جايساڭ جان جابىقپايدى

«تاۋەكەل ءتۇبى جەل قايىق, وتەسىڭ دە كە­تەسىڭ. ۋايىم ءتۇبى تۇڭعيىق, تۇسەسىڭ دە با­تاسىڭ» دەگەن ءسوز قاراساي اۋدانى, بەرەكە اۋىلىنىڭ تۇرعىنى ءىى توپتاعى مۇگەدەك تۇرعان تاستانباەۆ سىندى ازاماتتارعا قاراپ ايتىلسا كەرەك. تۋمىسىنان ەڭبەكقور جان جاستىق شاعىندا جۇرگىزۋشى بولىپ ەڭبەك ەتىپ ءجۇرىپ ءتۇرلى سەبەپتەرمەن جابىسقان اۋرۋعا مويىماي, كەرىسىنشە, جىگەرىن جانىپ, قوس پەرزەنتىن قالايدا تارىقتىرماۋعا بارىن سالا ءبىلدى. ءمۇجىلىپ ۇيدە جاتپاي, ىزدەندى. مىنە, سول ءبىر قىسىلتاياڭ كەزدە مەملەكەتتەن قولداۋ كوردى. اۋىل شارۋاشىلىعىن قولداۋ قورىنان 6 پا­يىزدىق جەڭىلدىكپەن 3 ملن. تەڭگە كولەمىندە نەسيە الۋ مۇمكىندىگىنە يە بولدى. ءسويتىپ, 2015 جىلدىڭ قاراشا ايىندا «جۇمىسپەن قامتۋدىڭ جول كارتاسى-2020» باعدارلاماسىنىڭ ەكىنشى باعىتى بويىنشا قولىنا تيگەن قاراجاتقا ەش كىدىرىسسىز 10 سيىر, 3 بۇزاۋ ساتىپ الدى. قىس قامىن جاز ويلاي بىلگەندىكتەن جيناپ العان مال ازىعى ءدال وسى كەزدە قاجەتىنە جاراۋدا. باعىمى جاقسى بولعاندىقتان ساۋىن سيىرلارى نيەتىنە وراي ماڭىزدى سۇتتەن بۇلاق اعىزدى. ءونىمدى اۋىلدى ارالاپ ءسۇت جينايتىن ءسۇت زاۋىتىنىڭ ادامدارىنا ءتيىمدى باعامەن ساتىپ تا وتىرعان جايى بار. «مەنىڭ اكەمدەي بولعان تۋعان اعام جارىمجان بولىپ قالدىم دەپ جابىققان جوق. قايتا جىگەرلەنىپ, ءبىزدى دە قايراپ, جايساڭدىعىنان جاڭىلمادى. ارينە, بۇل رەتتە اعاما مەملەكەت تاراپىنان قولداۋ كورسەتىلگەنى عالامات بولدى. جۇمىستىڭ كوزىن تاۋىپ, ەڭبەكتەنە ءبىل­گەندىكتەن العان نەسيەسىن دە ۋاقتىلى تولەپ, ءبىزدى دە اسىراپ وتىر», دەيدى تۋعان قارىنداسى مارجان جانبوسىنوۆا. نەگىزى اۋىلدا بولسىن, قالادا بولسىن ەڭبەك ەتەمىن دەگەن ادامعا سان ءتۇرلى قولداۋ كور­سەتىلىپ, جاعداي جاسالىپ جاتقانى ءمالىم. سول ەلدىڭ ىشىندە جاسى الپىستى القىمداسا دا مۇقالماي مەملەكەتتىك قولداۋدى ۇتىمدى پايدالانا بىلگەن تۇرعان تاستانباەۆتاي ازاماتتار ۇلگى تۇتۋعا لايىق. نۇربول الدىباەۆ, «ەگەمەن قازاقستان». الماتى وبلىسى, قاراساي اۋدانى.