جاۋاپكەرشىلىك جەڭىلدەمەيدى

ءبىز سەزد وتىسىمەن «نۇر وتان» پارتياسى وبلىستىق فيليالى توراعاسىنىڭ ءبىرىنشى ورىنباسارى ارتۋر مولداعۇلوۆپەن تەلەفون ارقىلى حابارلاسىپ, ەلباسىنىڭ سوزىنەن تۋىندايتىن جاڭا تالاپتار جونىندە وي بولىسكەن ەدىك. – ارتۋر كەنجەاكىم ۇلى, الدىمەن ساياسي فورۋمنان العان اسەرلەرىڭىزبەن بولىسسەڭىز؟ – استاناداعى تاۋەلسىزدىك سارايىندا وتكەن «نۇر وتان» پارتياسىنىڭ كەزەكتەن تىس ءحVىى سەزىنە وبلىستان 32 دەلەگات قاتىسىپ, ساياسي ۇيىمنىڭ توراعاسى نۇرسۇلتان نازارباەۆتىڭ بايانداماسىن زور ىقىلاسپەن تىڭدادى. ەلباسى پارتيا الدىنا جاڭا مىندەتتەر جۇكتەپ, بەس ينستيتۋتتىق رەفورمادا مەجەلەنگەن تالاپتاردى ءتيىمدى ورىنداۋ تالابىن قويدى. «ءبىز اسا كۇردەلى ەكونوميكالىق دامۋ كەزەڭىندە رەفورمالاردى قولعا الىپ وتىرمىز. بۇل سولاي بولۋى دا كەرەك. داعدارىستىڭ ءوزى جاڭا دەڭگەيگە كوتەرىلۋگە سەپتىگىن تيگىزەدى. سوندىقتان دا, «نۇر وتان» پارتياسىنىڭ, ونىڭ ءاربىر مۇشەسىنىڭ مىندەتى – وسى. ۇلت جوسپارى – ءبىزدىڭ الداعى بەس جىلدىعىمىزدى قامتيتىن سايلاۋالدى باعدارلامامىزدىڭ وزەگى» دەگەنى ءار دەلەگاتتىڭ كوكەيىنە قوندى. – سەزدىڭ تاريحي ماڭىزى نەدە دەپ ويلايسىز؟ – پارتيانىڭ كەزەكتەن تىس سەزىندە سايا­سي ۇيىمنىڭ «قازاقستان-2021. بىرلىك. تۇراقتىلىق. جاسامپازدىق» اتتى جاڭا سايلاۋالدى تۇعىرناماسى بەكىتىلدى. ەلباسى ءوز سوزىندە «100 ناقتى قادام» ۇلت جوسپارىن جۇزەگە اسىرۋدىڭ ناقتى قادامدارىنا توقتالا كەلىپ, بارلىق دەڭگەيدەگى اكىمدەر مەن پارتيالىق ۇيىمداردى وسىعان جۇمىلۋدى مىندەتتەدى. اسا كۇردەلى ەكونوميكالىق دامۋ كەزەڭىندە ۇلت جوسپارى «نۇر وتان» پارتياسىنىڭ سايلاۋالدى باعدارلاماسىنىڭ وزەگى بولىپ تابىلادى. ول الداعى بەسجىلدىق كەزەڭ بويىنشا 2021 جىلعا دەيىنگى پارتيانىڭ نەگىزگى باعىتتارىن قامتيدى. ءسويتىپ, بەس ينستيتۋتتىق رەفورما, «قازاقستان-2050» ستراتەگياسى, «نۇرلى جول» باعدارلامالارىن جۇزەگە اسىرۋ قامتاماسىز ەتىلەدى. الداعى پارلامەنت ءماجىلىسى سايلاۋىنا «نۇر وتان» پارتياسىنىڭ قاتىسۋى ەسكەرىلىپ, سوعان وراي پارتيالىق ءتىزىم بەكىتىلدى. جاڭا تۇرپاتتى پارلامەنت قۇرامىنا وڭىرگە تانىمال ازاماتتار, بولاشاعىنان ۇلكەن ءۇمىت كۇتتىرەتىن جاستار, باسقا دا ماماندىق يەلەرى سايلانادى دەپ بىلەمىن. – مەملەكەت باسشىسى ءوز سوزىندە «نۇر وتاننىڭ» 17 جىلدىق كوشباسشىلىعى ەكونوميكامىزدىڭ, مەملەكەت پەن قوعامنىڭ ناقتى جەتىستىكتەرىنە اينالعانىن ايتتى. بۇل جايىندا نە دەيسىز؟ – پارتيا ءوزىنىڭ العا قويعان مىندەتتەرىن اركەز ورىنداپ, شىن مانىندەگى حالىقتىق قۇرىلىمعا اينالدى دەسەك, ونى ەشكىم جوققا شىعارا قويماس. قانداي قيىن جاعدايدا دا ۋادەسىنە بەرىك ەكەنىن كورسەتىپ كەلەدى. ەكسپورتتىق ونىمدەر باعاسىنىڭ قۇلدىراۋىنا, بيۋدجەت كىرىسىنىڭ 40 پايىز كەمۋىنە قاراماستان ەل تۇرعىندارىن الەۋمەتتىك قولداۋ جالعاسىپ وتىر. «نۇرلى جول» باعدارلاماسى قولعا الىنعان ءبىرىنشى جىلى 775 ميلليارد تەڭگە قاراستىرىلسا, الداعى ۋاقىتتاردا 400 مىڭ جاڭا جۇمىس ورىندارىن اشۋ كوزدەلگەن. 