پارتيا قاتارى جاستارمەن تولىقتى

پارلامەنت ءماجىلىسى مەن ءماسليحاتتار سايلاۋلارىنا ۇمىتكەرلەر ۇگىت-ناسيحات شارالارىن جۇرگىزۋگە بەلسەنە كىرىسىپ كەتتى. ۇلكەن ساياسي دوداعا تۇسكەن «التىلىقتىڭ», ياعني 6 پارتيانىڭ ساناتىندا جالپىۇلتتىق سوتسيال-دەموكراتيالىق پارتيا دا بار. ورتالىق سايلاۋ كوميسسياسى پارتيا تاراپىنان ۇسىنىلعان 23 ۇمىتكەردى تىركەۋدەن وتكىزىپ, جەرەبەگە سايكەس جالپىۇلتتىق سوتسيال-دەموكراتيالىق پارتيا سايلاۋ بيۋللەتەنىندە بەسىنشى ورىندا تۇر. جالپىۇلتتىق سوتسيال-دەمو­كرا­تيالىق پارتيانىڭ (جسدپ) سايلاۋالدى باعدارلاماسىنا ساي العاشقى وتكەن الماتىداعى باسقوسۋىندا جاس بۋىن وكىلدەرى پارتيا قاتارىنا قابىلداندى. ءوز جاقتاستارىمەن ەمەن-جارقىن اشىق اڭگىمە بارىسىنداعى وتكەن بۇل شارا ەلىمىزدەگى وپپوزيتسيالىق پارتيانىڭ سايلاۋعا قۇلشىنىسىنان حابار بەرگەندەي. الماتى قالالىق فيليالىنىڭ جەتەكشىسى تازابەك سامبەتبايدىڭ الداعى قىزۋ ناۋ­قانداعى ۇيىمنىڭ كوزدەگەن ماق­ساتى تۋرالى تولعانا سويلەگەن ءسوزى دە كوپشىلىكتىڭ كوڭىلىنە قونعان سەكىلدى. ەگەر سايلاۋدا ۇمىتكەرلەر جەڭىسكە جەتە قالسا, پارلامەنتتىڭ بيىك ءمىن­بەرىنەن پارتيانىڭ قوياتىن كوكەي­كەستى حالىقتىق ماسەلەلەردىڭ اۋقى­مى بارشىلىق. وسىعان وراي شەشەن پار­تيانىڭ ءوز سايلاۋشىلارىنا ۇسىنىپ وتىرعان شارالار كەشەنىنە كەڭىنەن توقتالدى. ول نەگىزىنەن العاندا الەۋمەتتىك, ەكونوميكالىق جانە ساياسي سالانى قامتيدى. ءاربىر پارتيا ساياسي دودادا ءوز ۇستانىمىن ناقتىلايدى ەمەس پە. بۇل تۇرعىدان العاندا, پارتيانىڭ ساي­لاۋالدى باعدارلاماسىندا ايقىن­دالعانىنداي, «جسدپ ءوزىنىڭ كوپ جىل بويى ۇسىنىپ كەلە جاتقان قايتا قۇرۋلاردى جۇزەگە اسىرۋعا بيلىكتى كوندىرۋ, ەلىمىزدىڭ ىشكى تىرەگىن بەكىتۋ, قازاقستاندى ەكونوميكالىق جاعىنان پارمەندى, الەۋمەتتىك جاۋاپكەرشىلىگى بار, تابىس­تى ەركىن, شىن مانىندە تۇراقتى جانە تاۋەلسىز مەملەكەت ەتۋ ءۇشىن پارلامەنت ءماجىلىسى سايلاۋىنا قاتىسادى». «ەل تاڭداۋى – حالىق بيلىگى!» دەگەن ۇرانمەن شىققان جسدپ الەۋمەتتىك سالادا ەلىمىزدە الەمدىك تاجىريبەنى پايدالانۋ كەرەكتىگىن العا تارتادى. ماسەلەن, بايىعان ازاماتتار بەلگىلى ءبىر سومادان تىس تاپقان تابىستارىنىڭ 50-60 پايىزىن قازىناعا قۇيۋى ءتيىس. قانى قىزۋ ءبىر پارتيا مۇشەسى اتىپ تۇرىپ پارتيا ىشىندەگى الاۋىزدىق پەن وتكەن تاريحي كەزەڭدەگى ەكىگە جارىلۋ جايىن داۋلاماق بولعان ەدى, جينالىس توراعاسى وعان دا لايىقتى تويتارىس بەردى. بۇل سايلاۋدا پارتيا جاستار قاناتىنا ارقا سۇيەپ وتىرعانىن جەتكىزدى. پارتيانىڭ جاس مۇشەسى ءانۋار شوتباي ءوزىنىڭ پارتيا الدىنداعى قىزمەتىن تاريحي «الاش» پارتياسىنىڭ رۋحاني جالعاسى سيپاتىندا جال­عاس­تىراتىنىن ايتتى. ءانۋار شوتبايدىڭ ارىپتەسى قۋات كۇنبولات تا ءوزىنىڭ سوزىندە ماقساتى ەلگە قىزمەت ەتۋ بولىپ تابىلاتىنىن مالىمدەدى. پارتيالاس سەرىك­تەرىنىڭ ويى كوپ جاعدايدا ءبىر جەر­دەن شىعىپ جاتقانى كوڭىلىندە ريزا­شىلىق سەزىمىن تۋعىزاتىنىن ءبىل­دىر­دى. ونىڭ تياناقتى قۇرعان ويلى لە­بىزدەرىنە پارتيا مۇشەلەرى ريزا­شىلىق تانىتتى. جالپىۇلتتىق سوتسيال-دەمو­كرا­تيالىق پارتيانى وزىندىك باعىت-باع­دارى ءۇشىن جان-جۇرەگىمەن قول­داي­­تىنىن بىلدىرگەن تاعى ءبىر جاس ءمادي وماروۆ ءوزىنىڭ ليبەرالدىق كوز­قاراستا قالاتىنىن ءبىلدىردى. سولاي بولا تۇرا, ءمادي وماروۆ ءبىر توپ جاس زامانداستارىنىڭ ساپىندا پارتيا قا­تارىنا ءوتتى. جاستارعا جالپىۇلتتىق سوتسيال-دەموكراتيالىق پارتيانىڭ ءمۇ­شەسى ەكەندىگىن بىلدىرەتىن قۇجات تاپسىرىلدى. – وركەنيەتتى ەلدىڭ بولاشاعى – ءسىز­دەر­سىزدەر! تۋعان ەلىمىزدىڭ بولاشاعى ءۇشىن, جارقىن كەلەشەگى ءۇشىن كۇرەستە ءبىر­گە بولايىق, جەڭىسكە بىرگە جەتەيىك! – دەدى توراعا پارتيا قاتارىنا كەلىپ قوسىلعان جاستار لەگىن شىن جۇرەكتەن قۇتتىقتاپ. تالعات ءسۇيىنباي, «ەگەمەن قازاقستان». الماتى.