استانا. 25 اقپان. بۇگىن ۋەفا چەمپيوندار ليگاسىنىڭ 1/8 فينالى شەڭبەرىندە تاعى ەكى ويىن وينالدى. ۋكراينانىڭ «ديناموسى» ءوز الاڭىندا انگليانىڭ «مانچەستەر سيتي» كومانداسىنان 1:3 ەسەبىمەن جەڭىلسە, پسۆ – «اتلەتيكو» ماتچىندا گول سوعىلعان جوق. بۇل تۋرالى egemen.kz ءتىلشىسى حابارلادى.
«دينامو» (كيەۆ, ۋكراينا) – «مانچەستەر سيتي» (مانچەستەر, انگليا) 1:3
گولدار: ۆيتالي بۋيالسكي 58 – سەرحيو اگۋەرو 15, داۆيد سيلۆا 40, يايا تۋرە 90.
ۋكراينا استاناسى – كيەۆ قالاسىنداعى «وليمپيسكي» ستاديونىندا وتكەن بۇل كەزدەسۋدە اعىلشىنداردىڭ فاۆوريت بولعانى ءسوزسىز. سوعان قاراماستان, «دينامو» ويىنشىلارى ايتارلىقتاي قارسىلىق كورسەتتى. ماتچتىڭ ەسەبى 15-مينۋتتا اشىلدى. يايا تۋرەدەن پاس العان «مانچەستەر ءسيتيدىڭ» شابۋىلشىسى سەرحيو اگۋەرو العاشقى گولدىڭ اۆتورى اتاندى. ال ۇزىلىسكە 5 مينۋت قالعاندا داۆيد سيلۆا مەرگەندىگىمەن كوزگە ءتۇسىپ, ەسەپتى ەسەلەدى.
ەكىنشى تايمدا, دالىرەك ايتقاندا, 58-مينۋتتا الاڭ يەلەرى ۆيتالي بۋيالسكيدىڭ كومەگىمەن ءبىر دوپ سوعىپ, ەسەپ ايىرماسىن قىسقارتقان بولاتىن. دەگەنمەن, كيەۆتىكتەردىڭ تارازى باسىن تەڭەستىرۋگە شامالارى جەتپەدى.
ويىننىڭ نۇكتەسىن 90-مينۋتتا يايا تۋرە قويدى. فەرناندينودان پاس العان ول جويقىن سوققى جاساپ, قارسىلاستار قاقپاسىنا ءۇشىنشى دوپتى ەنگىزدى.
وسىلايشا, سىرت الاڭدا ەكى دوپ ايىرماسىمەن جەڭىسكە جەتكەن انگليالىقتار شيرەك فينال ماسەلەسىن جارتىلاي شەشىپ قويدى. ەندى كوماندالار 16 ناۋرىزدا «مانچەستەر ءسيتيدىڭ» الاڭىندا قارىمتا كەزدەسۋ وتكىزەدى.
پسۆ (ەيندحوۆەن, نيدەرلاندى) – «اتلەتيكو» (مادريد, يسپانيا) 0:0
بۇل ويىندا «اتلەتيكو» بارلىق ستاتيستيكالىق كورسەتكىش بويىنشا باسىم بولدى. توپتىق كەزەڭدە «استانامەن» ءبىر توپتا بولعان يسپانيالىقتار ويىن بارىسىندا 11 رەت قارسىلاستار قاقپاسىن نىساناعا العان ەكەن. ال الاڭ يەلەرى 5 سوققىمەن قارىمتا قايتاردى. سونداي-اق, دوپقا يەلىك ەتۋ كورسەتكىشى بويىنشا دا قوناق كوماندا وزىق بولدى (59 % – 41%). الايدا, «اتلەتيكو» ويىنشىلارى پسۆ-نىڭ ساۋاتتى قورعانىسىن بۇزىپ وتە المادى.
ودان بولەك, 68-مينۋتتا الاڭ يەلەرى ساپىنان گاستون پەرەيرونىڭ ەكىنشى ەسكەرتۋىنە بايلانىستى الاڭنان قۋىلعانىن ەسكەرسەك, يسپانيادان كەلگەن كوماندانىڭ جەڭىسكە جەتۋ مۇمكىندىگى قانشالىقتى جوعارى بولعانىن اڭعارامىز. دەگەنمەن, 10 ويىنشىمەن ءجۇرىپ قاقپالارىنا گول جىبەرمەگەن نيدەرلاندىلىقتار ءوز جانكۇيەلەرى الدىندا نامىستى قولدان بەرمەدى. اتالعان ماتچتىڭ تاعدىرى 16 ناۋرىزدا مادريدتە وتەتىن قارىمتا كەزدەسۋدە شەشىلەدى.
ەلامان قوڭىر.
دەرەك: egemen.kz.
سۋرەت: championat.com, instagram.com.
