قوستانايدا قىلمىستىڭ اشىلۋ كورسەتكىشى وتە تومەن

قوستاناي. 26 قاڭتار. قوستانايدا وبلىستىق ىشكى ىستەر دەپارتامەنتىنىڭ جەدەل توپتار قىزمەتىنىڭ 2015 جىلعى جۇمىس قورىتىندىسى بويىنشا كەڭەيتىلگەن جەدەل ءماجىلىسى بولىپ ءوتتى. وندا قوستاناي وبلىسى بويىنشا قىلمىستىق احۋال ءبىرشاما تۇراقتى بولعانىمەن, ونىڭ اشىلۋ كورسەتكىشى تومەن ەكەنى ايتىلدى. بۇل تۋرالى ng.kz سايتىنا سىلتەمە جاساعان egemen.kz ءتىلشىسى حابارلادى. ماجىلىستە وبلىستىق ىشكى ىستەر دەپارتامەنتىنىڭ باستىعى تىلەگەن ماتكەنوۆ وبلىستا جاسوسپىرىمدەر قىلمىسىنىڭ ازايماي وتىرعانىن ايتتى. ونىڭ سەبەبىنىڭ ءبىرىن دەپارتامەنت باستىعىنىڭ ورىنباسارى مەيىرحان تورعاەۆ قىلمىس جاساعان جاسوسپىرىمدەردى ۋاقىتشا ۇستايتىن ارنايى مەكەمەنىڭ جوقتىعى جانە اتا-انالارعا بەرگەنمەن ناتيجە بولماي وتىرعانىنان دەپ ءتۇسىندىردى. ماجىلىستە وبلىس كولەمىندە جاسالعان قىلمىستىڭ اشىلۋى دا ناشار ەكەنى ايتىلدى. وبلىستىق ىشكى ىستەر دەپارتامەنتى باستىعىنىڭ ورىنباسارى مەيىرحان تورعاەۆ: «وزگەنىڭ  مۇلكىن ۇرلاۋ ورتا اۋىر قىلمىستىڭ 88 پايىزىن قۇرايدى. ال ونىڭ جىل بويىنداعى اشىلۋ كورسەتكىشى 25 پايىزدان اسپادى. سونىمەن قاتار ورتاشا اۋىرلىقتاعى قىلمىستاردىڭ اشىلۋى 29 پايىز بولدى», – دەدى. مۇنىڭ سەبەبىن سۇراعان ىشكى ىستەر مينيسترلىگى جەدەل جوسپارلاۋ دەپارتامەنتىنىڭ باستىعى قايرات تىنىبەكوۆكە ول ىزدەستىرۋ, تەرگەۋ قىزمەتكەرلەرىنىڭ تاجىريبەسىز جاستار ەكەندىگىن العا تارتتى. ول تەرگەۋ قىزمەتكەرلەرىنىڭ 60 پايىزىنىڭ جۇمىس تاجىريبەسى ءالى 5 جىلعا جەتپەيتىندىگىن ايتتى. وبلىستا ءار 10 000 تۇرعىنعا 257 قىلمىستان كەلەدى ەكەن. سوندىقتان تىنىبەكوۆ قىزمەتكەرلەردى ۇيرەتىپ, بار كۇشتى پروفيلاكتيكالىق جۇمىستارعا سالۋ كەرەكتىگىن ايتتى. دەگەنمەن ءار تەرگەۋشىگە 135 ىستەن كەلەدى. نورما بويىنشا ول 41-دەن اسپاۋى ءتيىس. قىلمىستاردىڭ اشىلماۋىنا قىزمەتكەرلەردىڭ تاجىريبەسىنىڭ ازدىعى سەبەپ پە, الدە جۇمىس جۇكتەمەسىنىڭ شەكتەن تىس كوپتىگى سەبەپ پە؟ سونىمەن قاتار قوستانايداعى قىلمىس جاساعانداردى ۋاقىتشا ۇستايتىن مەكەمەدە جاعداي جوق, سوندىقتان ءىس سوتقا بەرىلگەنشە ولاردى رۋدنىيعا اپارۋعا تۋرا كەلەدى. بۇل دا پوليتسەيلەردىڭ جۇمىسىن قيىنداتا, ۋاقىتتى تىعىزداتا تۇسەدى. ءنازيرا جارىمبەتوۆا. دەرەك, سۋرەت: ng.kz.