بەلارۋس قازاقستان تاجىريبەسىنە زەر سالدى

بەلارۋس رەسپۋبليكاسى پرەزيدەنتى جانىنداعى اكادەميادا استاناداعى مەملەكەتتىك قىزمەت سالاسىنداعى وڭىرلىك حاب باسقارۋشى كوميتەتى توراعاسى ءاليحان بايمەنوۆ قازاقستانداعى مەملەكەتتىك قىزمەت جۇيەسىن رەفورمالاۋ تۋرالى ءدارىس وقىدى. ءا. بايمەنوۆ قازاقستان مەملە­كەتتىك قىزمەت سالاسىندا وتكەن رەفورمالاردىڭ باستى كەزەڭدەرىنە توقتالا وتىرىپ, «100 ناقتى قادام» ۇلت جوسپارىنىڭ اياسىندا وسى سالادا جۇزەگە اسىپ جاتقان شارا­لارمەن تانىستىردى. ول مەملە­كەتتىڭ دامۋىنا سەرپىن بەرەتىن, ونىڭ ىشىندە مەملەكەتتىك قىزمەتتە لايىقتى مامانداردىڭ ىرىكتەلۋىنە, ولاردىڭ مەريتوكراتيا قاعيداتىنا ساي ىلگەرىلۋىنە جول اشاتىن باس­قا­رۋشىلىق شەشىمدەردىڭ ماڭىز­دىلىعىن اتاپ ءوتتى. سونداي-اق, مەملەكەتتىك باسقارۋ سالاسىنداعى مەنەدجمەنت جانە اكىمشىلىك راسىمدەر ماسە­لە­لەرى قارالدى. اكادەميا تىڭداۋشىلارى قا­زاق­ستانداعى مەملەكەتتىك قىز­مەت­كەرلەردى ىرىكتەۋ مەحانيزم­دەرى, مەملەكەتتىك اپپاراتتا سى­بايلاس جەمقورلىققا قارسى سايا­ساتتى قولدانۋ, سىبايلاس جەم­قورلىق ارەكەتتەردىڭ الدىن الۋ بويىنشا ۋاكىل ينستيتۋتىن ەنگىزۋ باستامالارىنا قىزى­عۋ­شىلىق تانىتتى. بەلارۋس رەسپۋبليكاسىنداعى بۇۇ دامۋ باعدارلاماسى ۇيىم­داستىرعان ساپار بارىسىندا ءالي­حان بايمەنوۆ بۇۇ دب تۇراقتى وكىلى ساناكا ساماراسينحامەن كەزدەستى. سونىمەن بىرگە بەلارۋس رەسپۋبليكاسىنىڭ بىرقاتار مەم­لەكەتتىك ورىندارىنىڭ جەتەك­شى­لەرىمەن كەزدەسۋ وتكىزىلىپ, ولار قازاقستاننىڭ مەملەكەتتىك قىز­مەت سالاسىنداعى تاجىريبەسىنە ايرىق­شا قىزىعۋشىلىق تانىتىپ, مەملە­كەتتىڭ وسى سالاداعى تابىسى مەن وڭىرلىك حابتىڭ ءبىلىم مەن ءتاجى­ريبە الماسۋدىڭ حالىقارالىق تۇعىر­ناماسى رەتىندەگى جوعارى الەۋەتىن اتاپ ءوتتى. قازىرگى تاڭدا استانا حابىنا ەكونوميكالىق ىنتى­ماقتاستىق جانە دامۋ ۇيى­مى, تمد, ورتالىق ازيا جانە ASEAN مەملەكەتتەرىن قامتي­تىن 32 قاتىسۋشى مەملەكەت پەن 5 حالىقارالىق ۇيىم كىرەدى. استاناداعى مەملەكەتتىك قىز­مەت سالاسىنداعى وڭىرلىك حاب ايماق­تاعى ەلدەر مەملەكەتتىك قىزمەت بويىنشا ۇزدىكسىز تاجىريبە مەن ءبىلىم الماسۋى ءۇشىن ينستيتۋتتىق نەگىز رەتىندە قۇرىلعان. رۋسلان يگىلىك.