يوزەف بلاتتەر فيفا پرەزيدەنتى بولىپ قالۋى مۇمكىن

استانا. 28 قاڭتار. سپورت اربيتراجدى سوتى حالىقارالىق فۋتبول فەدەراتسياسىنىڭ (فيفا) پرەزيدەنتى يوزەف بلاتتەردىڭ اپەللياتسياسىن قاناعاتتاندىرسا, جەمقورلىق داۋ-دامايىنا جانە فۋتبولعا قاتىستى ءىس-ارەكەتتەردەن 8 جىلعا شەتتەتىلگەنىنە قاراماستان, ول ءوز قىزمەتىندە قالۋى مۇمكىن. بۇل تۋرالى تاسس اقپارات اگەنتتىگىنە سىلتەمە جاساعان egemen.kz ءتىلشىسى حابارلادى. شۆەيتساريانىڭ Sport Information اگەنتتىگىنىڭ مالىمدەۋىنشە, ەگەر سوت بلاتتەردىڭ پايداسىنا ۇكىم شىعارسا, 26 اقپانعا جوسپارلانعان فيفا پرەزيدەنتىن سايلاۋ ءىس-شاراسى زاڭدى كۇشىن جويادى. «ازىرگە يوزەف بلاتتەر وتستاۆكاعا كەتكەن جوق. سوندىقتان فيفا جارعىسىنا سايكەس جاڭا پرەزيدەنتتىڭ سايلانۋى مۇمكىن ەمەس», – دەپ جازادى اتالعان اگەنتتىك. سونىمەن قاتار, جەمقورلىققا قارسى Transparancy International ۇيىمىنىڭ وكىلى سيلۆيا شەنك تە گەرمانيانىڭ Sport Bild جۋرنالىنا بەرگەن سۇحباتىندا بۇل ماسەلەگە نازار اۋداردى. ول فيفا-نىڭ اقپاندا وتەتىن كونگرەسىندە بلاتتەردى قىزمەتىنەن بوساتۋدى كۇن تارتىبىنە ەنگىزۋ كەرەكتىگىن ايتىپ: «ەگەر اربيتراجدى سوت بلاتتەردى اقتاپ شىقسا, جاڭادان سايلانعان پرەزيدەنتتىڭ بارلىق شەشىمدەرى نەگىزسىز بولادى», – دەدى. ازىرگە 26 اقپاندا وتەتىن جيىندا بۇل ماسەلە قاراستىرىلاتىنى تۋرالى ەشقانداي اقپارات تاراعان جوق. سونداي-اق, ماماندار بلاتتەردىڭ دە ءوز ەركىمەن قىزمەتىنەن كەتۋ جونىندە ءوتىنىش جازۋى ەكىتالاي ەكەنىن ايتىپ وتىر. ءبىر سوزبەن ايتقاندا, ول سوتتىڭ شەشىمىن كۇتىپ, سوعان دەيىن ءوزى پرەزيدەنت بولىپ قالا بەرەدى. ەلامان قوڭىر. دەرەك: تاسس. سۋرەت: rbc.ua.