عاسىر جاساعان اجە

استانا – جاستار قالاسى. قاراپ تۇرساق, ۇلى ىستەر جاستاردىڭ جىگەرىمەن اتقارىلادى ەكەن عوي. ەل­ورداداعى ءزاۋلىم-ءزاۋلىم عيماراتتار, كەڭ داڭعىلدار, اسەم كوپىرلەر – ءبارى ورىمدەي ۇل-قىزداردىڭ تۇرعىزعاندارى. دەگەنمەن, جاستار تۋرالى ايتقاندا, ولاردىڭ تىلەگىن تىلەپ وتىراتىن اتا-اجەلەرىن قاپەردەن شىعارماعان ءجون. مىنە, وسىنداي ءازيز انالارىمىزدىڭ ءبىرى,  استا­نالىق قارت اجە زليا توياشقىزى بۇگىن 100 جاسقا تولعان تويىن اتاپ وتۋدە. زليا اپامىز – جازىپ قويعان حاتتاي ءتىرى وقۋلىق. الاسۇرعان حح عاسىردىڭ ءدۇبىرلى 1916 جىلى, ودان كەيىنگى اق پەن قىزىلدىڭ ارپالىسى, جاڭا ەكونوميكالىق ساياساتتىڭ اكەلگەن جاقسىلىعى, كۇشتەپ ۇجىمداستىرۋ مەن اشتىق قاسىرەتى, 1937 جىلدىڭ قۋعىن-سۇرگىنى, فاشيسپەن سوعىس ءالى ەسىندە. نەمەرەلەرى تىلەۋبەرگەن, گۇل­دانا, پەريزاتقا, شوبەرەسى كاميلاعا XVIII عاسىرداعى جوڭعارلارعا قارسى سوعىستا ەرەن ەرلىگىمەن حالىق جادىندا قالعان ارعى اتاسى قاراكەسەك جارىلعاپ باتىر تۋرالى ايتۋدان دا جالىقپايدى. ءبىر عانا وكىنىشى بار. ول – قازاقستاننىڭ تاۋەلسىزدىك العان جۇلدىزدى ساتىنە قۇداي قوسقان قوساعى سادىق اقساقالدىڭ جەتپەي, دۇنيەدەن وتكەنى. ءتورت قىزدان كەيىن كورگەن ۇلى تىلەگەننىڭ عىلىم دوكتورى, پروفەسسور, تاريح جانە قوعامدىق عىلىمدار اكادەمياسىنىڭ اكادەميگى بولعانىن,  كەلىنى رايسا اليقىزىنىڭ دوكتورلىق ديسسەرتاتسيا قور­عا­عانىن, نەمەرەلەرىنىڭ لوندوندا, ماسكەۋدە, سەۋلدە ءبىلىم العانىن ازاتتىقتىڭ ارقاسىندا كەلگەن باقىتىم دەپ قۋانادى كەيۋانا. قۋانىشىڭىز ۇزاعىنان بولسىن, ابزال انا! باقىتتى انالارمەن قازاق ەلى باقىتتى. حانكەلدى ءابجانوۆ, تاريح عىلىمدارىنىڭ دوكتورى. استانا.