ەۋروپالىق وداق جاپونيا كومپانيالارىنا ايىپپۇل سالدى

استانا. 28 قاڭتار. ەۋروپالىق وداقتىڭ مونوپولياعا قارسى كوميسسياسى جاپونيانىڭ Mitsubishi Electric (Melco) جانە Hitachi كومپانيالارىنا اۆتوبولشەكتەر جونىندەگى كارتەلدى كەلىسىمدەرى ءۇشىن 138 ميلليون ەۋرو كولەمىندە ايىپپۇل سالدى. بۇل تۋرالى interfax.ru سايتىنا سىلتەمە جاساعان egemen.kz ءتىلشىسى حابارلادى. سومانىڭ 111 ميلليون ەۋروعا جۋىعىن Melco كومپانياسى تولەيتىن بولسا, قالعان 27 ميلليون ەۋرو Hitachi كورپوراتسياسىنىڭ موينىندا. بۇل كەلىسىمنىڭ ىشىندە جاپونيانىڭ تاعى ءبىر كومپانياسى Denso دا بار بولاتىن. الايدا زاڭسىز ارەكەتتەردى العاش بولىپ حابارلاعانى ءۇشىن ايىپپۇل تولەۋدەن بوساتىلدى. مالىمەت بويىنشا, سوڭعى بەس جىل ىشىندە اتالعان كومپانيالار اۆتوموبيل گەنەراتورى مەن وتالدىرعىشىنا بايلانىستى باعا كولەمىن ءوزارا كەلىسىپ بەلگىلەگەن. سونداي-اق, وسى ۋاقىتقا دەيىنگى تۇتىنۋشىلارىن ءبىر-بىرىنە سىلتەپ كەلگەن. «ەگەر دە ەۋروپالىق, سونداي-اق, وزگە دە ايماقتىڭ تۇتىنۋشىلارى, وسىعان بايلانىستى قولايسىزدىق كورگەن بولسا, ەۋروكوميسسيا ارنايى تەرگەۋ جۇمىستارىن جۇرگىزەدى», – دەيدى ەۋروكوميسسار مارگرەت ۆەستاگەر. ايان ءابدۋالي. دەرەك: interfax.ru. سۋرەت: teknoblog.ru.