باستى ماقسات – ەل ءۇمىتىن اقتاۋ

كەشە استانادا قازاقستان كوممۋنيستىك حالىق پارتياسىنىڭ (قكحپ) كەزەكتەن تىس ح سەزى ءوتتى. وعان پارتيا حاتشىلارى, قكحپ ورتالىق كوميتەتىنىڭ مۇشەلەرى, ۇيىمنىڭ وبلىستىق, قالالىق, اۋداندىق كوميتەتتەرىنىڭ دەلەگاتتارى قاتىستى. جيىندا پارتيانىڭ پارلامەنت ءماجىلىسى مەن بارلىق دەڭگەيدەگى ءماسليحاتتار سايلاۋلارىنا قاتىسۋى تۋرالى شەشىمى شىعارىلىپ, ۇيىمنىڭ سايلاۋالدى باعدارلاماسى قابىلداندى جانە ءماجىلىس دەپۋتاتتىعىنا كانديداتتاردىڭ پارتيالىق ءتىزىمى بەكىتىلدى. جيىندا ءسوز العان قا­زاقستان كوممۋ­نيستىك حالىق پارتياسىنىڭ جەتەكشىسى ۆلاديسلاۆ كوسارەۆ ەلباسى نۇرسۇلتان نازارباەۆتىڭ پارلامەنت ءما­جى­لىسىنىڭ سايلاۋىن كەزەكتەن تىس وتكىزۋ تۋرالى شەشىمى دەر كەزىندە قابىل­دان­عا­نىن ايتا كەلىپ, ۇيىمنىڭ العا قويىپ وتىرعان ماقسات-مىندەتتەرىن اتاپ كور­­سەتتى. «قازاقستان كوممۋنيستىك حالىق پار­­تياسىنىڭ الدىندا سايلاۋ ناۋقانىن ابى­رويمەن وتكىزۋ مىندەتى تۇر. ءبىزدىڭ پار­تيامىزدىڭ باستى مىندەتى – سايلاۋشى­لاردىڭ ءۇمىتىن اقتاپ, ەلدىڭ بىرلىگىن نىعايتۋ ماقساتىندا زاڭ شىعارۋشى ورگانعا جاڭا قۇراممەن تىڭ يدەيالاردى الىپ بارۋ», – دەدى ۆ.كوسارەۆ. سونىمەن قاتار, سپيكەر ۇيىمنىڭ باسىمدىق بەرىپ وتىرعان باعىتتارىنا توقتالدى. «ءبىزدىڭ پارتيا قوعامىمىزدا ءوزىن­دىك الەۋەتكە يە. ءبىز مەملەكەت باسشى­سىنىڭ جۇرگىزىپ وتىرعان ساليقالى ساياساتىن قۋاتتاپ ءارى حالقىمىزدىڭ بىرلىگى مەن ىنتىماعىنىڭ نىعايا تۇسۋىنە اتسالىسا بەرەمىز. سونداي-اق, ءبىز الدىڭعى قاتارلى 30 ەلدىڭ قاتارىنا قوسىلۋ ماقساتىندا با­تىل قادامدار جاساپ وتىرعان ەلىمىزدە ىسكە اسىرىلۋ ۇستىندەگى الەۋمەتتىك-ەكونو­مي­كالىق رەفورمالاردىڭ تابىستى جۇرگى­زىلۋىنە ءوز ۇلەسىمىزدى قوسقىمىز كەلەدى», – دەدى ول. ودان ءارى پارتيا جەتەكشىسى ۇيىمنىڭ نەگىزگى يدەيالىق ۇستانىمدارىن ءسوز ەتتى. «ءبىز سان عاسىرلار بويى ادامزاتتىڭ ويشىلدارىن باتىستىڭ تۇتىنۋشى مادەنيەتىنە قارسى جىگەرلەندىرگەن كوممۋنيزمنىڭ جا­سامپاز يدەيالارىنا بەرىكپىز. عىلىمي كوم­مۋنيزم ۇستانىمدارى تۇرعىسىنان قارا­عاندا, داع­دارىس جاھاندىق جانە ترانس­ۇلت­تىق كور­پوراتسيالاردىڭ باسىمدىعىن ءدا­لەل­دەي­تىن نەوليبەراليزم تەورياسىنىڭ قۇل­­دى­را­عانىن كورسەتەدى», – دەدى ۆ.