اياز
كارى قۇداڭ قىس كەلدى دەگەنشە, التاي تۇرعىندارى ءۇشىن مازاسىز كۇندەر مەن تۇندەردىڭ جالعاساتىنى بەلگىلى ءجايت دەي بەرىڭىز. مىنە, ءبىر اپتاعا جاقىندادى, مۇندا ارقىراعان اياز كۇشىنە ەنىپ, وبلىس كولەمىندە كۇردەلى جاعدايلار ورىن الا باستادى. سوڭعى ەكى-ءۇش كۇندە شىعىس قازاقستان وبلىستىق توتەنشە جاعدايلار جونىندەگى دەپارتامەنتىنىڭ قۇتقارۋشىلارى 32 قۇتقارۋ جۇمىستارىن اتقاردى. ءۇش كۇننەن بەرى وڭىردەگى اۋداندار مەن قالالاردى جالعاستىرىپ تۇرعان كۇرە جولدار كەشكە جاقىننان تاڭەرتەڭگە دەيىن جابىق. سەبەبى, كۇن قاتتى سۋىق. سارسەنبى كۇنى تاڭەرتەڭ اۋا تەمپەراتۋراسى وسكەمەندە -42, -43, قالا ىرگەسىندەگى احمەر اۋىلىندا -45, كۇرشىم جانە كاتونقاراعاي اۋداندارىنىڭ كەي جەرلەرىندە ءتىپتى -45-تەن اسىپ تۇسكەن. 2 قاڭتاردا كۇرشىم اۋدانىنىڭ جاڭااۋىل اۋىلىندا كۇن كۇرت سۋىتىپ, تۇندە اۋانىڭ تەمپەراتۋراسى -43, -45 گرادۋسقا جەتىپ, قالجىر وزەنىندەگى القىم ءيىنىنىڭ 300 مەتر جەرىندە وزەن سۋى قاتىپ, ول جوعارى شىعىپ كەتكەن. ال كەشە سۋ كوتەرىلىپ, ونشاقتى ءۇيدىڭ قورا-جايلارىنا قاۋىپ توندىرگەن. قازىر وزەندەگى قاتىپ قالعان مۇزدى جارۋ جۇمىسى ءجۇرىپ جاتىر. كۇرشىم اۋداندىق اكىمدىگى جاعدايدى قاتاڭ باقىلاۋدا ۇستاپ وتىر. ءسويتىپ, قويان جىلى قاھارلى قىس بەلگىسىن ءبىلدىرىپ, ادامدار ساق بولىڭدار دەگەندەي يشارا تانىتۋدا. ءيا, كۇندەلىكتى ومىردە سەرگەك بولايىق, اعايىن. جەمشوپتى ۇنەمدەپ جۇمساپ, ەڭ باستىسى, تىرشىلىگىمىزدىڭ ءتىنىن بۇزىپ المايىق. ايازدى كۇندەرى جولعا شىعۋدى شەكتەگەن دە ءجون...وڭداسىن ەلۋباي.
شىعىس قازاقستان وبلىسى.* * *
قار
بىلتىرعىداي بيىل دا, مىنە, ءسولتۇستىكتىڭ قىسى ۇدەپ تۇر. ىزعارلى. سۋىق. قار قالىڭ. ايازدىڭ بەتى قايتار ءتۇرى كورىنبەيدى. دەسەك تە, قىستىڭ ءوز اسەمدىگى, عاجاپ كوركى بار عوي. جازۋشى-اقىندارىمىز سۋرەتتەپ جازاتىنداي-اق بۇگىندە كەرەكۋ ءوڭىرى اينالا اپپاق قارعا بوككەن. دالا تىم-تىرىس. كەرەمەت عاجاپ قىس بولىپ تۇر! سوڭعى اپتاداعى اۋا رايىن بولجاۋشىلاردىڭ مالىمەتتەرى بويىنشا وبلىس ورتالىعىندا 30-33 گرادۋس, ال الىستاعى ەرتىس, جەلەزينكا, اقتوعاي, باياناۋىل اۋداندارىندا 37-38 گرادۋسقا دەيىن سۋىق بولدى. قاڭتاردىڭ 6-7-ءسى كۇندەرى ايازدىڭ كۇشەيەتىنى, جولاۋشىلارعا الىس جولعا شىقپاۋلارى ەسكەرتىلدى, ءتىپتى, الىستاعى اۋىلداردا 39-40 گرادۋسقا دەيىن جەتەتىنى الدىن الا تەلەديدارداعى جۇگىرتپە جولدار, وبلىستىق راديو ارقىلى بىرنەشە رەت حابارلاندى دا. اكىمدىكتەرگە حابارلاسىپ حال-جاعدايلارىن ءبىلىپ ەدىك: «ە, بىزگە قىس تۇسكەلى قاي زامان, اۋىلدار تىنىش, مال-جان بارلىعى دا باقىلاۋدا», دەگەن جاۋاپتار الدىق. اۋىلدىقتار الاڭدايتىن ەمەس. ولارعا قوسىلا مۇنداي قىس بيىل عانا بولىپ پا ءتايىرى دەگەندەي, قالىڭ توندارعا ورانعان, جۇمساق پيمالار كيگەن قالا حالقى دا, مىنە, جۇمىستارىنا دا, قوناعىنا دا, قۇدالىعىنا دا بارىپ, وبلىس ورتالىعىندا ترامۆايلار دا, قالاارالىق اۆتوبۋستار دا توقتاۋسىز ءجۇرىپ جاتىر. وقىس وقيعالار ورىن العان جوق. قالا پاتەرلەرى دە جىلى. ءتوتەنشە جاعدايلار باسقارماسىنىڭ مالىمەتتەرىنشە, وبلىس اۋماعىنىڭ قالالارىندا, باسقا دا ەلدى مەكەندەردە بارلىق جەدەل قىزمەت ورىندارى, جول, ءتارتىپ ساقشىلارى كۇنى-ءتۇنى كەزەكشىلىكتە. قاتال قىسقا ابدەن ۇيرەنىپ العان سولتۇستىكتىڭ حالقى, ءاي, بالكىم كەلەر جىلى قىس بولمايدى ەكەن دەسە, قالىڭ قار, سارى ايازىم-اي دەپ جىلايتىن دا شىعار-اۋ!..فاريدا بىقاي.
پاۆلودار وبلىسى.
