استانا. 21 اقپان. نورۆەگيانىڭ ليللەحاممەر قالاسىندا ءوتىپ جاتقان جاسوسپىرىمدەر اراسىنداعى II قىسقى وليمپيادا ويىندارىندا تاعى ءبىر قازاقستاندىق سپورتشى جۇلدەگەر اتاندى. بۇل تۋرالى egemen.kz ءتىلشىسى حابارلادى.
شورت-ترەكتەن ارالاس كوماندالىق جارىس بويىنشا 6-توپتا سىنعا تۇسكەن وتانداسىمىز انيتا ناگاي بولگار قىزى كاترين مانويلوۆا, لاتىش سپورتشىسى كارليس كرۋسبەرگس جانە جاپونيالىق كازۋكي يوشيناگامەن بىرگە ونەر كورسەتىپ, وليمپيادانىڭ قولا جۇلدەسىنە قول جەتكىزدى. جارىس قورىتىندىسى بويىنشا ولاردىڭ كورسەتكىشى – 4:17,181 مينۋت.
بۇل سىندا التىن مەدال 2-توپقا بۇيىردى. اتالعان توپتىڭ قۇرامىندا انا فارشيادا (نورۆەگيا), دجي كيم (وڭتۇستىك كورەيا), ستەينا دەسمە (بەلگيا) جانە كۆەنتە فەركوكا (فرانتسيا) بار. ءوز كەزەگىندە چەمپيوندار جارىس جولىن 4:14,413 مينۋتتا ءجۇرىپ ءوتتى.
ال كۇمىس مەدال پەترا يازاپاتي (ۆەنگريا), دجۋليا مۋر (اۆستراليا), تەرك دە بوەر (نيدەرلاندى) جانە كيچي شيگەيرو (جاپونيا) ونەر كورسەتكەن 3-توپتىڭ ەنشىسىندە كەتتى. ولاردىڭ كورسەتكىشى 4:14,495 مينۋتقا تەڭ.
وسىمەن قازاقستاندىق سپورتشىلار نورۆەگياداعى دودادا ءتورتىنشى مەدالدى قورجىنعا سالىپ وتىر. بۇعان دەيىن بياتلوننان 6 شاقىرىمدىق سپرينتتىك جارىستا باق سىناعان ارينا پانتوۆا مەن مانەرلەپ سىرعاناۋدان ەليزابەت تۇرسىنباەۆا وليمپيادانىڭ قولا جۇلدەگەرلەرى اتاندى. سونداي-اق, كونكيشىمىز ءانۋار مۇحاماديەۆ ارالاس كوماندا ساپىندا سايىسقا ءتۇسىپ, كۇمىس مەدالدى مويىنان تاقتى.
ايتا كەتەيىك, جاسوسپىرىمدەر وليمپياداسى 21 اقپان كۇنى اياقتالادى.
ەلامان قوڭىر.
دەرەك: egemen.kz.
سۋرەت: lillehammer2016.com.
