اقش-تا ساياحاتشىلارعا ارنالعان عارىش كەمەسىنىڭ تانىستىرىلىمى ءوتتى

استانا. 20 اقپان. امەريكالىق Virgin Galactic كومپانياسى ساياحاتشىلارعا ارنالعان سۋبوربيتالدىق SpaceShipTwo جاڭا ۇلگىدەگى عارىش كەمەسىنىڭ تانىستىرىلىمىن وتكىزدى. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. بۇل كەمە وسىدان بىر جارىم جىل بۇرىن اپاتقا ۇشىراعان ۇلگىسىنىڭ ورنىنا شىعارىلىپ وتىر. عارىش كومپانياسىنىڭ يەسى بريتانيالىق ميللياردەر ريچارد برەنسون لوس-اندجەلەسكە جاقىن ماڭدا ورنالاسقان سىناق ورتالىعىنداعى ۇشاق تۇراقتاردىڭ بىرىندە  ماماندارعا, جۋرناليستەرگە جانە Virgin Galactic-ءتىڭ الەۋەتتى تۇتىنۋشىلارىنا كورسەتتى. سىرتقى ءتۇرى بويىنشا كەمەنىڭ 2014 جىلى قازاندا كاليفورنيانىڭ وڭتۇستىگىندەگى موحاۆە شولىندە ۇشۋ سىناعى كەزىندە قيراپ قالعان بۇرىنعى ۇلگىسىنەن ەش ايىرماشىلىعى جوق. زەرتتەۋشىلەر ونىڭ اپاتقا ۇشىراۋىنا نەگىزىنەن ۇشقىشتاردىڭ قاتەلىگى سەبەپ بولعان دەپ وتىر. ناتيجەسىندە ولاردىڭ ءبىرى قازا تاۋىپ, ەكىنشىسى جاراقات العان. Virgin Galactic وكىلدەرى, اپاتتان كەيىن ونىڭ سەبەپتەرى انىقتالىپ, ءتيىستى قورتىندىلار جاسالعانىنا جانە جاڭا نۇسقاسى – VSS Unity اتاعىنا يە بولعان SpaceShipTwo كەمەسىنىڭ قايتا قۇراستىرىلعاندا قاۋىپسىزدىكتىڭ بارىنشا ساقتالعانىنا سەندىرىپ وتىر. ونىڭ كوپ قىزمەتى ەندى اۆتوماتتاندىرىلعان. بىرقاتار مىندەتتەردى ورىنداۋ بارىسىندا ۇشقىشتى ارنايى ورناتىلعان كومپيۋتەر ساقتاندىرىپ وتىرادى. قۇراستىرۋشىلار ازرىگە ونىڭ ۇشۋ سىناعى قاشان بولاتىنىن ايتپادى. بۇقارالىق اقپارات قۇرالدارىنىڭ ايتۋىنشا, وسى جىلدىڭ سوڭىنا دەيىن جۇزەگە اساتىن كورىنەدى. كوپتەگەن اقش-تىڭ عارىش سالاسىنىڭ ساراپشىلارى 2014 جىلعى Virgin Galactic كەمەسىنىڭ اپتىنان كەيىن كومپانيا بەدەلى ايتارلىقتاي تومەندەگەنىن مالىمدەدى. ولار بۇل جوبانى اقتاپ الۋدىڭ جالعىز جولى جاڭا ۇلگىنى سىناقتان ءساتتى وتكىزۋ دەيدى. SpaceShipTwo تەك تۋريستىك ماقساتقا عانا ارنالىپ دايىندالادى. ساياحاتشىلارعا ەكى ساعات بويى ءجۇز شاقىرىم بيىكتىكتەن جەردى تاماشالاۋ قۇنى 250 مىڭ بولادى دەپ جوسپارلانىپ وتىر. كەمە بورتى ەكى ۇشقىش پەن التى جولاۋشىعا عانا ارنالعان دەگەن بولجام بار. وسىنداي جولمەن عارىشتا بولىپ قايتۋعا تىلەك ءبىلدىرىپ وتىرعاندار سانى 800-دەن استى. ولاردىڭ اراسىندا توم حەنكس پەن اندجەلينا دجولي سەكىلدى بەلگىلى اكتەرلەر بار. ايان ءابدۋالي. دەرەك, سۋرەت: تاسس.