يتاليان جازۋشىسى ۋمبەرتو ەكو قايتىس بولدى

استانا. 20 اقپان. يتاليانىڭ بەلگىلى جازۋشىسى ۋمبەرتو ەكو 84 جاسىندا قايتىس بولدى. بۇل تۋرالى ras.kz سايتىنا سىلتەمە جاساعان egemen.kz ءتىلشىسى حابارلادى. ول الەسساندريانىڭ پەمونتە قالاشىعىندا دۇنيەگە كەلىپ, 1954 جىلى تۋرين ۋنيۆەرسيتەتىن «ورتاعاسىر فيلوسوفياسى مەن ادەبيەتى» ماماندىعى بويىنشا بىتىرگەن. بولون ۋنيۆەرسيتەتىنىڭ پروفەسسورى, كوپتەگەن شەتەلدىك اكادەميالاردىڭ قۇرمەتتى دوكتورى ۋمبەرتو ەكو تەلەۆيدەنيەدە جۇمىس ىستەدى, كەڭىنەن تانىمال «ەسپرەسسو» اپتالىعىن قۇردى, ميلان جانە فلورەنتسيا ۋنيۆەرسيتتەرىندە ساباق بەردى. فيلوسوفيالىق-دەتەكتيۆتى تاريحقا نەگىزدەلگەن «راۋشان گۇلدىڭ اتى» (1980) رومانى ونىڭ الەم ادەبيەتىندەگى داڭقىن اسىردى. 1983 جىلى جازۋشى «راۋشان گۇلدىڭ اتى» اياسىنداعى ەستەلىكتەرىندە» ءوزىنىڭ روماندى جازۋ بارىسىنداعى كەيبىر قۇپيالارىن ايتىپ, ادەبيەتتەگى اۆتور, وقىرمان, شىعارما اراسىنداعى بايلانىس تۋرالى وي تولعانىستارىن ءبولىستى. شون كوننەري مەن وپەرا ءانشىسىنىڭ بالاسى فەدور ءشالياپيندى قاتىستىرا وتىرىپ, فرانتسۋز رەجيسسەرى جان-جاك اننو 1986 جىلى روماندى ەكرانعا شىعاردى. قالامگەردىڭ بۇدان كەيىنگى جىلدارى جازىلعان «فۋكو ماياتنيگى» (1988), «قارساڭداعى ارال» (1994), «باۋدولينو» (2000), «لوانا پاتشايىمىنىڭ قۇپيا جالىنى» (2004), «پراگا قابىرى» (2010) روماندارى دا جاقسى باعاعا يە بولدى. ال 2015 جىلى قاڭتاردا جازۋشىنىڭ «العاشقى ءنومىر» اتتى سوڭعى رومانى جارىق كورگەن بولاتىن. ايان ءابدۋالي. دەرەك, سۋرەت: تاسس.