اقتوبەدە العاش رەت باۋىر اۋىستىرۋ وتاسى جاسالدى

اقتوبە. 1 اقپان. وتكەن جىلى كۇزدە ۇلتتىق مەديتسينا ورتالىعى جانىنداعى رەسپۋبليكالىق ترانسپلانتولوگيا ورتالىعىنىڭ باسشىسى, اكادەميك, مەديتسينا عىلىمدارىنىڭ دوكتورى جاقسىلىق دوسقاليەۆ وبلىستىق كلينيكالىق اۋرۋحانا بازاسىندا بۇيرەك اۋىستىرۋ وپەراتسياسىن جاساپ, باق وكىلدەرىمەن بولعان بريفينگتە 2016 جىلى مۇندا باۋىر اۋىستىرۋ وتاسى جاسالاتىنىن ايتقان بولاتىن. مىنە, سول ءسات تە جەتتى. ەلىمىزدىڭ باتىس ايماعىندا العاش رەت اقتوبەدە باۋىر اۋىستىرۋ وپەراتسياسى جاسالدى. بۇل تۋرالى egemen.kz ءتىلشىسى حابارلادى. وڭتۇستىك كورەيانىڭ سەۋل ۇلتتىق ۋنيۆەرسيتەتىنەن كەلگەن كۆانگ ۆۋنگ لي جانە اكادەميك جاقسىلىق دوسقاليەۆ باستاعان اقتوبەلىك بىلىكتى حيرۋرگتەر 38 جاستاعى ايەلدىڭ باۋىرىن اۋىستىردى. بۇل وپەراتسيا 7 ساعاتقا سوزىلدى. ناۋقاستىڭ جاعدايى جاقسى. بۇل تۋرالى وبلىستىق اۋرۋحانادا وتكەن ءباسپاسوز كونفەرەنتسياسىندا حاباردار ەتىلدى. باۋىر اۋىستىرۋ بۇعان دەيىن استانا, الماتى جانە شىمكەنت قالالارىندا جاسالىپ كەلگەن ەكەن. ستۋدەنتەر مەن دارىگەرلەر باۋىر اۋىستىرۋ ءساتىن ءماجىلىس زالىنداعى ەكراننان كوردى. دەرتى دەندەگەن ايەل بۇعان دەيىن ءدارى-دارمەكتىڭ كۇشىمەن ءومىر كەشكەن. وعان تۋعان ءىنىسى باۋىرىن بەرۋگە كەلىسكەننەن كەيىن سەۋل ۋنيۆەرسيتەتىنىڭ دارىگەرلەرىمەن بىرلەسە وتىرىپ, اپالى-ءىنىلى ەكەۋىنە مەديتسينالىق تەكسەرۋ جۇرگىزىلگەن. وڭتۇستىك كورەيادان كەلگەن پروفەسسور كۆانگ ۆۋنگ ءليدىڭ ايتۋىنشا, باۋىرى الماستىرىلعان ايەل ءالى دە ءۇش اپتاداي اۋرۋحانادا جاتادى. ال تۋعان اپكەسىنە باۋىرىنىڭ 70 پايىزىن بەرگەن جىگىت ءبارى ءساتتى بولسا,10 كۇننەن سوڭ ۇيىنە ورالادى. دارىگەرلەردىڭ كەڭەستەرىن مۇلتىكسىز ورىنداپ, كۇتىنىپ جۇرسە, ونىڭ اعزاسى الداعى 6 ايدىڭ ىشىندە تولىقتاي قالپىنا كەلەدى. وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ مالىمدەۋىنشە, بولاشاقتا وبلىستا ترانسپلانتولوگيالىق ورتالىق اشىلادى دەپ كۇتىلۋدە. بۇدان بىلاي اقتوبەلىك دارىگەرلەر باۋىر اۋىستىرۋ وپەراتسياسىن وزدەرى جاسايدى. بيىل وسىنداي 5 وتا جاساۋ كوزدەلۋدە. دەرەك كوزدەرىنەن ءمالىم بولعانىنداي, جالپى وبلىستا 128 ادام بۇيرەك , ال, 60 ادام باۋىر اۋىستىرۋدى كۇتۋدە ەكەن. ساتىبالدى ءساۋىرباي. دەرەك: egemen.kz. سۋرەت: حايرەدين راۋشانوۆ.