باستى تالاپ – زاڭنامانى ورىنداۋ

قازاقستان پرەزيدەنتى جانىنداعى ورتالىق كوممۋنيكاتسيالار قىزمەتى وبلىستىق فيليالىندا سايلاۋدى بايقاۋ جۇمىسىنىڭ ماقساتتارى مەن مىندەتتەرى تانىستىرىلدى. سايلاۋدى بايقاۋ جونىندەگى رەسپۋبليكالىق قوعامدىق كوميسسيا وبلىستىق فيليالىنىڭ ءتورايىمى ۆەرا شوحينا قوعامدىق كوميسسيا ءوز جۇمىسىن رەسمي تۇردە باستاعانىن, بۇگىنگى كۇنى بايقاۋشىلاردى ىرىكتەۋ جۇمىستارى جۇرگىزىلىپ جاتقانىن ءمالىم ەتتى. كوميسسيا جۇمىسىنىڭ ماقساتى – وڭىرىمىزدە سايلاۋدى بايقاۋ جونىندەگى رەسپۋبليكالىق قوعامدىق كوميسسيانىڭ جۇيەلى جۇمىسىن, ونىڭ ميسسيالارىنىڭ ورىندالۋىن قامتاماسىز ەتۋ. بايقاۋشى بارلىق كەزەڭدە سايلاۋ ۇدەرىسىنىڭ بارىسىنا ساراپتاما جۇرگىزىپ, سايلاۋدىڭ اشىقتىعىنا, زاڭنامانىڭ ساقتالۋىنا قولعابىس ەتەدى. ۇمىتكەرلەردىڭ قۇقىقتارى بۇزىلماي, جاعدايلارى تەڭ, ادىلەتتى بولۋى دا بايقاۋشى نازارىندا. ۆ.شوحينانىڭ ايتۋىنشا, بۇگىنگى كۇننەن باستاپ بايقاۋشىلاردى ىرىكتەۋ ماقساتىندا كوميسسيا مۇشەلەرى اۋىل-ايماقتارعا بارادى. بايقاۋشىلاردى تاڭداۋدا ولاردىڭ ۋچاسكەلىك كوميسسيا مۇشەلەرى, ۇمىتكەرلەردىڭ سايلاۋالدى شتابى قۇرامىندا بولماۋى جانە ەشقانداي پارتيانىڭ ەرىكتىسى بولماۋى ماڭىزدى. بايقاۋشىلار ىرىكتەلگەن سوڭ, سەمينار-ترەنينگتەر ارقىلى وقىتىلادى. سايلاۋدىڭ ءوتۋ بارىسى تۋرالى ەرەجەلەرمەن تولىق تانىسۋى ءۇشىن ادىستەمەلىك قۇرالدار تاراتىلادى. ولارعا قويىلاتىن باستى تالاپ – «سايلاۋ تۋرالى» زاڭدى مۇلتىكسىز ورىنداۋ. وقۋ قورىتىندىسىنان كەيىن بايقاۋشىلار تەستىلەۋدەن ءوتىپ, سايلاۋ كۇنى ءار سايلاۋ ۋچاسكەسىندە جۇمىس ىستەيدى. ەلميرا نۇعمانوۆا, جۋرناليست. تەمىر قۇسايىن, «ەگەمەن قازاقستان». ورال.