تارازدا «باۋىرجانتانۋ» ورتالىعىندا جاڭا ەڭبەكتەر دايىندالۋدا

تاراز. 29 قاڭتار. تاراز مەملەكەتتىك پەداگوگيكالىق ينستيتۋتىنىڭ «باۋىرجانتانۋ» عىلىمي-زەرتتەۋ ورتالىعىندا حالىق قاھارمانى باۋىرجان مومىش ۇلىنىڭ كوپتومدىق شىعارمالار جيناعىنىڭ كەلەسى 15 تومى دايىندالۋدا. بۇعان دەيىن ونىڭ 30 تومى جارىق كورگەن بولاتىن. بۇل تۋرالى egemen.kz ءتىلشىسى حابارلادى. اتالعان وقۋ ورنىنىڭ ءباسپاسوز قىزمەتىنىڭ تاراتقان مالىمدەمەسى بويىنشا, كوپتومدىقتا قازاقتىڭ كورنەكتى جازۋشىسى, داڭقتى قولباسشى تۋرالى ەستەلىكتەر, درامالىق شىعارمالار, ارناۋلار, پوەمالار مەن باللادالار توپتاستىرىلعان. اتاپ ايتقاندا, 31, 32, 33, 34, 35, 36, 37, 38 تومداردا ب. مومىش ۇلى تۋرالى ەسىمى ەلگە بەلگىلى قالامگەرلەر, عالىمدار مەن قوعام قايراتكەرلەرىنىڭ ەستەلىكتەرى جيناقتالعان. ولاردىڭ قاتارىندا مامىتبەك قالدىباەۆ, دميتري سنەگين, ءازىلحان نۇرشايىقوۆ, تاحاۋي احتانوۆ, تاكەن الىمقۇلوۆ, تۇرسىن جۇرتباي, مىرزاتاي جولداسبەكوۆ, باحىتجان مومىش ۇلى, مەكەمتاس مىرزاحمەت ۇلى, مۇحتار شاحانوۆ, قاسىم قايسەنوۆ, شەرحان مۇرتازا, عابيت مۇسىرەپوۆ, زەينەپ احمەتوۆا, اكىم تارازي سىندى ازاماتتار بار. ال, 39 تومعا مالىك عابدۋلليننىڭ «باۋىرجان مومىشۋلى» اتتى ورىس تىلىندەگى وچەركى بەرىلگەن. باتىر تۋرالى درامالىق شىعارمالار 40, 41 تومداردا. وندا شەرحان مۇرتازانىڭ «نوقتاعا باسى سيماعان», جاركەن بودەشتىڭ «جۇلدىزتاس» جانە وزگە دە جازۋشىلاردىڭ تۋىندىلارى بار.  42, 43 تومداردا جالپى سانى 200 ارناۋ ولەڭ توپتاستىرىلعان. 44 تومدا پوەمالار, 45 تومدا جىر, باللادالار جيناقتالعان. «بۇگىنگى كۇندە 15 توم باسپاعا تولىقتاي دايىن دەۋگە بولادى. جالپى, دۇنيەجۇزىندە باۋكەڭ تۋرالى جازىلعان ەڭبەكتەر وتە كوپ. سولاردىڭ ءبارىن جيناپ, اۋدارۋ قاجەت. وسىلاردى رەتتەسەك باتىر اعامىزدىڭ 100 تومدىعىن شىعارۋعا مۇمكىندىگىمىز بار,» - دەيدى «باۋىرجانتانۋ» عىلىمي-زەرتتەۋ ورتالىعىنىڭ باس عىلىمي قىزمەتكەرى ءالىمباي نايزاباەۆ. تاراز مەملەكەتتىك پەداگوگيكالىق ينستيتۋتىنىڭ رەكتورى داريا قوجامجاروۆانىڭ قولداۋىمەن ورتالىق بۇگىندە قازاقستان رەسپۋبليكاسى ورتالىق مەملەكەتتىك مۇراعاتىنداعى باۋىرجان مومىش ۇلىمەن قارىم-قاتىناستا بولعان قوعام قايراتكەرلەرى, اقىن-جازۋشىلار باسقا دا ونەر ادامدارىنىڭ جەكە قورلارىنداعى باۋكەڭە بايلانىستى ارحيۆتىك قۇجاتتاردى جيناقتاۋ ۇستىندە. ايتا كەتەيىك, عىلىمي ورتالىق ب. مومىش ۇلىنىڭ مۇرالارىن جيناۋ, زەرتتەۋ جانە باسىپ شىعارۋ باعىتىندا جۇمىس اتقارادى. جۋىردا «لەگەندارنىي باتىر» دەگەن اتپەن ەستەلىك كىتابى مەن «فوتوقۇجاتتىق البومىن» كوپشىلىك نازارىنا ۇسىنىلعان بولاتىن. ورالحان ءداۋىت. دەرەك, سۋرەت: egemen.kz