قاراعاندى وبلىسىندا قاريانى ۇرىپ, توناعاندار ۇستالدى

قاراعاندى. 26 اقپان. قاراعاندى وبلىسىندا 81 جاستاعى قارت ادامدى سوققىعا جىعىپ, اقشاسىن تارتىپ اكەتكەن ءتورت كۇدىكتىنى پوليتسيا قىزمەتكەرلەرى قولعا ءتۇسىردى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. جاس شامالارى 25 پەن 30-دىڭ ارالىعىنداعى ءتورت كۇدىكتى نوۆودولينكا پوسەلكەسىندە تۇراتىن زەينەتكەردىڭ پاتەرىنە بارىپ, ونى ۇرىپ-سوققان. سونان كەيىن قاريانىڭ 22 مىڭ تەڭگەسىن تارتىپ الىپ, ءوزىن اۆتوكولىككە سالىپ ايدالاعا اپارىپ تاستاعان. شىعار-شىقپاس جانى بار زەينەتكەردى اۋىلداستارى تاۋىپ الىپتى. باسى جارىلىپ, بۇعاناسى سىنعان قاريا قازىرگى ۋاقىتتا شاحتينسكىدەگى قالالىق اۋرۋحانادا ەم قابىلداپ جاتىر. ال پوليتسيا قىزمەتكەرلەرى بولسا, وسى قىلمىسقا قاتىسى بار كۇدىكتىلەردى ۇستاپ, قاماۋعا الدى. قازىرگى تاڭدا سوتقا دەيىنگى تەرگەۋ امالدارى جۇرگىزىلىپ جاتىر. قايرات ءابىلدينوۆ. دەرەك: قاراعاندى وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: liter.kz.