ەكىباستۇزدىڭ ميلليون-ميلليون راۋشان گۇلدەرى

الدا كەلە جاتقان ايەلدەر مەرەكەسى كۇنى ەكىباستۇزدىقتار قىز-كەلىنشەكتەردى ءوز قالالارىندا وسىرىلەتىن راۋشان گۇلدەرىن ساتىپ الىپ قۋانىش سىيلاماقشى.  قالاداعى «بولات نۇرجانوۆ اتىنداعى ەكىباستۇز گرەس-1» سەرىكتەستىگى ماڭىندا ورنالاسقان «Green نouse KZ» سەرىكتەستىگىندە الىپ جىلىجاي كەشەنى اشىلدى. جىلىجاي شىنىدان تۇرعىزىلعان. الىپ ستانسا تۇربالارىنىڭ تۇبىندەگى كەشەندە گۇلدەر دە جارىسا وسەدى. بىزدە گۇل ءوسىرۋ نارىعىنىڭ باسەكەلەستىگى ەندى-ەندى باستالىپ كەلەدى. ەكىباستۇزدىق راۋ­شان دا نارىققا توتەپ بەرمەك. ءارى ۇكىمەتتىڭ كاسىپورىندار جانىنان قوسىمشا ءوندىرىس نىساندارىن اشۋ تۋرالى تاپسىرماسى دا بار. جالپى, جىلىجايدىڭ قۇرىلىسىمەن گوللانديالىق كومپانيا اينالىستى. كومىرىمەن اتى شىققان قالا ەندى راۋشان گۇلدەرىمەن دە اتىن شىعارماق. بۇل جىلىجايدا ەندى گول­لان­ديالىق تاسىلمەن القىزىل راۋ­شان گۇلدەرى وسىرىلەدى. ال, ەلەكتر ستانساسى بولسا, جىلىجايدى سۋمەن, ەلەكتر جانە جىلۋ ەنەر­گياسىمەن قامتاماسىز ەتەدى. گۇل وسەتىن كەشەن تولىقتاي اۆتو­ماتتاندىرىلىپ, شەتەلدىك قۇ­رال­دارمەن جابدىقتالدى. قالا اكىمى الەكساندر ۆەربنياكتىڭ ايتۋىنشا, راۋشان گۇلدەرىن وسىرۋدە جاڭا زامان تەحنولوگياسى قولدانىلادى. قاراشا ايىندا 5 گەكتار جەرگە العاشقى كوشەتتەر وتىرعىزىلدى. گۇلدەر ەگىلەتىن القاپقا 5 مۆت ەنەرگيا قۋاتى جەتكىلىكتى كورىنەدى. تاڭعالارلىق گۇلدەر جىلىجايىنىڭ اشىلۋىنا وبلىس اكىمى قانات بوزىمباەۆ قاتىستى. ارينە, گوللانديا تەحنولوگياسىمەن وسىرىلەتىن راۋشان گۇلدەرى كومىرلى ءوڭىردىڭ جاڭالىعى. بۇعان دەيىن جامبىل وبلىسىندا تارازدا ءوسىرىلدى. ەكىباستۇزدىقتار دا ساپاسى گوللانديالىقتان كەم بولمايتىن راۋشانداردى ءوسىرۋدى قولعا الدى. گۇل وسىرۋشىلەردىڭ ايتۋىنشا, بيولوگيالىق قورعاۋ ادىستەرىن ءتيىمدى, دۇرىس قولدانسا, راۋشان گۇلدەرى گوللاندياداعى سياقتى بيىك بولىپ وسەدى ەكەن. راۋشان گۇلدەرىن ءوسىرۋدىڭ تاعى ءبىر ەكىباستۇزدىق جاڭالىعى ول – توپىراقسىز, سۋدا, تامشىلاتىپ سۋارۋ ارقىلى ارنايى ماتەريالدا گۇل جارادى. اليۋمينيدەن قۇراستىرىلعان ارنايى قوندىرعىلار 80 پايىزعا دەيىن كۇننەن جىلۋ الادى. – جۇمىسقا ەرەكشە كوڭىل-كۇيمەن كەلەمىز. اينالا راۋشان گۇلدەرىنىڭ ورتاسىندا جۇرگەننىڭ ءوزى ءبىر راحاتقا بولەيدى. راۋشان گ ۇلى كۇتىمدى وتە قاجەت ەتەتىن نازىك گۇل. ۋاقتىلى سۋارىپ, جارىعىن ءتۇسىرىپ, سۋىقتان قورعاۋ كەرەك. ايتپەگەندە لەزدە سولىپ قالادى. جىلىجايدا ەكى اپتاداي ءومىر سۇرەدى, – دەيدى گۇل وسىرۋشىلەر. ال, جىلىجايدىڭ جوبالىق قۋا­تى جىلىنا 10 ميلليون دانا گۇل وسىرۋگە جەتەدى ەكەن. تەك وتكى­زۋىن ءبىل. الاڭى 5 گا جەردى الىپ جاتىر. راۋشان گۇلدەر-ەلىمىز­دىڭ, رەسەيدىڭ نارىعىنا ساتىلادى دەپ جوسپارلانۋدا. ەلىمىز تۇر­عىن­دارىنىڭ گۇلدەرگە دەگەن سۇ­رانىسى 120 ميلليوندى قۇراي­دى ەكەن. ەكىباستۇزدا راۋشان گ ۇلى­نىڭ جوعارى سۇرانىسقا يە «Red Naomi» دەگەن سورتى وسىرىلەدى. ياعني, بۇل سورتتى راۋشان گ ۇلىنىڭ سا­باعى 90 سانتيمەترگە جەتەدى. ءوسىم­دىكتى كەسىپ, جيناپ العان سوڭ, ار­نايى توڭازىتقىشتاردا ساقتا­لادى. ۇيدەگى گۇلسالعىش ىدىس­تاردا 14 كۇن بويى تۇرا الادى. جى­لى­جاي شارۋاشىلىعىندا قازىر 70 جاڭا جۇمىس ورنى اشىلدى. جو­باعا 3 ملرد. تەڭگەدەن استام ين­ۆەستيتسيا سالىندى. جاڭا كاسىپ­ورىننىڭ باسشىسى ايتما­عانبەت سارسەنبەك ۇلىنىڭ ايتۋىن­شا, ينۆەستورلار جىلىجاي كەشەنى­نىڭ اۋماعىن 30 گەكتارعا دەيىن كەڭەي­تىپ, «بيزنەستىڭ جول كارتاسى-2020» باعدارلاماسى شەڭبەرىندە ين­فرا­قۇرىلىم سالۋدى جوسپارلاپ وتىر. جىلىجاي كەشەنىن جوبالاۋ جۇمىستارىن گوللاندىق «VAN DER HOEVEN» كومپانياسى جۇرگىزدى. وبلىستا قازىر 12 جىلىجاي بار. ەندى اقسۋ قالاسىندا قيار مەن قىزاناق وسىرەتىن جىلىجاي كەشەنىنىڭ قۇرىلىسىن سالۋ بويىنشا ينۆەستيتسيالىق جوبا جۇزەگە اسىرىلۋدا. ينۆەستيتسيالاردىڭ جالپى كولەمى 2,4 ملرد. تەڭگە. فاريدا بىقاي, «ەگەمەن قازاقستان». ەكىباستۇز. سۋرەتتەردى تۇسىرگەن ۆالەري بۋگاەۆ.