كو­سارەۆ. سونىمەن قاتار, سپيكەر قازىرگى تاڭدا بۇكىل الەمدى الاڭداتىپ وتىرعان قارجى داع­دارىسى مەن ءتۇرلى سىن-قاتەرلەردى اتاپ ءوتتى. ەلبا­سى ۇسىنعان «100 ناقتى قادام» ۇلت جوس­پارى – داعدارىستى ەڭسەرۋدىڭ كەپىلى. سون­داي-اق, ول ەلىمىزدى كەمەل كەلەشەككە جەتەلەيتىن ۇلت جوسپارىندا قامتىل­عان وزەكتى ماسەلەلەردى جۇزەگە اسىرۋ جالپى­حالىقتىق ءىس ەكەنىن, وسى ورايدا, قازاق­ستاندىق حالىقشىل كوممۋنيستەر دە ناقتى جۇمىستار اتقاراتىنىن اتاپ ءوتتى. ءسوزىنىڭ سوڭىندا ۆ.كوسارەۆ ءوزىنىڭ پار­تيالاس ارىپتەستەرىن الداعى سايلاۋ ناۋ­قانىندا بەلسەندىلىك تانىتۋعا ۇندەدى. قازاقستان كوممۋنيستىك حالىق پارتياسىنىڭ حاتشىسى تۇرعىن سىزدىقوۆ ءوز كەزەگىندە الداعى 20 ناۋرىزدا وتەتىن سايلاۋدىڭ ماڭىزىنا توقتالدى. «ءبىزدىڭ پارتيامىز وتكەن جىلدارداعى سايلاۋ ناۋقاندارىندا مول تاجىريبە جيناقتاي ءبىلدى. الداعى ۋاقىتتا وتكەلى وتىرعان ساي­لاۋ ناۋقانى پارتيامىزعا ەلەۋلى سىناق بولعالى تۇر. ءبىز حالقىمىزدىڭ ءۇمىتىن اقتاپ, ولاردىڭ مۇددەلەرىن قورعاۋ­عا مۇمكىندىك الۋ ءۇشىن سايلاۋعا جوعارى دەڭگەيدە دايىندالىپ, بەلسەنە قاتىسۋى­مىز قاجەت», – دەدى پارتيا حاتشىسى. سونىمەن قاتار, ول قازىرگى تاڭدا ورىن الىپ وتىرعان الەمدىك داعدارىس پەن ءتۇرلى سىن-قاتەرلەرگە لايىقتى توسقاۋىل قويۋ ءۇشىن زاڭ شىعارۋ ورىندارىنىڭ بەلسەندى ءىس-قيمىلدار جاساپ, قالىپتاسقان احۋالدى دۇرىس باعالاي ءبىلۋى كەرەكتىگىنىڭ ماڭىزدىلىعىن ءسوز ەتتى. ونىڭ ايتۋىنشا, داعدارىستى ەڭسەرۋ ءۇشىن مەملەكەت باسشىسى نۇرسۇلتان نازارباەۆ ۇسىنعان «100 ناقتى قادام» ۇلت جوسپارىن ىسكە اسىرۋ قاجەت. وسىناۋ باعدارلامادا اتاپ كورسەتىلگەن مىندەتتەردى ابىرويمەن ورىنداۋعا قازاقستاندىق حالىقشىل كوممۋنيستەر دە ءوز ۇلەستەرىن قوسۋعا دايىن. سەزد بارىسىندا تۇرعىن سىزدىقوۆ باتىس مادەنيەتىنىڭ كەلەڭسىز تۇستارىن ءسوز ەتە كەلىپ, رۋحاني ومىرىمىزگە كەرى اسەرىن تيگىزىپ وتىرعان بىرقاتار تۇيتكىلدەر تۇرعىسىندا اڭگىمە قوزعادى. «باتىس حالىقتارى رۋحاني داعدارىستىڭ جاعىمسىز اسەرىن سەزىنىپ وتىر. رۋحاني قۇندىلىقتارعا قاتىستى ءتۇرلى كوزقاراستار بەلەڭ الۋدا. باتىس مادەنيەتى, ءومىر سالتى ءبىرىنشى كەزەككە ماتەريالدىق قۇندىلىقتاردى شىعاردى. ءبىز باتىستىق ءجونسىز ۇردىستەرگە ءۇزىلدى-كەسىلدى قارسىمىز», – دەدى ت.