500 شاقىرىم جول, 7 مىڭ تۇرعىن ءۇي, 500 دەنساۋلىق ساقتاۋ نىساندارى سالىنعان. سونىمەن قاتار, ءار ءداۋىردىڭ ءوز بەلگىسى بار ەكەنى, سوعان وراي الدا كوپ سىن-قاتەرلەر كۇتىپ تۇرعانىن دا جاسىرمادى. مۇنايدىڭ تومەن باعاسى جاعدايىندا ءومىر ءسۇرىپ كەلە جاتقانىمىزعا قاراماستان, حالىقتىڭ ءومىر ءسۇرۋ ساپاسى تومەندەمەگەنىن, ەندى جاڭا احۋالدا ءومىر سۇرۋگە, سىن-قاتەرلەردى ەپتىلىكپەن ەڭسەرۋدى ۇيرەنۋگە شاقىردى. – سەزدەن تۇيگەن ويىڭىز, العان تاعىلىمىڭىز از ەمەس ەكەن. جەرگىلىكتى جەرلەردە قانداي ماسەلەلەرگە باسىم باعىت بەرمەكسىزدەر؟ – پرەزيدەنت ۇلت جوسپارىنىڭ ماڭىزدىلىعىن حالىققا بارلىق دەڭگەيدە ءتۇسىندىرۋ مىندەتىن جۇكتەدى. الەمدى ەكونوميكالىق تۇراقسىزدىق دەندەگەن كەزدە الەۋمەتتىك ماسەلەلەر شەشۋشى بۋىن بولىپ قالا بەرەدى. «قازاقستان. 2017 ماقساتتارى. ۇلتتىق ءىس-قيمىل جوسپارى» سايلاۋالدى تۇعىرناماسىن جۇزەگە اسىرۋدا بەلسەندىلىك تانىتقان فيليالدىڭ 39 مىڭنان استام مۇشەسى پارتيانىڭ سايلاۋالدى تۇعىرناماسىن ناسيحاتتاۋ جۇمىستارىنىڭ بەل ورتاسىنان تابىلارى ءسوزسىز. ءبىلىم بەرۋ, دەنساۋلىق ساقتاۋ, شاعىن جانە ورتا كاسىپكەرلىكتى دامىتۋ, ازاماتتاردى الەۋمەتتىك قولداۋ, اۋىل شارۋاشىلىعى سالالارى بويىنشا دا پارتيالىق جوبالاردى جۇزەگە اسىرۋدىڭ ءتيىمدى تەتىكتەرىن قاراستىراتىن بولامىز. قوعامنىڭ ءالسىز توپتارى – مۇمكىندىگى شەكتەۋلى جاندار مەن قارتتاردى ەرەكشە قامقورلىققا الىپ, «كەدەرگىسىز كەلەشەك» «ارداگەرلەردى ارداقتايىق!» اكتسيالارى جالعاستىرىلادى. فيليال جانىندا وڭىرىمىزدەگى نىسانداردى بەيىمدەۋ بارىسىن قاداعالايتىن قوعامدىق كەڭەس, مۇمكىندىگى شەكتەۋلى جاندارعا ارنالعان نىساندارعا مونيتورينگ جۇرگىزۋ جونىندەگى جۇمىس توبى جۇمىس ىستەيدى. قوعامدىق قابىلداۋعا تۇسكەن 21 ءوتىنىش تۇگەلدەي ءوز شەشىمىن تاپتى. ۇلى وتان سوعىسىنىڭ ارداگەرلەرى مەن زەينەتكەرلەر ءبىزدىڭ نازارىمىزدان تىس قالعان ەمەس. پارتيانىڭ «ارداگەرلەردى ارداقتايىق!» جوباسى اياسىندا 259 ارداگەرگە كومەك كورسەتىلدى. وتىنمەن, دارىمەن, تۇرمىستىق قوندىرعىلارمەن, مەديتسينالىق قۇرىلعىلارمەن قامتاماسىز ەتىلدى. «باقىتتى بالالىق شاق» جوباسى اياسىندا دا اۋقىمدى شارالار اتقارىلدى. «جەمقورلىقسىز ەل», «ءبىزدىڭ اۋىل», «جاستار – كادر رەزەرۆى», «ءساتتى قادام», «جاستار – وتانعا!» سىندى جوبالارعا پارتيا مۇشەلەرى قوسقان ۇلەس از ەمەس. وبلىستىق پارتيالىق ۇيىم جۇمىسىنىڭ ماڭىزدى بولىگى – قوعامدىق قابىلداۋ. پارتيانىڭ وڭىرلىك جانە اۋماقتىق فيليالدارىنا كەز كەلگەن ادام كەلىپ, تولعاندىرعان ماسەلەسىن ايتا الادى. پارتيانىڭ قوعامدىق قابىلداۋىنا ازاماتتاردان 2087 ءوتىنىش ءتۇستى. سوعان قاراعاندا سۋمەن, جارىقپەن قامتۋ, اباتتاندىرۋ, كوگالداندىرۋ, تاريفتەر باعاسىنىڭ كوتەرىلۋى جانە قىزمەت كورسەتۋ, كوممۋنالدىق قىزمەتتىڭ جۇمىس ساپاسى جونىندەگى ماسەلەلەر ءالى دە ماڭىزدى ەكەنىن كورسەتەدى. الدىمىزدا اۋقىمدى مىندەتتەر تۇر. – اڭگىمەڭىزگە راحمەت! اڭگىمەلەسكەن ءومىر ەسقالي, «ەگەمەن قازاقستان». سولتۇستىك قازاقستان وبلىسى.