حرومتاۋدىڭ «گورنياك» كومانداسى – ەل چەمپيونى!

اقتوبە. 26 قاڭتار. اقتوبە وبلىسىنىڭ حرومتاۋ قالاسىندا وتكەن 1999-2000 جىلدارى تۋعان جاسوسپىرىمدەر اراسىنداعى دوپتى حوككەيدەن قازاقستان بىرىنشىلىگى مارەگە جەتتى. بۇل تۋرالى egemen.kz ءتىلشىسى حابارلادى. ءدوڭ تاۋ-كەن بايىتۋ كومبيناتىنىڭ ساۋىقتىرۋ-دەنە شىنىقتىرۋ كەشەنىندە ءتورت كۇن بويى ەلىمىزدىڭ وڭىرلەرىنەن كەلگەن بەس كوماندا ەل بىرىنشىلىگىنىڭ التىن جۇلدەسىن ساراپقا سالدى. تارتىستى وتكەن ويىندار ناتيجەسىندە وسى كەشەننىڭ جانىنداعى دوپتى حوككەي سەكتسياسىنىڭ تاربيەلەنۋشىلەرى فينالدا ورال قالاسىنىڭ كومانداسىمەن كەزدەستى. ناتيجەسىندە 4:2 ەسەبىمەن جەڭىسكە جەتىپ, ەل چەمپيونى اتاندى. «گورنياك» كومانداسىنىڭ التى ويىنشىسى ەلىمىزدىڭ قۇراما كومانداسىنا شاقىرىلدى. ەندى ولار 17 جاسقا دەيىنگى جاسوسپىرىمدەر اراسىنداعى رەسەيدىڭ ارحانگەلسك قالاسىندا وتەتەتىن الەم بىرىنشىلىگىندە ەل نامىسىن قورعايتىن بولادى. «ءبىزدىڭ بالالار وتە جيناقى جانە شەبەر وينادى. قارسىلاستارىمىز دا وسال ەمەس. شاكىرتتەرىم اسىرەسە, فينالدا ادەمى ويىن ورنەگىن كورسەتتى», – دەيدى «گورنياك» كومانداسىنىڭ جاتتىقتىرۋشىسى امانسەرىك ۇستاباەۆ. وسى جىلدىڭ ناۋرىز ايىندا مۇندا ەڭ جاس حوككەيشىلەردىڭ اراسىندا ەل بىرىنشىلىگىن وتكىزۋ كوزدەلۋدە. كومبينات ديرەكتورى مارال بەكەەۆ دوپتى حوككەيدەن قازاقستان چەمپيوناتىن حرومتاۋدا وتكىزۋ داستۇرگە اينالعانىن, بۇل ءۇردىستىڭ الداعى ۋاقىتتا دا جالعاسىن تاباتىنىنا سەندىردى. ساتىبالدى ءساۋىرباي. دەرەك, سۋرەت: egemen.kz.