فينليانديا دا الىس ەمەس

قازىر ماڭدايدى شىت ورامالمەن شارت بايلاپ, شاپاننىڭ ءبىر ەتەگىن بەلبەۋگە قىستىرىپ, كولدەي ورامالمەن ماڭدايدىڭ تەرىن ءبىر ءسۇرتىپ, اي ءجۇزدى كەتپەنمەن جەر اۋدارۋ وتكەن شاق بولىپ قالدى. تىڭايتقىش دەگەندە قوي, سيىردىڭ قىس بويعى جينالعان كوڭىن ايدالعان جەرگە توگىپ, تىڭايتقىش بەردىم دەپ مالدانۋدىڭ دا كۇنى كەلمەسكە كەتىپ بارادى. جاڭا تەحنولوگياسى قارىش­تاپ دامىعان امەريكا, ەۋرو­پا جانە قىتاي شارۋالارى جەرىنەن ءبىر ۋىس توپىراق الىپ توپىراق زەرتتەۋ ينستيتۋ­تىنا تاپسىرادى. زەرتتەۋدىڭ ناتيجەسى بويىنشا جەرىڭ جىل سايىن سالاتىن كوڭگە ءزارۋ ەمەس, اعزاسى باسقا تىڭايتقىشتاردى قالايدى ەكەن. وسىلايشا, باياعىداي دەمالدىرۋعا بوس تاناپ قالدىرماي جىل سايىن مول ءونىمنىڭ استىندا قالاسىز. مول ءونىم – مول تابىس. وڭ­تۇستىكتە تامشىلاتىپ سۋارۋ مەن مينەرالدى تىڭايتقىشتاردى پايدالانۋ بويىنشا اۋىل­شا­رۋاشىلىق سەمينارى وتكەندە جوعارىداعى جايتتار تاعى دا بايقالىپ قالدى. وبلىستىق كاسىپكەرلىك مەكتەبى مەن «كوس­اگروكوممەرتس» كومپانياسى بىرلەسىپ وتكىزگەن سەميناردا ديقاندارعا جابىق توپىراقتا قىزاناق, قيار جانە الما ءتۇپ­تەرىن تامشىلاتىپ سۋارۋدا سۋدا تەز ەريتىن Calcinit پەن Kristalon تىڭايتقىشتارىنىڭ جاڭا تۇرلەرى تانىستىرىلدى. سە­مينارعا ارنايى شاقىرىلعان فينليانديالىق «Yara» كومپانياسىنىڭ وكىلى ۋللا سۋندەل IOS جانە Android پلاتفورمالارىنان تابۋعا بولاتىن «Yara CheckIT» ءموبيلدى قوسىمشاسىن دا تانىستىردى. باعدارلامانىڭ ىشىندە وسىمدىكتىڭ اۋرۋعا شالدىعۋىنىڭ سەبەبىن انىقتاپ, ونىڭ الدىن الاتىن ەمدەۋ امالدارى تۋرالى نۇسقاۋلىقتار ورنالاسقان. بۇل جوباعا دۇنيەجۇزىنىڭ ەلۋ مەملەكەتىنىڭ اگرونومدارى جوعارى باعا بەرگەندىگى ايتىلدى. ەندى اۋىل شارۋاشىلىعىنداعى الەمدىك جاڭا تەحنولوگيانىڭ جەتىستىگىن وڭتۇستىكقازاقستاندىق شارۋالار دا كورەتىن بولادى. بۇعان قوسا ايتارىمىز, وڭتۇستىك ديقاندارى از جەردەن كوپ داقىل الۋعا بولاتىن يتاليالىق تەحنولوگيانى ەركىن مەڭگەرگەن. ءسال جەل سوقسا ساۋ ەتىپ جەرگە توگىلەتىن, شۇرىق تەسىك المالار ورنىنا سىمعا كەرىپ ەرگەجەيلى بويلى الما كوشەتتەرىن كوپتەپ وتىرعىزىپ جاتىر. قوڭىر كۇزدە وسى ءالجۋاز كوشەتتەر شىبىعى جەرگە تيەردەي بولىپ جەمىس سالادى. ۇلكەندىگى كارلەن كەسەدەي, ءدامى جارتىسى بال, جارتىسى قانت. وبلىس اكىمدىگىنىڭ ۇيىتقى بولۋىمەن شەتەلدىك ۇزدىك تەحنولوگيا وڭتۇستىك جەرىن وسىلايشا جەرسىنىپ جاتىر. باقتيار تايجان, «ەگەمەن قازاقستان». وڭتۇستىك قازاقستان وبلىسى.