اتىراۋدا استانالىق مەنەدجەردى ۇرلاعاندارعا سوت ۇكىمى شىقتى

اتىراۋ. 26 قاڭتار. اتىراۋ قالالىق №2 سوتى «قازترانسگاز ايماق» اكتسيونەرلىك قوعامىنىڭ مەنەدجەرىن ۇرلاپ, ولتىرەمىز دەپ قورقىتقان جەرگىلىكتى 2 تۇرعىنعا قاتىستى سوت ۇكىمىن شىعاردى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. «ءىس قۇجاتتارىنان انىقتالعانداي, استانا قالاسىنىڭ «قازترانسگاز ايماق» اق-نىڭ 27 جاستاعى قىزمەتكەرى اتىراۋ قالاسىندا قىزمەتتىك ءىسساپاردا بولىپ, 2015 جىلدىڭ 22 شىلدەسىندە كۇندىزگى رەيسپەن استانا قالاسىنا ۇشپاقشى بولادى. ونى ارىپتەسى «Toyota Camry» ماركالى اۆتوكولىگىمەن شىعارىپ سالادى. اتىراۋ حالىقارالىق اۋەجايىنىڭ كولىك تۇراعىندا ولارعا سوتتالۋشىلار جانە وعان قاتىستى قىلمىستىق ءىس بولەك وندىرىسكە بولىنگەن بەلگىسىز ادام كەلىپ جاقىندايدى دا, مەنەدجەردى كۇشتەپ كولىككە وتىرعىزىپ, الىپ كەتىپ قالادى. تاس جولعا شىققاسىن, ۇرلاۋشىلار مەنەدجەردى قاۋىپسىزدىك بەلدىگىمەن بايلاپ جانە كوزىن دە ماتاپ قويادى. سودان سوڭ, بەلگىسىز ءبىر جەرگە توقتاعان. ونى كولىكتەن شىعارىپ, تىزەرلەپ وتىرعىزادى. «سەن ءومىر سۇرەسىڭ, بىراق سەنىڭ دوسىڭ بۇل تۋرالى پوليتسياعا حابار بەرسە, ءبىز سەنى ولتىرەمىز. ءتىپتى, استانا قالاسىنان دا تاۋىپ الامىز», – دەپ قورقىتادى. سونداي-اق, ودان كومپانيانىڭ جەرگىلىكتى فيليالىن تەكسەرۋ قۇجاتتارىن تارتىپ العان. مەنەدجەردى كوزى بايلاۋلى كۇيىندە دالادا قالدىرىپ, وقيعا ورنىنان قاشىپ كەتكەن», – دەپ حابارلادى اتىراۋ وبلىستىق سوتىنىڭ ءباسپاسوز حاتشىسى بورانباي عاليەۆ. سوتتا ەكى سوتتالۋشىنىڭ دا «قازترانسگاز ايماق» اق-نىڭ اتىراۋ قالاسىنداعى فيليالىندا قىزمەت جاسايتىندىقتارى انىقتالدى. سوت ۇكىمىمەن ولار قىلمىستىق كودەكستىڭ 125-بابىنىڭ 2-بولىگى 1-تارماعى, 191-بابىنىڭ 2-بولىگى 1 جانە 3-تارماقتارى بويىنشا كىنالى دەپ تانىلىپ, ەكەۋىنە دە 3 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. جازا وتەۋ ورنى رەتىندە جالپى رەجىمدەگى تۇزەۋ كولونياسى بەلگىلەندى. جولداسبەك شوپەعۇل. دەرەك: اتىراۋ وبلىستىق سوتىنىڭ ءباسپاسوز قىزمەتى. سۋرەت: vestipmr.info.