سىزدىقوۆ. ونىڭ ايتۋىنشا, باتىستىق مادەنيەت پەن ءومىر ءسۇرۋ سالتىنان تۋىنداپ وتىرعان كوپتەگەن كەلەڭسىز ارەكەتتەر, اسىرەسە, باتىستىق جاستاردىڭ بەتالىسى, ولاردىڭ ومىرگە دەگەن كەيبىر كوزقاراستارى ءبىزدىڭ قوعامىمىزعا جات جانە وتە زياندى. سونىمەن قاتار, پارتيا حاتشىسى تۇرعىن سىزدىقوۆ پرەزيدەنت نۇرسۇلتان نازارباەۆتىڭ ەل الدىنا قويىپ وتىرعان مىندەتتەرىن جۇزەگە اسىرۋدا قازاقستان كوممۋنيستىك حالىق پارتياسىنىڭ بار مۇمكىندىگىنشە قىزمەت ەتەتىنىنە سەندىردى. سەزدە بىرقاتار دەلەگاتتار مىنبەرگە كوتەرىلىپ, پارتيانىڭ الدىندا تۇرعان اۋقىمدى مىندەتتەر جونىندە ءسوز قوزعادى جانە ءوز ارىپتەستەرىن سايلاۋ ناۋقانىنا اۋىزبىرشىلىكپەن قاتىسۋعا شاقىردى. ولاردىڭ ايتۋىنشا, ەلىمىزدە قولعا الىنىپ جاتقان يگى شارالاردىڭ بارلىعى دا مەملەكەتىمىزدىڭ دامۋىنا وزىندىك ىقپالىن تيگىزەدى. اسىرەسە, ەل بىرلىگى, حالىق ىنتى­ماعى تۇراقتىلىق پەن ورنىقتى دامۋعا كەپىل بولا الادى. ولاردىڭ سوزدەرىنە قارا­عاندا, پرەزيدەنت نۇرسۇلتان نازارباەۆتىڭ سايلاۋ وتكىزۋ جونىندەگى شەشىمى وتە دۇرىس بولعان. ويتكەنى, پارتيالاردىڭ حالىق تاراپىنان سەنىمنىڭ جاڭا مانداتىن الۋى دەپۋتاتتاردىڭ تىڭ سەرپىلىسپەن جۇمىس ىستەۋلەرىنە جول اشادى. ونىڭ ۇستىنە, سايلاۋدا حالقىمىزدىڭ ىنتىماعى, بىرلىگى, ساياسي بەلسەندىلىگى انىق كورىنۋى ءتيىس. جيىندا قازاقستان كوممۋنيستىك حالىق پارتياسىنىڭ حاتشىسى, بەسىنشى شا­قىرىلىم دەپۋتاتى جامبىل احمەت­بەكوۆ پارلامەنت ماجىلىسىنە ۇمىتكەرلەردىڭ ءتىزىمىن وقىدى. وسىلايشا, قازاقستان كوممۋنيستىك حا­لىق پارتياسىنىڭ ح سەزى ءوز جۇمىسىن اياقتادى. سەزد سوڭىندا وعان قاتىسۋشىلار قازاقستان كوممۋنيستىك حالىق پارتيا­سىنىڭ سايلاۋالدى باعدارلاماسىن ءبىر­اۋىز­دان قابىلدادى جانە زاڭناما تالاپ­­تارىنا ساي 22 ادامنان تۇراتىن ۇمىتكەر­لەردىڭ پارتيالىق ءتىزىمىن بەكىتتى. جولدىباي بازار, «ەگەمەن قازاقستان». سۋرەتتى تۇسىرگەن ەرلان وماروۆ.