قوستانايدا ورنيتولوگتار مەن بيولوگتار دابىل قاعۋدا

قوستاناي. 28 قاڭتار. قوستانايدا بيولوگتار قالىڭ جاۋعان قاردان قۇستار مەن اڭدار زارداپ شەككەنىن ايتىپ وتىر. ولاردىڭ پىكىرىنشە, وبلىس اۋماعىنىڭ فلوراسى مەن فاۋناسىنا ۇلكەن شىعىن بولۋى مۇمكىن. بۇل تۋرالى alau.kz سايتىنا سىلتەمە جاساعان egemen.kz ءتىلشىسى حابارلادى. قالىڭ تۇسكەن قاردان ەشتەڭە تاۋىپ جەي الماعان ورمانداعى اڭدار ەلدى مەكەندەرگە كىرە باستاعانى تۋرالى اقپاراتتار ەستىلە باستاعان. كەيبىر جەرلەردە قاردىڭ قالىڭدىعى مەترگە دەيىن جەتەدى. كانىگى اڭشىلاردىڭ ايتۋىنشا, مۇندايدا دالاداعى كوپتەگەن اڭدار ءنار تابا المايدى, اسىرەسە, قۇستار زارداپ شەگەتىن كورىنەدى. اڭشى دميتري ۋساچەۆ: «تەزىرەك قار توقتاتۋ جۇمىسىن باستاعان دۇرىس, قاردى قارا توپىراق كورىنگەنشە ءسۇرۋ كەرەك. سوندا عانا دالاداعى ەلىك, قويان اڭىزداعى بيداي, س ۇلى, ارپا قالدىعىن تاۋىپ جەيدى», – دەيدى. قازىر شارۋا قوجالىقتارى مەن جاۋاپكەرشىلىگى شەكتەۋلى سەرىكتەستىكتەردىڭ مۇنداي جۇمىستى اتقارۋعا قاۋقارى جوق. ولار قارجىسىن قار توقتاتۋعا شىعارعىسى كەلمەيدى. اڭدار مەن قۇستارعا قيىن بولىپ تۇرعانى ماماندار دا الاڭداتىپ وتىر. بيولوگ اندرەي اندريۋششەنكو: «اڭگىمە قاردىڭ قالىڭدىعىندا ەمەس, ونىڭ قالاي جاۋعانىندا بولىپ وتىر. قاراشا ايىنىڭ اياعىندا جاۋعان جاڭبىر مۇز بولىپ قاتتى دا, ونىڭ ۇستىنە قار جاۋدى. اڭدار مۇزى قالاي ويسىن. بۇلان تۇياقتى اڭ بولعان سوڭ تەبىندەر, ال ۇساق اڭدار مەن قۇستارعا وتە قيىن», – دەدى. ءنازيرا جارىمبەتوۆا. دەرك, سۋرەت: alau.kz.