پارتياعا جۇگىنەتىندەردىڭ كوبەيگەنى – بىزگە سەنگەنى

«نۇر وتان» پارتياسىنىڭ الماتى قالاسىنداعى اۋەزوۆ اۋداندىق فيليالىندا ازاماتتاردىڭ ءوتىنىش-ارىزدارىن جەرگىلىكتى اتقارۋ ورگاندارىنىڭ قاراۋى جونىندەگى اۋداندىق پارتيالىق باقىلاۋ كوميسسياسىنىڭ وتىرىسى ءوتتى. كۇن تارتىبىندە ءتورت ماسەلە قارالدى. تالقىلانعان تاقىرىپتاردىڭ ەكەۋى اشىق قارالسا, پارتيانىڭ ىشكى جۇمىستارىنا قاتىستى ەكى ماسەلە جابىق ەسىك جاعدايىندا ءوتتى. ءبىرىنشى كەزەكتە جەرگىلىكتى تۇرعىندار پارتيانىڭ اۋداندىق بولىمشەسىنە كوبىنەسە قانداي ارىز-تىلەكتەرمەن كەلەدى جانە وسىنىڭ ناتيجەسى نەندەي ەكەنى ءسوز بولىپ, وسى سۇراققا قاتىس­تى پار­تيانىڭ اۋداندىق فيليا­لىنىڭ 2015 جىلعى ەسەبى تىڭ­دالدى. سوندىقتان, وتىرىسقا اۋدان اكىمدىگىنىڭ, ءبىلىم باسقارماسىنىڭ, دەنساۋلىق ساقتاۋ سالاسى مەن حالىققا تۇرمىستىق قىزمەت كورسەتەتىن سالالار باسشىلارى شاقىرىلدى. اۋداندا سالاعا جەتەكشىلىك ەتىپ وتىرعان ادامداردىڭ بارلىعى 2015 جىلعا تولىققاندى ەسەپ بەردى. وتكەن جىلى وسى مەكەمەلەر بويىنشا كوبىنەسە قانداي ارىز-شاعىمدار بولدى جانە ولار قالاي شەشىم تاپتى؟ ازاماتتاردىڭ سۇرانىسى قانشا پايىزعا ورىندالدى؟ وسى سۇراقتارعا جاۋاپ بەرىلدى. سايلاۋ قارساڭىندا وتكىزىلىپ وتىرعان وتىرىستىڭ تاعى ءبىر ماقساتى – وسى ساياسي ناۋقان الدىندا پارتيا مۇشەلەرىنىڭ جاۋاپكەرشىلىگىن ارتتىرىپ, ءتارتىپتى قاتايتا ءتۇسۋ. ويتكەنى, بيلىك پارتياسى مۇنداي جاۋاپتى كەزەڭدە ءوز بەدەلىنە دە كوپ جۇمىس ىستەيتىنى بەلگىلى. پارتيا مۇشەلەرىنىڭ جۇمىلاتىن كەزى دە وسى. – ءبىزدىڭ الماتى قالاسى اۋەزوۆ اۋدانى بويىنشا پارتيانىڭ اتىنا وتكەن جىلى 1 مىڭعا جۋىق ارىز-شاعىم, ءوتىنىش ءتۇستى. پايىزعا شاعىپ قارايتىن بولساق, ماسەلەنىڭ كوبى تۇرعىن ءۇي-كوممۋنالدىق شارۋاشىلىقتارىنا قاتىستى بولىپ كەلەدى. سول سياقتى, ءبىلىم بەرۋ مەن دەنساۋلىق ساقتاۋ سالالارىنا بايلانىستى تۇيتكىلدەر كوپ. وعان قوسا, ازاماتتاردىڭ وتىنىشتەرى مەن ارىزدارىنىڭ ءبىر بولىگى جۇمىسپەن قامتاماسىز ەتۋ ماسەلەسىنە جاتادى. ال ءبىزدىڭ مىندەت – تۇرعىندار تاراپىنان ءتۇسىپ جاتقان سۇرانىستاردىڭ شەشىمىن تابۋ. پارتياعا ارىزدانىپ كەلگەن ادامداردىڭ ىستەرىن اياقسىز قالدىرماۋعا تىرىسامىز. جىلدان-جىلعا پارتياعا جۇگىنەتىندەر مەن ارىز سانى دا كوبەيىپ كەلەدى. بۇل – تۇك جۇمىس اتقارىلماي جاتىر دەگەن ءسوز ەمەس, كەرىسىنشە, پارتياعا ازاماتتاردىڭ سەنىمى ءوستى دەگەن ءسوز, – دەيدى اۋەزوۆ اۋداندىق پارتيالىق باقىلاۋ كوميسسياسىنىڭ توراعاسى تولەۋعالي تايتولەەۆ. ال جابىق ەسىك جاعدايىندا وتكەن كۇن تارتىبىندەگى ەكى ماسەلەگە كەلسەك, زاڭ بويىنشا جىل سايىن پارتيانىڭ باقىلاۋ كوميسسياسىنىڭ مۇشەلەرى اۋىسىپ وتىرادى. سونىمەن, ونىڭ ەكى مۇشەسى جاڭاردى. سونداي-اق, پارتيانىڭ جاڭا جىلداعى ءتارتىبى بويىنشا, كوميسسيا توراعاسىنىڭ ورىنباسارى تاعايىندالۋى ءتيىس. ايناش ەسالي, «ەگەمەن قازاقستان». الماتى. سۋرەتتى تۇسىرگەن يۋري بەككەر.