قازاقستان رەسپۋبليكاسى ءبىلىم جانە عىلىم مينيسترلىگىنىڭ ەلىمىزدىڭ وقۋشىلار, ستۋدەنتتەر, ۇستازدار, اتا-انالار قاۋىمىن جاڭا 2011-2012 وقۋ جىلىمەن قۇتتىقتاۋى
قىمباتتى وقۋشىلار, ستۋدەنتتەر!
قۇرمەتتى ۇستازدار, اتا-انالار قاۋىمى!
تۋعان ەلىمىز – قازاقستان رەسپۋبليكاسى تاۋەلسىزدىگىنىڭ 20 جىلدىعى قارسانىندا تاعى دا ءبىر وقۋ جىلىن وزدەرىڭىزبەن باستاعالى وتىرمىز.
قىمباتتى وقۋشىلار مەن ستۋدەنتتەر, ءبىرىنشى سىنىپقا اياق باسقان بۇلدىرشىندەر مەن بيىل ستۋدەنت اتانعان جاستار, سىزدەردى ءبىلىم كۇنى مەرەكەلەرىڭىزبەن قۇتتىقتايمىز!
قازىرگى كەزدە ساپالى ءبىلىم الۋ ءۇشىن ەلباسىمىز ن.ا.نازارباەۆتىڭ قولداۋىمەن بارلىق جاعدايلار جاسالۋدا. جاڭا ءبىلىم بەرۋ ۇيىمدارى, ينتەرناتتار مەن جاتاقحانالار بوي تۇزەپ, ولاردىڭ بارلىعى سوڭعى ۇلگىدەگى جاڭا تەحنولوگيالارمەن جابدىقتالۋدا.
سوندىقتان, سىزدەردىڭ بىلىمدەرىڭىز بەن جەتىستىكتەرىڭىز تاۋەلسىز قازاقستاننىڭ الەمدىك قاۋىمداستىق الدىنداعى بەدەلىنىڭ ودان ءارى ارتا تۇسۋىنە قوسىلاتىن ۇلەس بولادى دەگەن سەنىمدەمىز.
قۇرمەتتى ۇستازدار!
وتكەن جىلدىڭ اياعىندا مەملەكەت باسشىسىنىڭ جارلىعىمەن ءبىلىم بەرۋدى دامىتۋدىڭ 2020 جىلعا دەيىنگى مەملەكەتتىك باعدارلاماسى قابىلداندى. ەلباسىنىڭ بيىلعى «بولاشاقتىڭ ىرگەسىن بىرگە قالايمىز» اتتى جولداۋىندا ءبىلىم سالاسىنا ەرەكشە كوڭىل اۋدارىلدى. «نۇر وتان» پارتياسىنىڭ ءحىىى سەزىندە مەملەكەت دامۋىنىڭ نەگىزگى كىلتى رەتىندە ادام قۇندىلىعى مەن ءبىلىم ەكەندىگى باستى نازاردا بولدى. وسىنداي وقيعالار قوعامداعى ءبىلىمنىڭ الاتىن ورنىن انىقتاپ وتىر. تاۋەلسىزدىگىمىزدىڭ 20 جىلدىعىندا قازاقستان ءبىلىم سالاسىندا بيىك بەلەستەردى زور ابىرويمەن باعىندىردى دەپ ماقتانىشپەن ايتا الامىز. الداعى ۋاقىتتا ءبىزدىڭ الدىمىزدا تۇرعان باستى مىندەت – ءبىلىم سالاسىن جاڭا مازمۇنمەن جانە ساپامەن تولىقتىرۋ. مۇنداي يگىلىكتى ءارى ماڭىزدى ءىستىڭ جەمىسىن ءسىزدەردىڭ كاسىبي تالانتتارىڭىز بەن شەبەرلىكتەرىڭىزدىڭ ارقاسىندا عانا كورە الاتىندىعىمىز بارشاعا ايان. سوندىقتان دا, سىزدەرگە جاڭا وقۋ جىلى شىعارماشىلىق تابىس پەن ساتتىلىك اكەلسىن دەمەكپىز!قۇرمەتتى اتا-انالار!
ەل تاۋەلسىزدىگىنىڭ 20 جىلدىعى قارساڭىندا ءبىز قازاقستان تاريحىندا العاشقى رەت جارقىن بولاشاعىمىز – بالالارىمىز ءۇشىن بارشا قازاقستان قاۋىمىن كۇش بىرىكتىرۋگە شاقىرعان پەداگوگيكالىق فورۋمدى ۇزدىك مۇعالىمدەردىڭ, اتا-انالار قاۋىمداستىعىنىڭ, بيزنەس جانە ازاماتتىق قوعام وكىلدەرىنىڭ قاتىسۋىمەن وتكىزدىك. ءبىزدىڭ ارقايسىمىزدىڭ باستى تىلەگىمىز – بۇلدىرشىندەرىمىزدىڭ باقىتتى بالالىق شاعى, لايىقتى ءبىلىم الۋى جانە سۇيىكتى وتانىمىزدىڭ تولىققاندى ازاماتىنا اينالۋى. تەك قانا ءبىلىمدى جانە تاربيەلى ۇرپاق قازاقستان حالقىنىڭ ماقتانىشى بولماق. سوندىقتان سىزدەرگە دە ۇرپاق تاربيەلەۋ جولىنداعى ەڭبەكتەرىڭىز جانا بەرسىن دەمەكپىز. جاڭا وقۋ جىلى بارشامىزعا جەتىستىكتەر مەن تابىستار اكەلە بەرسىن!
