جامبىل وبلىسىنداعى بۋرىل اۋىلىندا جاعداي بىرقالىپتى

تاراز. 22 اقپان. بايزاق اۋدانىنىڭ بۋرىل اۋىلىندا ورىن العان جاعدايعا بايلانىستى تاراپ جاتقان ءتۇرلى قاۋەسەتتەردىڭ اق-قاراسىن اجىراتىپ, حالىققا شىنايى اقپارات جەتكىزۋ ماقساتىندا جامبىل وبلىسى اكىمىنىڭ ورىنباسارى ەرقانات مانجۋوۆ ءباسپاسوز ءماسليحاتىن وتكىزدى. بۇل تۋرالى egemen.kz ءتىلشىسى حابارلادى. «جالپى, بۇل ەلدى مەكەندە 8 ۇلتتىڭ وكىلى تۇرادى. ونىڭ ىشىندە نەگىزگىسى – قازاقتار مەن تۇرىكتەر. بۇگىندە اۋىلداعى قوعامدىق-ساياسي احۋال تۇراقتى. قايعىلى وقيعا ورىن العان كۇننەن باستاپ ءبىز ءتيىستى قۇزىرلى ورىندارمەن بىرگە بارلىق قاجەتتى شارالاردى قولعا الدىق.  ماسليحات دەپۋتاتتارىنان, اقساقالداردان قۇرالعان ارنايى توپ قۇرىلىپ, بۇگىنگە دەيىن وسىنداعى ۇيلەردىڭ 91 پايىزىنا كىرىپ, ءتۇسىندىرۋ جۇمىستارىن جۇرگىزدىك.  بۇل جۇمىستار الداعى ۋاقىتتا دا جالعاساتىن بولادى. حالىققا تەك قانا شىنايى اقپاراتتار جەتۋى ءتيىس. سوندىقتان سىزدەر وسىنداعى ءتيىستى باسشىلارمەن, اۋىل تۇرعىندارىمەن, وزگە ۇلت وكىلدەرىمەن وقيعانىڭ انىق-قانىعىن انىقتاۋلارىڭىزعا بولادى», دەيدى ەرقانات نۇرباپا ۇلى: سونىمەن, ءتيىستى قۇزىرلى ورىن وكىلدەرىنىڭ, اۋىل تۇرعىندارىنىڭ سوزدەرىنە سۇيەنە وتىرىپ, انىقتالعانى, ايىپ تاعىلىپ وتىرعان كۇدىكتىنىڭ وتباسى 2008 جىلى قىرعىزستاننان كوشىپ كەلگەن. كۇدىكتى د. ك.-نى وتباسى اسىراپ العان.  قىلمىستىق وقيعا ورىن العان كۇنى د. ك. كورشىسىنىڭ ۇيىندە ەشكىم جوق بولاتىنىن بىلگەندىكتەن, ۇرلىققا تۇسەدى. الايدا ونى 27 مىڭ تەڭگە ۇرلاپ جاتقان جەرىنەن ءۇيدىڭ 6 جاسار بالاسى كورىپ قويىپ, اكەسىنە ايتاتىنىن جەتكىزگەن. ۇرلىعى اشكەرەلەنگەن د. ك. بالانى الدىمەن تۇنشىقتىرىپ, سوسىن اسحانا پىشاعىمەن ولتىرگەن. قازىرگى تاڭدا ول كىناسىن مويىنداعان. الەۋمەتتىك جەلىلەردە تاراعانداي, اۋرۋحانادا ەمەس, وقشاۋلاۋ ورنىندا وتىر. پسيحيكالىق اۋىتقۋشىلىعى جوق, دەنى ساۋ. الەۋمەتتىك جەلىلەردە سونداي-اق, كۇدىكتىنىڭ جاراقاتتانعان سۋرەتى سالىنىپ, ونىڭ اعاسىنىڭ ولتىرىلگەنى تۋرالى اقپارات تاراعان بولاتىن. قۇقىق قورعاۋ ورىندارى مۇنداي اقپاراتتىڭ جالعان ەكەنىن ايتتى. كۇدىكتىنىڭ جاراقاتتانىپ, قولىن بايلاپ العان سۋرەتى وسىدان ءبىر جىل بۇرىن, قولىن سىندىرىپ العان كەزدە تۇسىرىلگەن بولىپ شىقتى. كۇدىكتى ازامات تۇرعان ءۇيدىڭ ەكى تەرەزەسى سىندىرىلعانى راس, ال كولىكتىڭ, ءۇيدىڭ ورتەنگەنى, ۇلت وكىلدەرى اراسىندا بەي-بەرەكەت بۇزاقىلىقتىڭ ورىن العانى تۋرالى دەرەكتەر نەگىزسىز. قازىرگى تاڭدا كۇدىكتىنىڭ وتباسى قىرعىزستانعا كوشىپ كەتكەن. قالعان وزگە ۇلت وكىلدەرى سول ەلدى مەكەندە, ىنتىماقتا ءومىر سۇرۋدە. ورالحان ءداۋىت. دەرەك, سۋرەت: egemen.kz