اپاتقا ۇشىراعان تىكۇشاق ىشىندەگى بارلىق جولاۋشى قازا تاپتى

الماتى. 28 قاڭتار. ىزدەۋ جۇمىستارىن ۇيىمداستىرۋ شتابى جوعالعان تىكۇشاق سىنىقتارى الماتى وبلىسىنىڭ  قاپال اۋىلىنان ءۇش شاقىرىم جەردە تاۋ شاتقالىنان تابىلعانىن جاريا ەتتى. بۇل تۋرالى قازاقستان رەسپۋبليكاسىنىڭ ىشكى ىستەر مينيسترلىگى توتەنشە جاعدايلار كوميتەتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. تىكۇشاق اپاتىنا وراي قوزعالعان قىلمىستىك ءىس اياسىندا تەرگەۋ جۇرگىزىلۋدە. قازاقستان رەسپۋبليكاسىنىڭ ىشكى ىستەر مينيسترلىگى توتەنشە جاعدايلار كوميتەتىنىڭ رەسمي وكىلى  رۋسلان يمانقۇلوۆتىڭ ايتۋىنشا, قازاقستان رەسپۋبليكاسىنىڭ ىشكى ىستەر ءمينيسترى, پوليتسيا گەنەرال-پولكوۆنيگى قالمۇحامبەت قاسىموۆتىڭ بۇيرىعىمەن ىشكى ىستەر ءمينيسترىنىڭ ورىنباسارى ۆ.ك. بوجكو وقيعا ورنىنا ۇشىپ كەتتى. ەستەرىڭىزگە سالا كەتەيىك, كەشە ساعات 17:47-دە تىركەۋ ورتالىعىنا ساعات 17:10-دا «اسپان» كومپانياسىنىڭ بورت ءنومىرى UP-MD 600-N تىكۇشاعىمەن بايلانىس جوعالعانى تۋرالى حابارلاما كەلىپ تۇسكەن. اۋا رايىنىڭ قولايسىزدىعانا قاراماستان ىزدەۋ جۇمىستارىنا 500 ادام, 20 تەحنيكا جۇمىلدىرىلدى. تىكۇشاقتا 5 ادام بولعان. ولار ۇشقىش ۆ. كوندراتيۋك (1967 ج.), دارىگەر-گەماتولوگ ب. قايسانوۆ (1964 ج.), فەلدشەر گ. حاميتوۆا (1993 ج.), قارلىعاش ابىلقاسىم (1989 ج.) جانە ونىڭ ءسابيى باعىم ابىلقاسىم(2015 ج.) تىكۇشاق ۇشارالدىق ناۋقاس 2 ايلىق ءسابيدى تالدىقورعانعا جەتكىزۋگە باعىت العان ەدى. تالعات ءسۇيىنباي. دەرەك, سۋرەت: قازاقستان رەسپۋبليكاسىنىڭ ىشكى ىستەر مينيسترلىگى توتەنشە جاعدايلار كوميتەتىنىڭ ءباسپاسوز قىزمەتى.