋدىڭ جاڭا ساتىسىن جاڭعىرتۋ جاس ۇرپاقتىڭ قولىندا ەكەنىن دالەلدەمەك. جيىندا ەل مەن جەر, انا مەن بالا, اۋىل شارۋاشىلىعى ونىمدەرى مەن نان تاعامدارى, جەل مەن سۋ, ءتىپتى, توپىراق ەروزياسىنا دەيىن اڭگىمە كوتەرىلدى. سايلاۋشىلاردىڭ كوكەيىن مازالاعان بارلىق سۇراققا داۋرەن مارالوۆ تۇشىمدى جاۋاپ قايتاردى. العاشقى تۇلپارىن ۇلكەن دوداعا جەلپىندىرىپ قوسقان اۋىلدىقتار سالتاناتتى شارانى «اتامەكەن» ءانىن ورىنداپ اياقتادى. تالعات ءسۇيىنباي, «ەگەمەن قازاقستان». الماتى.