باۋىرلاستىق بايلانىس باسەڭدەمەيدى

مەملەكەت باسشىسى نۇرسۇلتان نازارباەۆ تۇرىك رەسپۋبليكاسىنىڭ پرەمەر-ءمينيسترى احمەت داۋىتوعلىمەن كەزدەستى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى. كەزدەسۋ بارىسىندا ەكىجاقتى ىنتى­ماق­تاستىقتىڭ نەگىزگى باعىتتارى, سونىڭ ىشىندە ساياسي ۇنقاتىسۋدى نىعايتۋ مەن مادەني الماسۋ ماسەلەلەرى, كولىك, ەنەرگەتيكا, تۋريزم جانە ينفراقۇرىلىم قالىپتاستىرۋ سالالارىنداعى بايلانىس­تاردى دامىتۋ جايى تالقىلاندى. مەملەكەت باسشىسى ا.ءداۋىت­وع­لىنىڭ ساپارى ءبىزدىڭ ەلى­مىز­دىڭ سىرت­قى ساياساتىندا تۇركياعا قا­تىس­تى با­عىت­تىڭ ماڭىزدىلىعىن اي­عاق­تاي­تىنىن ايتتى. – بيىل قازاقستان تاۋەلسىزدىگىنىڭ 25 جىلدىعىن اتاپ وتەدى. ەگەمەندىگىمىزدىڭ العاشقى كۇندەرىنەن ءبىز باۋىرلاس حا­لىقتارىمىزدىڭ جاقىنداسا تۇسۋىنە بار كۇش-جىگەرىمىزدى سالىپ كەلەمىز. وسى جىلداردا ءسىزدىڭ ەلدىڭ باسشىلىعىمەن تىعىز جۇمىس جۇرگىزە وتىرىپ, ءبىز ءبىر كەزدەردە ۇزاق ۋاقىت بويى ءۇزىلىپ قالعان قازاقستان مەن تۇركيا اراسىنداعى بايلانىستى قايتا قالپىنا كەلتىردىك. مەن تۇركى كەڭەسىنىڭ قۇرىلۋىنا باس­تاماشى بولدىم. بۇگىندە استانادا حالىقارالىق تۇركى اكادەمياسى جۇمىس ىستەيدى, وندا عالىمدار ءبىزدىڭ ەلدەرىمىزگە ورتاق مادەنيەت پەن تاريحتى زەرتتەۋدە. قازاقستان ءۇشىن تۇركيانىڭ ماڭىزى وتە زور, ءبىز ىنتىماقتاستىق ساياساتىنان ەشقاشان باس تارتپايمىز, – دەدى نۇرسۇلتان نازارباەۆ. سونداي-اق, قازاقستان پرەزيدەنتى تۇركيا توڭىرەگىندەگى شيەلەنىسكەن گەوساياسي جاعدايدىڭ ءبىزدىڭ ەلگە دە اسەرىن تيگىزەتىنىن اتاپ ءوتتى. – بۇگىندە قالىپتاسقان احۋالدان شىعۋ جولدارىن ىزدەستىرۋ قاجەت. بولىپ جاتقان جايتتاردىڭ كوپتەگەن سەبەپتەرى ءالى دە ايقىندالماي وتىر. سيريا مەن يراكتاعى قاقتىعىستار مۇ­سىلماندار اراسىندا بىرلىكتىڭ جوق ەكەنىن كورسەتتى. ءبىز سۇننيتتەر مەن شيتتەر اراسىندا بولۋى مۇمكىن دەپ باتىس بۇدان ىلگەرىرەكتە بولجاعان كەزەڭگە تاياپ كەلدىك. ءتۇر­كيا مەن رەسەي اراسىنداعى قارىم-قاتىناس­تىڭ كۇردەلەنۋى دە ءبىز ءۇشىن ۇلكەن پروب­­لەماعا اينالدى. ەكى ەل دە ءبىزدىڭ ماڭ­ىزدى وداقتاسىمىز بەن سەرىكتە­سىمىز بولىپ تابىلادى, – دەدى مەم­لەكەت باسشىسى. ا.داۋىتوعلى قازاقستانعا ساپارىن ءاردايىم ءوز وتانىنا كەلگەندەي باعالايتىنىن ايتتى. سونداي-اق, تۇركيا پرەمەر-ءمينيسترى قازاقستان حالقىن تاۋەلسىزدىكتىڭ 25 جىلدىعىنىڭ باستالۋىمەن قۇتتىقتاپ, نۇرسۇلتان نازارباەۆقا ەكىجاقتى قارىم-قاتىناستى نىعايتۋعا قوسقان زور ۇلەسى ءۇشىن العىس ءبىلدىردى. – قازاقستان مەن تۇركيا اراسىنداعى قارىم-قاتىناس بارلىق باعىت بويىنشا قارىشتى دامىپ كەلەدى. ءبىز كولىك, ەنەرگەتيكا جانە وزگە دە سالالاردا بىرلەسكەن جوبالاردى جۇزەگە اسىرىپ جاتىرمىز. ساۋدا بايلانىستارى دا نىعايۋدا. ەگەر تۇركيا – ەۋروپاعا اشىلعان «ەسىك» بولسا, قازاقستان – تۇركيا ءۇشىن ەۋرازيا كەڭىستىگىنە اپاراتىن جول, – دەدى ا.داۋىتوعلى.