اقتوبەدە «التىن ادامنىڭ» ونىمدەرى ساتىلا باستادى

اقتوبە. 23 اقپان. اقتوبە قالاسىنداعى «مادەنيەت» ساۋدا ۇيىندەگى «التىن ادام» كيىمدەرى ساتىلاتىن ورىن اشىلدى. وتاندىق ونىمدەر ىلىنگەن بۋتيكتىڭ سالتاناتتى اشىلۋ سالتاناتىندا قالا اكىمى بەكبول ساعىن مەن وبلىستىق كاسىپكەرلەر پالاتاسىنىڭ ديرەكتورى نۇرلىبەك مۇقانوۆ لەنتا قيۋ ءراسىمىن جاساپ, سورەلەردەگى تاۋارلاردى كورىپ شىقتى. بۇل تۋرالى egemen.kz ءتىلشىسى حابارلادى. قازاقستاندىق ديزاينەر ايجاني نۇرلانوۆا قالا اكىمىنە وتاندىق ونىمدەردى تانىستىرىپ, استانادان اقتوبەگە قاتىناۋ قيىن بولعاندىقتان, ءونىمنىڭ جاڭا ۇلگىسىن ەمەس, بۇرىنعى ۇلگىلەرىن اكەلۋگە تۋرا كەلگەنىن, الداعى ۋاقىتتا تاۋارلاردىڭ تۇرلەرى تولىقتىرىلاتىنىن ايتتى. وتاندىق ونىمدەردىڭ باعاسى كىم-كىمگە دە قولجەتىمدى بولماق. ەر-ازاماتتارعا ارنالعان كوستيۋم-شالبارلار 30-60 مىڭ تەڭگە شاماسىندا. ساۋدا ورنىندا «التىن ادام» وتاندىق برەندىنىڭ كوستيۋم-شالبارلارىنان باسقا, ەر-ازاماتتاردىڭ كويلەكتەرى, سونداي-اق, قاراعاندىدا دايىندالعان اياق كيىمدەر ساتىلۋدا. ازىرگە ساۋدا ورنىندا ءۇش ادام جۇمىس ىستەيدى. ەگەر اقتوبەلىكتەر تاراپىنان وتاندىق ونىمگە دەگەن سۇرانىس جوعارى بولىپ جاتسا, بولاشاقتا وبلىس ورتالىعىنان «التىن ادام» فابريكاسى وندىرگەن ونىمدەر ساتىلاتىن جەكە دۇكەن اشۋ ويلاستىرىلۋدا. «التىن ادام» فابريكاسىنىڭ وكىلدەرى اقتوبەدە ساۋدا ورنىن اشىپ قانا قويماي, قالاداعى بىرقاتار وقۋ ورىندارىنداعى ديزاينەر ماماندىعى بويىنشا ءبىلىم الىپ جاتقان ستۋدەنتتەرگە, سونداي-اق, كاسىپ اشۋعا نيەتتى ادامدارعا ارناي ءدارىس وقىپ, بيزنەس-كوۋچينگ ۇيىمداستىرۋدى دا قاراستىرۋدا. ساتىبالدى ءساۋىرباي. دەرەك, سۋرەت: egemen.kz.