ازامات ەكەنسىڭ, ارمان!

داعىستاننان 33 باس اسىل تۇقىمدى جىل­قىلاردى ساتىپ الىپ, تىركەمەلى «كاماز» كولىگىمەن سامارا-شىمكەنت كۇرە جولى بويىمەن كەلە جاتقان وڭتۇستىك ءوڭىرىنىڭ جىگىتتەرى باتىس قازاقستانداعى جىمپيتى اۋىلى ورتالىعىنا جەتە بەرە وقىس وقيعاعا دۋشار بولدى. كولىك ۇستىندەگى جىلقىلاردىڭ سالماعى الىپ كەتتى مە, الدە تايعاق جولدىڭ اسەرى بولدى ما تىركەمە جولدىڭ شەتىنە قيسايا اۋدارىلىپ, جىلقىلار جان-جاققا بىتىراي قاشتى. مىنە, جول ازابى, باسقا تۇسكەن قيىندىق دەگەن وسى ەمەس پە؟ اۋىل شەتىندە ورنالاسقان «م-32» كافەسىنىڭ يەسى رافيك كاماليەۆ جوعارىداعىداي جاعدايعا دۋشار بولعان شىمكەنتتىك جىگىتتەردىڭ قاسىنان تابىلىپ, دەۋ №39 جول جوندەۋ مەكەمەسىندەگى جەرلەستەرىنىڭ كومەكتەرى ارقاسىندا اۋدارىلعان كولىكتى قالپىنا كەلتىرۋگە جاردەمىن تيگىزدى. ال ارمان بايتاسوۆ, ساعيدوللا ماردانوۆ سياقتى ازاماتتار داعىستان ەلىنەن ساتىپ الىنعان 33 باس جىلقىنى شاشاۋ شىعارماستان وزدەرىنىڭ مىنىستەگى اتتارىمەن قايىرمالاپ ايداپ, ماشينەگە تيەۋ جاعىن ۇيىمداستىردى. القيسسا, سونىمەن, كەزدەيسوق جول اپاتىنا ۇشىراپ, اقىر سوڭى امان قالعان جولاۋ­شى جىگىتتەر جىمپيتىلىق ازاماتتاردىڭ قامقورلىقتارىنا ريزا بولىپ, ەلدەرىنە اتتانىپ كەتتى. مۇسىربەك ايتاشەۆ.  باتىس قازاقستان وبلىسى, سىرىم اۋدانى.