استانا. 22 اقپان. استاناداعى قازاقستان رەسپۋبليكاسىنىڭ ۇلتتىق مۇراجايىندا قازاقتان شىققان تۇڭعىش عارىشكەر, ۇشقىش, كەڭەس وداعىنىڭ باتىرى, حالىق قاھارمانى, تەحنيكا عىلىمدارىنىڭ دوكتورى, پروفەسسور توقتار وڭعارباي ۇلى اۋباكىروۆپەن كەزدەسۋ ءوتتى. بۇل تۋرالى ۇلتتىق مۇراجايدىڭ اقپاراتتىق يميدجدىك قىزمەتىنە سىلتەمە جاساعان egemen.kz ءتىلشىسى حابارلادى.
«بۇل كۇن ءبىزدىڭ ۇلتتىق مۋزەي تاريحىنداعى ەڭ ايتۋلى وقيعالاردىڭ ءبىرى بولىپ تاريحتا قالارىنا سەنىمدىمىن. بۇگىنگى كەزدەسۋدىڭ باستى ماقساتى – قازاقتان شىققان تۇڭعىش عارىشكەرمەن سىرلاسىپ, وتاندىق عارىش سالاسىنىڭ وتكەنى مەن بولاشاعى جايلى اڭگىمەلەسۋ بولىپ وتىر. ءبىز پاتريوتيزم دەگەندى ءجيى ايتامىز. ال شىن مانىندە سوزىمەن جانە ىسىمەن, بۇكىل جان دۇنيەسىمەن پاتريوتتىقتىڭ ۇلگىسى دەپ وسى توقتار اۋباكىروۆتى اتاۋعا بولادى. ءبىز بولاشاقتا عارىش الەمىنە بايلانىستى ۇلتتىق مۇراجايدان ارنايى زال اشساق دەپ وتىرمىز. سول زالدىڭ قۇرىلىمى, جانە بولاشاق جۇمىسى جايىندا دا عارىشكەرمەن اقىلداسىپ وتىراتىن بولامىز», – دەدى جيىندا ءسوز العان ۇلتتىق مۋزەي ديرەكتورى دارحان مىڭباي.
«بيىل عارىشقا كوتەرىلگەنىمە 25 جىل تولادى. وسىناۋ جاۋاپتى ميسسيادان سۇرىنبەي وتۋىمە ەڭ باستى سەبەپ – قازاق حالقىنىڭ ماعان دەگەن كىرشىكسىز قۇرمەتى مەن سەلكەۋسىز سەنىمى. مەن حالقىم ءۇشىن ۇشتىم جانە سول ءۇشىن دە ۇلكەن قۇرمەتكە بولەندىم. قاي جەرگە بارسام دا «ءبىزدىڭ باتىرىمىز كەلدى», «تۇڭعىش عارىشكەرىمىز كەلدى» دەپ قارسى الادى. سول جۇرتتىڭ رياسىز كوڭىلىنە ءدان ريزامىن. مەن قازاقتىڭ ۇلان-عايىر دالاسىن عارىشتان كورىپ, قادىرىن ابدەن ۇعىنعان ادامنىڭ ءبىرىمىن. سوندىقتان جاستارمەن كەزدەسە قالعان جەردە وتانىمىزعا دەگەن قۇرمەت, ادالدىق تاقىرىپتارىندا كوبىرەك سۇحبات جۇرگىزگەندى ۇناتامىن. مەنىڭ الدىمدا ەكى بالا وتىرسا دا سويلەي بەرۋگە دايىنمىن. باستىسى ول ەكەۋىنىڭ قازاقستانعا دەگەن ماحابباتىن, اتا-بابالارىمىزدان قالعان جەرگە دەگەن قۇرمەتىن ارتتىرا بىلسەم, ۋاقىتىمنىڭ بوس كەتپەگەنى. جاس كەزىمدە مەكتەپ كىتاپحاناسىنان شىقپايتىنمىن. سونداعى بار كىتاپتى وقىپ تاۋىستىم. دەسە دە كوپ دۇنيەگە قول جەتە بەرمەيدى. ال, قازىر ءبارى بار, كىم قانداي كىتاپ وقيمىن دەسە, قايدا وقيمىن دەسە, كوپ مۇمكىندىكتەردى پايدالانۋعا بولادى. جالپى ادام بالاسى ءبىلىم الۋعا ەشقاشان شارشاماۋى كەرەك. ول كىشىگە دە, ۇلكەنگە دە كەرەك», – دەدى ت.اۋباكىروۆ.
ءىس-شاراعا قازاقستان رەسپۋبليكاسىنىڭ ۇلتتىق مۋزەيىنىڭ عىلىمي قىزمەتكەرلەرى, ۋنيۆەرسيتەت ستۋدەنتتەرى قاتىستى.
ايان ءابدۋالي.
دەرەك, سۋرەت: egemen.kz
