كوممۋنيستەر – ەلدىڭ جوعىن جوقتاۋشىلار

كەشە كوك­شەتاۋ قالاسىندا قا­زاق­ستان كوممۋنيستىك حالىق پارتياسىنىڭ سايلاۋالدى ۇگىت-ناسي­حات جۇمىستارىنا ارنالعان اي­ماق­تىق پارتيالىق فورۋمى بولدى. فورۋم «ورتاق ءىسىمىزدى وڭالتايىق!» دەگەن ۇرانمەن ءوتتى. وندا قكحپ حاتشى­سى ۆلاديسلاۆ كوسارەۆ كوم­مۋ­نيس­تەردىڭ الداعى سايلاۋعا باراتىن باع­دارلاماسىنا توقتالىپ ءوتتى. «ءبىزدىڭ بۇگىنگى فورۋمىمىز تەكتەن تەك «ورتاق ءىسى­مىزدى وڭالتايىق!» ۇرانىمەن ءوتىپ وتىر­عان جوق. كوممۋنيستەردىڭ سايلاۋال­دى باعدارلاماسى وسىنداي اتاۋعا يە. بۇل باعدارلاما كوممۋنيستىك يدەولوگيا­نى دامىتۋعا, حالىقتىڭ مۇڭ-مۇقتا­جىن جوقتاۋعا جانە قازاقستاندىق پات­ريوتيزمدى كۇشەيتۋگە باعىتتالعان», – دەدى ول ءوزىنىڭ سوزىندە. ءارى قاراي ۆ.كوسارەۆ باعدارلا­مانىڭ نەگىزگى بولىمدەرىنە توقتالىپ, حالىق­تىق كوممۋنيستەردىڭ ۇستانىم­دارى مەن ءمىن­دەتتەرىنە, كوممۋنيستىك تاربيە, «با­تىس­تىق قۇندىلىقتاردىڭ» كەرى اسەرى دەگەن ماسەلەلەرگە تەرەڭىرەك توق­تالدى. سو­نىمەن قاتار, ول ەلدەگى الەۋمەتتىك ءادى­لەت­تىلىكتىڭ ساقتالۋىنا كوممۋنيستىك پار­تيانىڭ سۇبەلى ۇلەس قوسىپ جۇرگەنىن اتاپ ءوتتى. بەسىنشى ساي­لانىمعا دەپۋتات بو­لىپ سايلانعان كوم­مۋن­يستەردىڭ وسى تاراپتا ۇلكەن جۇمىستار اتقارعانىن دا سانامالاپ بەردى. ودان كەيىن ءسوز العان پارتيا جە­تەك­شىلەرىنىڭ ءبىرى تۇرعىن سىزدىقوۆ ماركسيزم-لەنينيزم يدەيالارىنا توقتالىپ, ونىڭ كوممۋنيستىك پارتيالاردىڭ ءبۇتىن, دايەكتى عىلىمي كوزقاراسى ەكەنىن اتاپ ءوتتى. «كوممۋنيستىك يدەولوگيانىڭ وزىق­تىعى سوندا – ول حالىقتىڭ ءال-اۋقا­تىن ارتتىرۋدى كوزدەيدى, ادام­دار­دىڭ تەڭ تۇرمىستا بولۋىن قالايدى. سو­نىمەن بىرگە, بارلىق الەۋمەتتىك ءما­سە­­لە­لەردىڭ ادىلەتتى جولمەن شەشى­لىپ, ادام ەڭبەگىنىڭ لايىقتى باعالان­عانىن تالاپ ەتەدى. مۇنداي يدەولوگيا لي­بەرالدىق كاپيتاليستىك قوعامعا ۇناما­عانىمەن, حالىق وسىنداي ادىلەتتىك­تەردى كۇتەدى. سوندىقتان دا ءبىزدىڭ باعدارلامامىزدى قولداپ, كوممۋنيستەردەن ەلدەگى ەڭ جوعارى وكىلدى ورگانعا ءوز دەپۋتاتتارىنىڭ بولۋىن قالايتىنىنا سەنىمدىمىز. ءبىز ارقاشاندا حالىق مۇددەسىن قورعايمىز. پارتيانىڭ يدەولوگيالىق تۇجىرىمداماسى كارل ماركستىڭ ىلىمىنە سايكەس, قوعام دامۋىنداعى جاڭا فاكتىلەر مەن قۇبىلىستاردى جيناقتاپ, قورشاعان الەمدەگى وزگەرىستەر نەگىزىندە ۇنەمى دامۋ ۇستىندە», – دەپ قورىتىندىلادى ءسوزىن ت.سىزدىقوۆ. ءىس-شارانىڭ سوڭىندا قاتىسۋ­شى­لاردىڭ ءبارى قكحپ بۇگىنگى تاڭدا ەلى­مىز­دەگى اسا بيىك قۇندىلىقتار – الەۋمەت­تىك ادىلەتتىلىك, ەكونوميكالىق تۇراق­تىلىق پەن ۇلتارالىق جانە كونفەس­سياارالىق كەلىسىمدى ساقتاۋدا ۇلكەن كۇش ەكەنىن ءبىراۋىزدان اتاپ ءوتىپ, ونىڭ وسى باعىتتاعى جۇمىستارىن قولداي­تىندارىن ءبىلدىردى. جاقسىباي سامرات, «ەگەمەن قازاقستان». اقمولا وبلىسى.