داعدارىس – ۋاقىتشا قۇبىلىس

ەلباسى نۇرسۇلتان نازارباەۆ ەۋرازيالىق ەكونوميكالىق كوميسسيا القاسىنىڭ توراعاسى تيگران ساركيسيانمەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى. كەزدەسۋ بارىسىندا ەۋرازيالىق ەكونو­ميكالىق وداقتى دامىتۋ, بىرلەستىكتىڭ ءۇشىنشى ەلدەرمەن ەكونوميكالىق قارىم-قاتىناستار اياسىن كەڭەيتۋ ماسەلەلەرى, سونداي-اق, ەاەو-عا مۇشە ەلدەردىڭ جاھاندىق نارىقتاردا قالىپتاسقان احۋال جاعدايىنداعى ورتاق ءىس-قيمىل ستراتەگياسى تالقىلاندى. مەملەكەت باسشىسى ت.ساركيسياننىڭ ەەك القاسىنداعى توراعالىعى الەمدىك ەكونو­مي­كاداعى كۇردەلى كەزەڭگە تاپ كەلگەنىن, مۇنداي جاعدايدا ءوسىمنىڭ جاڭا مۇمكىندىكتەرىن تابۋ وڭاي ەمەستىگىن ايتتى. – الايدا, بۇل كەدەرگىلەردىڭ ءبارى ەۋرا­زيا­لىق ەكونوميكالىق وداقتىڭ جۇمىسىمەن بايلانىستى ەمەس. ءبىزدىڭ ينتەگراتسيالىق بىرلەستىگىمىزدىڭ تۇپكى ناتيجەسىندە پايدالى بولاتىنىنا مەنىڭ ەش كۇمانىم جوق. ونىڭ ۇستىنە, بۇگىندە كوپتەگەن ەلدەر ەاەو-عا ءمۇ­شە بولۋعا نەمەسە ونىمەن ورتاق ەركىن ساۋدا اي­ماعىن قۇرۋعا تىلەك ءبىلدىرىپ وتىر. داعدارىس – ۋاقىتشا قۇبىلىس, ال ءبىزدىڭ ەكونومي­كالارىمىزدىڭ جالپى الەۋەتى مەن نارىق­تىڭ كولەمى قالا بەرەدى, – دەدى نۇرسۇلتان نازارباەۆ. سونىمەن قاتار, قازاقستان پرەزيدەنتى ين­تە­گراتسيالىق بىرلەستىككە مۇشە بولۋ ءمۇم­كىن­دىكتەردى پايدالانۋدى عانا ەمەس, ونىڭ دا­مۋىنا ۇلەس قوسۋ قاجەتتىگىن دە بىلدىرە­تىنىن ايتتى. ت.ساركيسيان نۇرسۇلتان نازارباەۆتىڭ ەاەو-نىڭ جالپى دامۋ ستراتەگياسى بو­يىنشا ۇستانىمى ەلەۋلى مانگە يە ەكەنىن, ءويت­كەنى, قازاقستان پرەزيدەنتىنىڭ باستاماسى مەن يدەيالارى وسى بىرىڭعاي ەۋرازيالىق كەڭىس­تىكتىڭ نەگىزى بولعانىن اتاپ ءوتتى. ەەك القاسىنىڭ توراعاسى ينتەگراتسيالىق ۇدەرىستەرگە قازاقستان باسشىلىق جاسايتىن جىلى دامۋ تىڭ سەرپىن الاتىنىنا سەنىم ءبىلدىردى. ت.ساركيسيان ەاەو ورگاندارىنا قازاقستان پرەزيدەنتىنىڭ وداققا مۇشە مەملەكەتتەردىڭ باسشىلارىنا ارنالعان ۇندەۋىن ەگجەي-تەگجەيلى زەردەلەۋ تاپسىرىلعانىن, سونداعى نەگىزگى جايتتاردى جۇزەگە اسىرۋ ءۇشىن ءتيىستى جوسپار قۇرىلعانىن ايتتى. سونداي-اق, مەملەكەت باسشىسىنا ەەك ال­قاسىنىڭ قازىرگى قىزمەتىنىڭ نەگىزگى باعىت­تارى تۋرالى باياندالدى.