استانا. 20 اقپان. فايز سۋبري ەسىمدى مالايزيالىق فۋتبولشى اتى اڭىزعا اينالعان روبەرتو كارلوستىڭ اتاقتى ايىپ سوققىسىن قايتالاپ, عاجايىپ گولدىڭ اۆتورى اتاندى. بۇل تۋرالى ua-football.com پورتالىنا سىلتەمە جاساعان egemen.kz ءتىلشىسى حابارلادى.
مۇنداي گول مالايزيا پرەمەر-ليگاسى شەڭبەرىندەگى «پۋلاۋ پەنانگ» پەن «پاحانگ» كوماندالارىنىڭ كەزدەسۋىندە سوعىلدى. اتاپ ايتقاندا, «پۋلاۋ پەنانگ» كلۋبىنىڭ جارتىلاي قورعاۋشىسى فايز سۋبري قاقپاعا 30 مەتر جەردەن ايىپ سوققىسىن ورىندايدى. ۇشقان دوپ اۋەدە باعىتىن وزگەرتىپ, قاقپانىڭ توعىزدىعىنا بارىپ توپ ەتە تۇسكەن. قازىردىڭ وزىندە مالاي جانكۇيەرلەرى بۇل گولدى مالايزيا فۋتبولىنىڭ تاريحىنداعى ەڭ ۇزدىگى دەپ باعالاۋدا. سونداي-اق, ماماندار اتالعان گولدىڭ جىل سوڭىندا پۋشكاش سىيلىعىنان ۇمىتكەر بولۋ مۇمكىندىگىن دە جوققا شىعارمايدى.
ال الەمدىك اقپارات قۇرالدارى بۇل گولدى بىردەن 1997 جىلى برازيليانىڭ اتاقتى ويىنشىسى روبەرتو كارلوستىڭ فرانتسيا قاقپاسىنا سوققان گولىمەن سالىستىرىپ ۇلگەردى. ءتىپتى, كەيبىر باسىلىمدار فايز ءسۋبريدى كارلوستىڭ ءىزباسارى دەپ اتادى.
تاعى ءبىر نازار اۋداراتىن جايت, وسى عاجايىپ گولدىڭ Youtube-تەگى قارالىمى 4 كۇننىڭ ىشىندە 2 ميلليوننان اسقان.
ايتا كەتەيىك, اتالعان ويىندا «پۋلاۋ پەنانگ» كومانداسى 4:1 ەسەبىمەن جەڭىسكە جەتتى.
ەلامان قوڭىر.
دەرەك: ua-football.com.
سۋرەت: hype.my.
1997 جىلى روبەرتو كارلوستىڭ فرانتسيا قاقپاسىنا سوققان گولى
